11/19/2018
Today from Hiiraan Online:  _
Wararka Maanta- Arbaco, May 30, 2012
Qarax khasaare badan geystay oo saakay ka dhacay Waqooyiga Degmada Gaalkacyo ee Gobolka Mudug


Arbaco, May 30, 2012 (HOL) — Ugu yaraan sideed qof oo u badan ciidamada ammaanka Puntland ayaa ku dhintay qarax miino oo saakay ka dhacay xaafadda Garsoor ee Waqooyiga magaalada Gaalkacyo ee gobolka Mudug.

Qaraxan oo ahaa miino dhulka lagu aasay ayaa waxay si lama filaan ah ula qaraxday ciidammo ka tirsan kuwa Puntland oo doonaya inay halkaas ka saaraan, iyadoo lix askari iyo qof rayid ah ay goobta ku dhinteen, waxaana markaas kaddib ay ciidammadu toogteen qof ay ku sheegeen inuu miinada aasay.

"Ciidamada ammaanka oo doonayay inay goobta ka saaraan miino lagu aasay ayaa waxay u qaraxday si lama filaan ah, waxaa dhintay lix askari iyo qof rayid ah, sidoo kale ciidamadu waxay toogteen qof ay ku sheegeen inuu miinada aasay," ayuu yiri goobjooge ka dhawaa halka uu qaraxu ka dhacay.

Saraakiisha maamulka Puntland ee gobolka Mudug ayaa sheegay in khasaaraha ka dhashay qaraxa uu yahay mid badan, balse ma aysan sheegin lambar sugan, sidoo kale waxaa ku dhaawacmay qaraxaas sideed qof oo kale oo ay ku jiraan ciidamadii halkaas gaaray.

Ma jirto cid sheegatay inay mas'uul ka tahay weerarkan, iyadoo dhaawacyada la dhigay isbitaalka weyn ee Gaalkacyo, waxaana qaraxan uu noqonayaa kii ugu khasaaraha badnaa ee ka dhaca Waqooyiga Gaalkacyo bilihii ugu dambeeyay.

Xaaladda xaafadda Garsoor ayaa aad u kacsan, iyadoo ganacsiga, socodka dadka iyo midka gaadiidkaba uu hakad ku jiro, waxaana xaafaddaas baaritaanno kawada ciidamada maamulka Puntland.

Degmada Gaalkacyo ee xarunta gobolka Mudug ayaa waxaa ka dhacayay qaraxyo ay waxyeello kasoo gaartay dad shacab ah iyo ciidamada maamullada halkaas ka jira, waxaana qaraxyada intooda badan ka dhaceen Waqooyiga degmadaas oo ay Puntland ka taliso.

Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
5/30/2012 10:35 AM EST
Arbaco, May 30, 2012 (HOL) — Hay'adda dhakhaatiirta aan xuduudda lahayn ee MSF ayaa sheegtay in lagu wargeliyay in Axmad Salaad Farey oo ah shaqaala hore oo MSF ka tirsanaa lagu helay dambi ah ah dilka laba ka mid ah shaqalaheena oo kala ahaa, Dr Karel Keiluhu oo loo yaqaana Kace iyo Phillipe Havet 29-kii December 2011, xilli ay labadan shaqaalaha ah ku jireen howlahooda iyadoo Axmad 30-sano o xabsi ah lagu xukumay.

5/30/2012 10:11 AM EST
Arbaco, May 30, 2012 (HOL) — Booliiska Kenya ayaa sheegay maanta oo Arbaco ah in afar askartooda ka tirsan lagu dhaawacay weerar gaadmo ah oo kooxo hubeysan ay shalay ku qaadeen kolonyo gaadiid ah oo ay ciidamadooda wateen xilli ay kasoo bas ay kooxo hubeysan ku weerareen Dhadhaab.

5/30/2012 9:55 AM EST
Arbaco, May 30, 2012 (HOL) — Xisbiga Nabadda iyo Horumarka oo ka mid ah xisbiyada siyaasadeed ee ka jira Soomaaliya ayaa warsaxaafadeed kasoo saaray shirka Istanbul II ee looga hadlayo mustaqbalka Soomaaliya, kaasoo lagu wado inay ka qaybgalaan dhinacyada siyaasadda Soomaaliya.

5/30/2012 9:25 AM EST
Arbaco, May 30, 2012 (HOL) — Madaxweynayaasha Puntland iyo Galmudug oo horay uga soo horjeestay ka qaybgalka shirka Istanbuul ee looga hadlayo arrimaha Soomaaliya ayaa sheegay inay ka qaybgalayaan iyadoo sheegay in la xalliyay khilaafkii sababay inay shirkaas ka qaybgalkiisa diidaan.

5/30/2012 9:23 AM EST
Arbaco, May 30, 2012 (HOL) — Waxaa maanta xiisado dagaal laga dareemayaa deegaanada hoostaga Degmada Afmadow ee gobolka Jubada Hoose, halkaasoo ay isku horfadhiyaan ciidamada dowladda KMG iyo kuwa Raaskaambooni oo kaashanaya Militariga Kenya iyo Xarakada Al-shabaab.

5/30/2012 6:44 AM EST
Xildhibaanada baarlamaanka ee taageersan Madoobe Nuunow Maxamed ayaa gaashaanka ku dhuftay go'aannadii kasoo baxay shirkii dhawaan ay saxiixayaasha Roadmapku ku yeesheen magaalada Addis ababa ee xarunta dalka Itoobiya.

5/30/2012 5:56 AM EST
Arbaco, May 30, 2012(HOL): Ra’iisul Wasaaraha Soomaaliya Dr. Cabdiweli Maxamed Cali Gaas iyo wefdi ballaaran oo uu hogaaminayo ayaa maanta gelinkii dambe soo gaaray magaalada Istanbul ee caasimadda labaad ee dalka Turkiga halkaasoo si diiran loogu soo dhoweeyey.

5/30/2012 4:04 AM EST
Arbaco, May, 30, 2012 (HOL) — Sida ay inoo xaqiijiyeen saraakiil ka tirsan maamulka gobollka Hiiraan waxaa dib u dhac ku yimid ciidamado ka socday dowladda Jabuuti oo lagu waday in ay maanta gaaraan magaalada Beledweyne ee xarunta gobolka Hiiraan.

5/30/2012 2:38 AM EST
Arbaco, May 30, 2012 (HOL) — Dowladda Kenya ayaa sheegtay in maraakiibteeda dagaalka ay duqeeyeen magaalada Kismaayo ee xarunta gobolka Jubbada Hoose oo ay ka taliso Xarakada Al-shabaab.

5/30/2012 2:26 AM EST
Arbaco, May 30, 2012 (HOL) — Madaxweynaha iyo madaxweyne ku xigeenka ku xigeenka maamulka Galmudug ayaa isku khilaafay ka qaybgalka shirka Istabuul II ee looga hadlayo mustaqbalka Soomaaliya.

5/30/2012 2:12 AM EST
Arbaco, May 30, 2012 (HOL) — Xarakada Al-shabaab ayaa sheegtay in weerarkii gaadmada ahaa ee shalay ay ku qaadeen gaadiid uu la socday madaxweynaha oo marayay inta u dhexeysa Muqdisho iyo Afgooye ay ku doonayeen inay ku dilaan madaxweynaha Soomaaliya, Sheekh Shariif Sheekh Axmed.