6/28/2022
Today from Hiiraan Online:  _
Wararka Maanta- Isniin, Oct 22, 2012
Xaaladda Wariye ka Tirsan Idaacadda Shabeelle oo soo Hagaagaysa Kaddib Dhaawac halis ah oo xalay loogu geystay Muqdisho
Isniin, Oktoobar 22, 2012 (HOL) — Xaaladda wariye Maxamed Maxamuud Tuuryare oo ka mid ah wariyeyaasha idaacadda Shabeelle ee Muqdisho ayaa xaaladdiisu soo hagaagaysaa, kaddib markii kooxo hubeysan ay xalay fiidkii si xun ugu dhaawaceen degmada Wadajir ee gobolka Banaadir.

Wariyahan ayaa waxaa toogtay rag bastoolado ku hubeysan, kuwaasoo ay u suuro-gashay inay markiibta goobta ka baxsadaan, waxaana wariyaha ay dhowr xabbadood oo isdaba-joog ah uga dhaceen feeraha iyo caloosha.

"Tuuryare waxaa lagu dhaawacay xaafadda Xaawo-taako, waxaana ku dhexaday saddex xabbadood, runtii dhaawiciisu aad ayuu u cusnaa balse haatan xaaladdiisu waa mid soo hagaaraysa," ayuu yiri wariye ka tirsan idaacadda oo ka mid ah kuwa kula sugan wariyaha Isbitaalka Madiina oo qalliin lagula sameeyay xalay.

Dhakhaatiirta isbitaalka Madiina ayaa sheegay in dhaawaca wariyaha uu ahaa mid culus ayna ku sameeyeen qalliin saacado qaatay, waxaana wariyahan uu kordhiyay tirada wariyeyaasha sannadkan 2012 waxyeelada loogu geystay magaalada Muqdisho, gaar ahaan degmada Wadajir.

Sannadkan oo keliya ayaa waxaa degmada Wadajir lagu dilay laba wariye oo ka tirsanaa idaacadda Shabeelle iyadoo Tuuryare uu noqonayo wariyihii labaad oo isla degmadaas lagu dhaawaco sannadkan.

Degmada Wadajir ayaa waxaa sidoo kale sannadkan lagu dilay laba wariye oo kale kuwaasoo kala ahaa: Yuusuf Farey oo ka tirsanaa wasaaradda warfaafinta dowladda Soomaaliya iyo Abuukar Kadaf oo ahaan jiray agaasimihii idaacadda Somaliweyn FM ee Muqdisho.

Ma jirto cid ay dowladdu u soo qabtay dilalka loo geystay wariyeyaashaas, iyadoo degmada Wadajir ay noqonayso degmo inta badan lagu ugaarsado wariyeyaasha ka howlgala Muqdisho, waxaana wariyihii ugu dambeeyay ee lagu dhaawaco degmadaas uu ahaa wariye C/qaadir Kuwaaral oo u shaqeynayay telefishinka Universal.

Guud ahaan 15 wariye ayaa sannadkan oo keliya lagu dilay dalka gudaha Somalia, waxaana intooda badan lagu dilay magaalada Muqdisho, kuwaasoo ay ku jireen saddex wariye oo bishii hore lagu dilay qarax ismiidaamin ah oo ka dhacay maqaahi ku dhow tiyaatarka Muqdisho.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
10/22/2012 4:22 PM EST
Isniin, October 22, 2012(HOL): Xerada 54-aad oo ah saldhigga ugu weyn ee ciidamada daraawiishta Puntland, kuna taal duleedka magaalada Garoowe, ayaa waxaa maanta tababar loogu soo xiray ciidamo dhowrkii bilood ee ugu danbeeyey uu halkaas tababar uga socdey.

10/22/2012 4:17 PM EST
Isniin, October 22, 2012(HOL): Xarunta wasaaradda xanaanada xoolaha Puntland ee Garoowe waxaa maanta ka dhacday munaasabad balaaran oo lagu sagootinayey dhakhaatiir loo kala diray gobolada, si ay xoolaha uga soo talaalaan cudurka sanbabka.

10/22/2012 11:20 AM EST
Isniin, Oktoobar 22, 2012 (HOL) -Hay’adda badmaaxayaasha Aduunka ee magaceeda loo soo gaabiyo IMB ayaa warbixin ay soo saartay ku sheegtay in uu hoos udhac baahsan ku yimid weerarradii ay fulin jireen kooxaha burcad badeedda Soomaalida

10/22/2012 10:47 AM EST
Isniin, Oktoobar 22, 2012 (HOL) - Wafdi kasocda hay’adda Qaramada Midoobay ayaa maanta gaaray magaalada Kismaayo iyadoona wafdiga uu socdaal kusoo maray qeybo katirsan magaalada Kismaayo.

10/22/2012 10:31 AM EST
Isniin, October, 22, 2012 (HOL)-Wasiirka Dib u dejinta Somaliland, Mr. Seleebaan Ciise (Xaglo toosiye), ayaa maanta si rasmi ah xilkii kala wareegay wasiirkii hore ee wasaaradaasi Mr;C/risaaq Cali Cismaan.

10/22/2012 10:30 AM EST
Isniin, Oktoobar, 22, 2012 (HOL) – Shirkada Xawaallada Ammaana oo maalmihii ugu danbeeyay ku howlaneyd sidii loo caawin lahaa dadka ku dhibaateysan xeryaha barkacayaasha magaalada Baladweyne ayaa maanta deeq lacageed gaarsiisay qoysas isugu jiray kuwii ku barakacay fatahaadii dhawaan ku dhuftay magaalada iyo qaar kale oo ay la soo darseen xaalado dhinaca nolasha ah.

10/22/2012 7:31 AM EST
Isniin, Oktoobar 22, 2012 (HOL) - Dhibaatooyin dhinaca nolosha ah ayaa laga soo sheegayaa degmada Luuq ee gobolka Gedo halkaasoo ay ku noolyihiin kumannaan qoys oo kasoo barakacay Abaaraha iyo dagaallada ka jira gobollada Gedo, Bay, Bakool iyo Jubada dhexe.

10/22/2012 3:34 AM EST
Isniin, Oktoobar 22, 2012 (HOL) — Hay’adaha nabad-sugidda Qaranka ayaa sheegtay in ammaanka magaalada Muqdisho la xaqiijiyay, iyadoo ay weli ka dhacayaan dilal iyo qaraxyo ay geysanayaan xoogag taabacsan Xarakada Al-shabaab oo sannadkii hore isaga baxay magaalada Muqdisho.

10/22/2012 3:24 AM EST
Isniin, Oktoobar 22, 2012 (HOL) — Ugu yaraan shan qof oo shacab ah ayaa ku dhaawacmay hoobiyeyaal xalay lagu garaacay degamada Afmadow ee gobolka Jubbada hoose, sidoo kale qaraxyo aan la ogeyn khasaaraha ay geysteen ayaa isla xalay ka dhacay saldhig ay ciidamada dowladdu ku leeyihiin magaalada Kismaayo.