6/28/2022
Today from Hiiraan Online:  _
Wararka Maanta- Isniin, Oct 1 , 2012
Ciidamada Soomaaliya iyo kuwa Kenya oo gudaha u galay Magaalada Kismaayo
Isniin, Oktoobar 01, 2012 (HOL) — Ciidamada dowladda Federaalka Soomaaliya, kuwa Raaskaambooni iyo Militariga Kenya oo isgarabsanaya ayaa goordhawayd gudaha u galay magaalada Kismaayo iyadoona ay ciidamadu magaalada kasoo galeen dhowr jiho.

Ciidamadan oo aan wadan wax gaadiid ah ayaa magaalada kusoo galay lug waxaana ay kasoo galeen jihooyinka waqooyi iyo Galbeed sida dhanka Madaxtooyada, dhinaca Xaafadda Siinaay iyo weliba xaafadda V-Afmadow.

“Ciidamadu dhulka ayay ku socdeen waxayna magaalada kasoo galeen sedex wado, dhanka V-afmadow, Dhanka Madaxtooyada iyo Siinaay,” sidaa waxa yiri C/xakiin C/laahi oo kamid ah dadka deegaanka.

Ciidamadan soo galay magaalada ayaa waxa dhanka hawada ka wehlinayay diyaarado nooca Helicopters-ka loo yaqaan, waxaana jawiga magaalada uu yahay mid aad u kacsan.

Xoogagga Al-shabaab ayaa ka baxay magaalada Kismaayo 28-Bishii lasoo dhaafay ee September kadib markii uu culeys kaga yimid dhanka ciidamada dowladda iyo kuwa Kenya ee isgarabsanaya.

Magaalada Kismaayo oo xarun u ah gobolka Jubada hoose ayaa ah magaalo uu aad u sareeyo ganasigeeda iyadoona ay magaaladu leedahay marsad caalami ah taasoo shixnadaha kasoo daga loo iibgeeyo gobollada Jubooyinka, Gedo iyo weliba gobolka Waqooyi bari ee dalka Kenya.

Dad badan ayaa walaac ka muujinaya waxa xigi doona qabsashada magaalada Kismaayo, maadaama ay gobolka ka jiraan maamul goboleedyo badan kuwaasoo ay soo dhisteen qaar katirsan beelaha dega Jubooyinka.

Xasan Nuur, Hiiraan Online
[email protected]
Kismaayo, Soomaaliya











Click here
10/1/2012 10:31 AM EST
Isniin, October, 01, 2012 (HOL)- Alla ha u naxariistee waxa xalay dalka Norway ku geeriyooday abwaankii caanka ahaa Maxamed Xaashi Dhaamac Gaariye oo billihii u dambeeyey ku xanuunsanayey dalkaasi.

10/1/2012 9:51 AM EST
Isniin, Oktoobar 01, 2012 (HOL) — Taliyaha hay'adda nabadsugidda gobolka Banaadir, Col. Axmed Ereg ayaa sheegay in ammaanka Muqdisho ay adkeeyeen kadidb markii ay howlgallo isdaba-joog ah ka sameeyeen degmooyinka gobolka Banaadir.

10/1/2012 8:21 AM EST
Isniin, Oktoobar 01, 2012 (HOL) — Kooxo bastoolado ku hubeysan ayaa goor-dhaw ku toogtay magaalada Baladweyne ee xarunta gobolka Hiiraan nabadoon caan ka ahaa Baladweyne.

10/1/2012 6:53 AM EST
Isniin, Oktoobar 01, 2012 (HOL) — Ciidamada dowladda KMG iyo kuwa Kenya ayaa maalintii sedexaad ku sugan daafaha magaalada Kismaayo, iyadoona ay arintaasi keentay in dhaqdhaqaaqii ganacsi ee magaalada Kismaayo iyo deegaanada ku xeeran uu hakad galo.

10/1/2012 6:49 AM EST
Isniin, Oktoobar 01, 2012 (HOL) — Kaddib markii ay ciidamada dowladda Itoobiya iyo AMISOM ee ka socda dalka Jabuuti ka baxeen saldhigyadii ay ka daganaayeen magaalada Baladweyne, waxaa arintaa ka hadllay mas’uuliyiinta maamulka gobolka Hiiraan.

10/1/2012 4:17 AM EST
Isniin, Oktoobar 01, 2012 (HOL) — Afhayeenka baarlamaanka Soomaaliya, Maxamed Sheekh Cismaan Jawaari ayaa sheegay in ajnadaha ugu horreeya ee baarlamaanku uu ka doodi doono uu yahay dastuurka cusub ee Soomaaliya, isagoo sheegay inay dib u eegis ay ku sameyn doonaan qodobbada dastuurka oo dhan.

10/1/2012 3:36 AM EST
Isniin, Oktoobar 01, 2012 (HOL) — Kooxo hubeysan ayaa xalay ku dilay magaalada Gaarisa oo ah xarunta gobolka Waqooyi-bari ee dalka Kenya laba askari oo ka tirsan ciidamada ammaanka Kenya, iyagoo ay u suurogashay inay ka baxsadaan goobta markii ay dilka askarta fuliyeen.

10/1/2012 3:12 AM EST
Isniin, Oktoobar 01, 2012 (HOL) — Madaxweynaha Soomaaliya, Xasan Sheekh Maxamuud iyo wafdi uu hoggaaminayo oo xildhibaanno ah ayaa u dhoofay magaalada Baydhabo ee gobolka Bay halkaasoo ay maanta kulammo kula yeelanayana maamulka gobolka, kan degmada iyo saraakiisha ciidamada dowladda Soomaaliya, kuwa Itoobiya iyo AMISOM ee ka socda dalalka Uganda iyo Burundi.