3/29/2024
Today from Hiiraan Online:  _
Wararka Maanta- Arbaco, May 30, 2012
Ra’iisul Wasaaraha Soomaaliya iyo wefdi uu hogaaminayo oo Turkiga gaaray


Arbaco, May 30, 2012(HOL): Ra’iisul Wasaaraha Soomaaliya Dr. Cabdiweli Maxamed Cali Gaas iyo wefdi ballaaran oo uu hogaaminayo ayaa maanta gelinkii dambe soo gaaray magaalada Istanbul ee caasimadda labaad ee dalka Turkiga halkaasoo si diiran loogu soo dhoweeyey.

Ra’iisul Wasaaraha ayaa waxaa sidoo kale safarkiisa ku wehlinayay xubno ka tirsan golihiisa Wasiirada oo ay ka mid yihiin Wasiirka Dastuurka iyo Arrimaha Federaalka Avv. C/raxmaan Xoosh Jibriil, Wasiirka Qorsheynta iyo Iskaashiga Caalamiga ah Mudane C/llaahi Goodax Barre, Wasiirka Warfaafinta Boostada iyo Isgaarsiinta Mudane C/qaadir Maxamed Xuseen Jaahweyn, Wasiir kuxigeenka gaadiidka Cirka, Dhulka Badda iyo dekeddaha Mudane C/raxmaan Dheere iyo sidoo kale marwada R.wasaaraha Drs. Hodan Ciise.

Sidoo kale, Ra’iisul Wasaaraha ayaa waxaa safarkiisa ku wehelinay wakiilka xoghayaha guud ee Q/midoobay Amb. Augustine Mahiga.

Ra’iisul Wasaare Dr. C/weli Maxamed Cali ayaa waxaa garoonka ku soo dhoweeyey madax ka tirsan dowladda Turkiga, Siihayaha safaaradda Soomaaliya Amb. Nuur Sheekh Cali Xaamud, Safiirka Turkiga u fadhiya Soomaaliya Kamalutin Kani Turum, Wasiir kuxigeenka Arrimaha Gudaha iyo Amniga Qaranka Mudane C/xakiin Cige Guuled, guddoomiyaha Jaaliyadda Soomaaliyeed ee Istanbul Mudane Maxamed Xoosh iyo xubno kale kale.


Ra’iisul Wasaaraha ayaa la dejiyay Hotelka Caalamiga ah ee Conrad halkaasoo uu horay u sii deganaa guddoomiyaha Baarlamaanka Shariif Xasan Sh. Aadan oo haatan howlo shaqo u jooga magaalada Ankara ee caasimadda dalkan.

Dhinaca kale, madaxweynaha Dowladda Soomaaliya Mudane Sh. Shariif Sh. Axmed iyo wefdi ballaaran oo uu hogaaminayo ayaa la filayaa in maalinta berri ah May 30, 2012 uu soo gaaro magaalada Istanbul si ay uga wada qeybgalaan madaxdu shirka dhowaan ka furmaya Istanbul ee caalamiga ah kaasoo diirada lagu saari doono arrimaha Soomaaliya.

Ugu dambeyntiina shirkii odayaasha dhaqanka iyo qeybaha kala duwan ee Bulshada Rayidka uga soconayay Hotelka Dedeman ee magaalada Istanbul ayaa galay maalintiisii saddexaad iyada oo weli ay u shirayaan afar kooxood oo ka hadlaya Siyaasada, Dhaqaalaha, Arrimaha Bulshada iyo Amniga, waxaana la filayaa in shirkan maalinta berri ah la soo gabagabeeyo si loogu gudbo wejiga labaad ee shirka ee madaxda dowladda iyo beesha Caalamka.



Garaad Salaad Xirsi
Istanbul, Turkey
[email protected]













Click here
5/30/2012 10:35 AM EST
Arbaco, May 30, 2012 (HOL) — Hay'adda dhakhaatiirta aan xuduudda lahayn ee MSF ayaa sheegtay in lagu wargeliyay in Axmad Salaad Farey oo ah shaqaala hore oo MSF ka tirsanaa lagu helay dambi ah ah dilka laba ka mid ah shaqalaheena oo kala ahaa, Dr Karel Keiluhu oo loo yaqaana Kace iyo Phillipe Havet 29-kii December 2011, xilli ay labadan shaqaalaha ah ku jireen howlahooda iyadoo Axmad 30-sano o xabsi ah lagu xukumay.

5/30/2012 10:11 AM EST
Arbaco, May 30, 2012 (HOL) — Booliiska Kenya ayaa sheegay maanta oo Arbaco ah in afar askartooda ka tirsan lagu dhaawacay weerar gaadmo ah oo kooxo hubeysan ay shalay ku qaadeen kolonyo gaadiid ah oo ay ciidamadooda wateen xilli ay kasoo bas ay kooxo hubeysan ku weerareen Dhadhaab.

5/30/2012 9:55 AM EST
Arbaco, May 30, 2012 (HOL) — Xisbiga Nabadda iyo Horumarka oo ka mid ah xisbiyada siyaasadeed ee ka jira Soomaaliya ayaa warsaxaafadeed kasoo saaray shirka Istanbul II ee looga hadlayo mustaqbalka Soomaaliya, kaasoo lagu wado inay ka qaybgalaan dhinacyada siyaasadda Soomaaliya.

5/30/2012 9:25 AM EST
Arbaco, May 30, 2012 (HOL) — Madaxweynayaasha Puntland iyo Galmudug oo horay uga soo horjeestay ka qaybgalka shirka Istanbuul ee looga hadlayo arrimaha Soomaaliya ayaa sheegay inay ka qaybgalayaan iyadoo sheegay in la xalliyay khilaafkii sababay inay shirkaas ka qaybgalkiisa diidaan.

5/30/2012 9:23 AM EST
Arbaco, May 30, 2012 (HOL) — Waxaa maanta xiisado dagaal laga dareemayaa deegaanada hoostaga Degmada Afmadow ee gobolka Jubada Hoose, halkaasoo ay isku horfadhiyaan ciidamada dowladda KMG iyo kuwa Raaskaambooni oo kaashanaya Militariga Kenya iyo Xarakada Al-shabaab.

5/30/2012 6:44 AM EST
Xildhibaanada baarlamaanka ee taageersan Madoobe Nuunow Maxamed ayaa gaashaanka ku dhuftay go'aannadii kasoo baxay shirkii dhawaan ay saxiixayaasha Roadmapku ku yeesheen magaalada Addis ababa ee xarunta dalka Itoobiya.

5/30/2012 4:04 AM EST
Arbaco, May, 30, 2012 (HOL) — Sida ay inoo xaqiijiyeen saraakiil ka tirsan maamulka gobollka Hiiraan waxaa dib u dhac ku yimid ciidamado ka socday dowladda Jabuuti oo lagu waday in ay maanta gaaraan magaalada Beledweyne ee xarunta gobolka Hiiraan.

5/30/2012 2:38 AM EST
Arbaco, May 30, 2012 (HOL) — Dowladda Kenya ayaa sheegtay in maraakiibteeda dagaalka ay duqeeyeen magaalada Kismaayo ee xarunta gobolka Jubbada Hoose oo ay ka taliso Xarakada Al-shabaab.

5/30/2012 2:26 AM EST
Arbaco, May 30, 2012 (HOL) — Madaxweynaha iyo madaxweyne ku xigeenka ku xigeenka maamulka Galmudug ayaa isku khilaafay ka qaybgalka shirka Istabuul II ee looga hadlayo mustaqbalka Soomaaliya.

5/30/2012 2:12 AM EST
Arbaco, May 30, 2012 (HOL) — Xarakada Al-shabaab ayaa sheegtay in weerarkii gaadmada ahaa ee shalay ay ku qaadeen gaadiid uu la socday madaxweynaha oo marayay inta u dhexeysa Muqdisho iyo Afgooye ay ku doonayeen inay ku dilaan madaxweynaha Soomaaliya, Sheekh Shariif Sheekh Axmed.

5/30/2012 1:44 AM EST
Arbaco, May 30, 2012 (HOL) — Ugu yaraan sideed qof oo u badan ciidamada ammaanka Puntland ayaa ku dhintay qarax miino oo saakay ka dhacay xaafadda Garsoor ee Waqooyiga magaalada Gaalkacyo ee gobolka Mudug.