3/28/2024
Today from Hiiraan Online:  _
Wararka Maanta- Arbaco, May 30, 2012
MSF oo soo Dhaweysay Xukunkii lagu riday Ruux horay Muqdisho ugu dilay laba ka mid ah Shaqaalaheeda Ajnabiga ah

Arbaco, May 30, 2012 (HOL) — Hay'adda dhakhaatiirta aan xuduudda lahayn ee MSF ayaa sheegtay in lagu wargeliyay in Axmad Salaad Farey oo ah shaqaala hore oo MSF ka tirsanaa lagu helay dambi ah ah dilka laba ka mid ah shaqalaheena oo kala ahaa, Dr Karel Keiluhu oo loo yaqaana Kace iyo Phillipe Havet 29-kii December 2011, xilli ay labadan shaqaalaha ah ku jireen howlahooda iyadoo Axmad 30-sano o xabsi ah lagu xukumay.

Hay'adda MSF ayaa waxay ku sheegtay warsaxaafadeed ay soo saartay maanta oo Arbaco ah inaysan ka qaybqaadan dacwadda wax cadaadis ahna aysan saarin nidaamka sharciga ah ee dacwadan.

"Waxaan raalli ku nahay cadaaladda dhacday... maadaama tan ay tahay qayb ka mid ah samirka qoysaska iyo asxaabta saaxiibadood la dilay. Hay'adda MSF waxay cambaareyneysaa dhammaan rabshadaha ama hanjabaadaha ka dhan ah shaqaalaheeda," ayaa lagu yiri warka ay soo saartay MSF.

Sidoo kale, warbixinta hay'adda ayaa lagu yiri: "Kaddib dilalkaas MSF waxay ku qasabtay xaaladdaas inay soo afjarto dhammaan howlihii ay ka waday degmada Hodan ee gobolka Banaadir, iyadoo ay ka mid yihiin xiridda laba xarumood oo leh 120-sariir kuwaasoo lagu daweyn jiray nafaqa-darada, jadeecada iyo shubanka."

Hay'adda waxay sidoo kale sheegtay in ka hor intii aan la xirin xarumahaas ay caawin jireen illaa 200,000-qof oo Soomaali ah oo kuwaasoo kasoo cararay dagaallada deggenaana degmada Hodan.

"Xaaladda amaanka oo sii xumaaneysay awadeed MSF waxaa ay xirtay qaar ka mid ah mashruucyadii ay Soomaaliya kawadday waxayna dalka ka saartay shaqaalaha caalamiga ah," ayaa lagu yiri warsaxaafadeedka MSF ay soo saartay.

Dhanka kale, hay'addu waxay sheegtay in bishii Oktobar sanadkii 2011, laba ka mid ah shaqaalaha MSF, Montserrat Serra iyo Blanca Thiebaut lagu afduubay xeryaha qaxootiga ee Dhadhaab oo ku taalla Woqooyiga Kenya iyagoo Soomaalida halkaa ku sugan siinaya gargaar deg-deg ah. Illaa hadda waa la haystaa. MSF waxay si KMG ah u joojisay furidda mashruuc cusub oo aan deg-deg ahayn illaa gabdhahaas laga sii daynaya.

Ugu dambeyn, MSF waxay ugu yeereysaa dhammaan Soomaalida; jaaliyadaha, madaxda bulshada iyo gaar ahaan maamullada ka taliya goobaha shaqaalaheeda afduuban lagu haysto inay sameeyaan wax walbo oo ay awoodaan si gabdhahaas loogu soo siidaayo sida ugu dhakhsiya badan iyagoo bad-qaba iyo inay adkeeyaan ammaanka xarumaha caafimaad ee MSF iyo shaqalaheeda.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
5/30/2012 10:11 AM EST
Arbaco, May 30, 2012 (HOL) — Booliiska Kenya ayaa sheegay maanta oo Arbaco ah in afar askartooda ka tirsan lagu dhaawacay weerar gaadmo ah oo kooxo hubeysan ay shalay ku qaadeen kolonyo gaadiid ah oo ay ciidamadooda wateen xilli ay kasoo bas ay kooxo hubeysan ku weerareen Dhadhaab.

5/30/2012 9:55 AM EST
Arbaco, May 30, 2012 (HOL) — Xisbiga Nabadda iyo Horumarka oo ka mid ah xisbiyada siyaasadeed ee ka jira Soomaaliya ayaa warsaxaafadeed kasoo saaray shirka Istanbul II ee looga hadlayo mustaqbalka Soomaaliya, kaasoo lagu wado inay ka qaybgalaan dhinacyada siyaasadda Soomaaliya.

5/30/2012 9:25 AM EST
Arbaco, May 30, 2012 (HOL) — Madaxweynayaasha Puntland iyo Galmudug oo horay uga soo horjeestay ka qaybgalka shirka Istanbuul ee looga hadlayo arrimaha Soomaaliya ayaa sheegay inay ka qaybgalayaan iyadoo sheegay in la xalliyay khilaafkii sababay inay shirkaas ka qaybgalkiisa diidaan.

5/30/2012 9:23 AM EST
Arbaco, May 30, 2012 (HOL) — Waxaa maanta xiisado dagaal laga dareemayaa deegaanada hoostaga Degmada Afmadow ee gobolka Jubada Hoose, halkaasoo ay isku horfadhiyaan ciidamada dowladda KMG iyo kuwa Raaskaambooni oo kaashanaya Militariga Kenya iyo Xarakada Al-shabaab.

5/30/2012 6:44 AM EST
Xildhibaanada baarlamaanka ee taageersan Madoobe Nuunow Maxamed ayaa gaashaanka ku dhuftay go'aannadii kasoo baxay shirkii dhawaan ay saxiixayaasha Roadmapku ku yeesheen magaalada Addis ababa ee xarunta dalka Itoobiya.

5/30/2012 5:56 AM EST
Arbaco, May 30, 2012(HOL): Ra’iisul Wasaaraha Soomaaliya Dr. Cabdiweli Maxamed Cali Gaas iyo wefdi ballaaran oo uu hogaaminayo ayaa maanta gelinkii dambe soo gaaray magaalada Istanbul ee caasimadda labaad ee dalka Turkiga halkaasoo si diiran loogu soo dhoweeyey.

5/30/2012 4:04 AM EST
Arbaco, May, 30, 2012 (HOL) — Sida ay inoo xaqiijiyeen saraakiil ka tirsan maamulka gobollka Hiiraan waxaa dib u dhac ku yimid ciidamado ka socday dowladda Jabuuti oo lagu waday in ay maanta gaaraan magaalada Beledweyne ee xarunta gobolka Hiiraan.

5/30/2012 2:38 AM EST
Arbaco, May 30, 2012 (HOL) — Dowladda Kenya ayaa sheegtay in maraakiibteeda dagaalka ay duqeeyeen magaalada Kismaayo ee xarunta gobolka Jubbada Hoose oo ay ka taliso Xarakada Al-shabaab.

5/30/2012 2:26 AM EST
Arbaco, May 30, 2012 (HOL) — Madaxweynaha iyo madaxweyne ku xigeenka ku xigeenka maamulka Galmudug ayaa isku khilaafay ka qaybgalka shirka Istabuul II ee looga hadlayo mustaqbalka Soomaaliya.

5/30/2012 2:12 AM EST
Arbaco, May 30, 2012 (HOL) — Xarakada Al-shabaab ayaa sheegtay in weerarkii gaadmada ahaa ee shalay ay ku qaadeen gaadiid uu la socday madaxweynaha oo marayay inta u dhexeysa Muqdisho iyo Afgooye ay ku doonayeen inay ku dilaan madaxweynaha Soomaaliya, Sheekh Shariif Sheekh Axmed.

5/30/2012 1:44 AM EST
Arbaco, May 30, 2012 (HOL) — Ugu yaraan sideed qof oo u badan ciidamada ammaanka Puntland ayaa ku dhintay qarax miino oo saakay ka dhacay xaafadda Garsoor ee Waqooyiga magaalada Gaalkacyo ee gobolka Mudug.