9/21/2018
Today from Hiiraan Online:  _
Wararka Maanta- Talaado, May 29, 2012
Madaxweynaha Soomaaliya oo Booqday Degmada Afgooye Iyadoo gaadiidkii uu watay lagu weeraray Duleedka Muqdisho


Talaado, May 29, 2012 (HOL) — Madaxweynaha Soomaaliya, Sheekh Shariif Sheekh Axmed iyo wafdi uu hoggaaminayo ayaa maanta booqasho ku tagay degmada Afgooye ee gobolka Shabeellada hoose oo ciidamada DKMG ah iyo kuwa AMISOM ay kala wareegeen Jimcihii Al-shabaab, inkastoo markii ay Afgooye kasoo laabteen ay kula kulmeen inta u dhexeysa Ceelasha iyo Calamada weerar ay kusoo qaadeen xoogag taabacsan Al-shabaab.

Wafdiga madaxweynaha Soomaaliya la socday ayaa waxay isug jireen wasiirro, xildhibaanno iyo saraakiil ciidan oo isugu jira kuwa dowladda iyo kuwa AMISOM ayaa waxay mareen waddada dheer ee isku xirta Muqdisho iyo Afgooye.

Madaxweynaha ayaa markii uu gaaray deegaanka Ceelasha-biyaha wuxuu ka dagay gaadiidkii uu la socday, isagoo la hadlay dad shacab ah oo ku suganaa halkaas una sheegay dadkaas haddii ay ciidamadu dhibaateeyaan inay ku dacweeyaan saraakiisha hoggaaminaya.

Sidoo kale, wuxuu madaxweynuhu ku hakaday deegaannada Calamada, Lafoole iyo Xaawo Cabdi oo u dhexeeya Afgooye iyo Muqdisho, isagoo halkaasna kula hadlay dad aad u yar oo ku sugan, kuwaasoo uu ka codsaday inay ciidamada ka gacan siiyaan sidii ammaanka loo adkeyn lahaa, wuxuuna intaas kaddib u gudbay degmada Afgooye.

Madaxweynaha iyo wafdigiisa ayaa waxaa Afgooye kusoo dhaweeyay saraakiisha ciidamada dowladda iyo kuwa AMISOM, iyadoo ammaanka degmada la adkeeyay ayna ciidamada dowladdu joojiyeen isku socodka dadka iyo gaadiidka.

Ugu dambeyn, madaxweynuhu wuxuu tagay beerta Sheekh Zayid halkaasoo uu kula hadlay odayaasha iyo dadka deegaanka, waxaana sidoo kale goobta ka hadlay saraakiisha horkacaya ciidamada DKMG ah iyo kuwa AMISOM iyagoo sheegay inay sii wadayaan howgallada lagu adkeynayo ammaanka degmada Afgooye iyo deegaannada kale.

"Aad ayaan ugu faraxsanahay inaan booqsho ku imaado degmada Afgooye oo ay ii gu dambeysay sannadkii 2006," ayuu yiri Sheekh Shariif Sheekh Axmed oo hadal kooban saxaafadda siiyay, isagoo intaas ku daray in geed weyn oo hoostiisa uu ku qabanayay shirka jaraa'id oo u ku yaalla beerta Sheekh Zaayid uu sheegay inay ugu dambeysay inuu ka hadlo intii uu ahaa guddoomiyihii Maxkamadihii Islaamka. 

Booqashadan ayaa waxay noqonaysaa tii ugu horreysay oo madaxweynaha Somalia uu ku tago degmo ay ciidamada dowladda kala wareegeen xoogagga Al-shabaab, iyadoo degmooyinkii hore, sida Baladweyne iyo Baydhabo ay booqasho ku tageen ra'iisul wasaaraha iyo guddoomiyaha baarlamaanka.

Madaxweynaha iyo wafdigiisa ayaa markii ay kasoo laabteen degmada Afgooye waxaa gaadiidkii ay wateen lagu weeraray inta u dhexeysa deegaannada Calamada iyo Ceelasha biyaha, waxaana qarxay dagaal socday muddo kooban, iyadoo la xaqiijiyay inuu ku dhintay hal qof, ayna ku dhaawacmeen toddoba qof oo u ku jiray mas'uul ka tirsan ururka Ahlusunna oo lagu magacaabo Maxamed Xuseen Awliyo.

Saraakiisha dowladda ee la socday wafdiga ayaa waxay sheegeen in kooxda soo weerartay ay ahaayeen Al-shabaab ayna ka qabteen afar qof oo nool, iyagoo sheegay in ciidamadooda iyo kuwa AMISOM ay ka guuleysteen kooxdaas weerarka kusoo qaaday.

Dhanka kale, degmada Afgooye ayaa waxaa ka socda maalintii labaad baaritaanno ay ciidamada DKMG ah sameynayaan, kuwaasoo ay sheegeen inay ku raadinayaan dad ay sheegeen inay xiriir la leeyihiin Al-shabaab, kuwaasoo ay ku galayaan guri walba.

Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
5/29/2012 6:34 PM EST
Istanbul, May 29, 2012-----Ra’iisul Wasaaraha Soomaaliya Dr. Cabdiweli Maxamed Cali Gaas iyo wefdi ballaaran oo uu hogaaminayo ayaa maanta gelinkii dambe soo gaaray magaalada Istanbul ee caasimadda labaad ee dalka Turkiga halkaasoo si diiran loogu soo dhoweeyey.

5/29/2012 3:46 PM EST
Talaado, May 29, 2012(HOL):Maraakiibtii dagaal ee ku sugnayd xeebta magaalada Kismaayo ayaa caawa markale duqeymo ka bilowday magaalada, iyadoona gantaalada ay maraakiibta tuurayaan ay ku dhacayaan xaafadaha kala duwan ee degmada Kismaayo.

5/29/2012 9:21 AM EST
Talaado, May 29, 2012 (HOL) — Waxaa lagu wadaa in maalinta bari ah soo gaaraan magaalada Beledweyne ciidamo ka socda dowladda dalka Jabuuti, kuwaasoo qeyb ka ah howlgalka AMISOM ee dalka Soomaaliya.

5/29/2012 9:13 AM EST
Waxaa May 26 - 28, 2012 ka furmey magaalada Blaine ee Gobolka Minnesota USA koobka lagu magacaabo National Sports Center Cup ( NSC Cup) . Koobkan oo ah kii 20-aad ee Midwest's premier Memorial Day tournament gaar ahaan kubadda Cagta ( NSC Cup Soccer Tournament ) ayaa inta badan waxaa Tartan ku dhexmaraa Iskuuladda isugu soo hara ama soo gaara Cayaaraha kama danbeysta ah (Semi-Finals) .

5/29/2012 9:02 AM EST
Talaado, May 29, 2012 (HOL) — Maxkamadda sare ee somaliland, ayaa maanta go’aan ka gaadhay khilaafkii u dhexeeyey labadda garab ee xisbiga mucaaradka ah ee UDUB u kala jabay,waxaanay ayideen go’aankii guddidda diiwaangelinta ururadda Siyaasaddu ka soo saareen laba liis oo labadda garab u soo kala gudbiyeen, iyagoo qaatay liiska garabka uu hogaaminayo gudoomiyaha xisbiga UDUB Mr:Daahir Rayaale Kaahin.

5/29/2012 8:11 AM EST
Talaado, May 29, 2012 (HOL) — Labadan ruux oo midkood uu mayd ahaa ayaa lagu soo bandhigay gudaha suuqa Bakaaraha ee magaalada Muqdisho iyadoo saraakiisha dowladda ee halkaas ka hadlay ay sheegeen in midka maydka ah uu isku dayay inuu baxsado ciidamaduna ay toogteen.

5/29/2012 7:13 AM EST
Talaado, May 29, 2012 (HOL) — Faahfaahin dheerad ah ayaa kasoo baxeyso khasaaraha ka dhashay duqeyntii saaka ay maraakiibta dagaal ka geysteen magaalada Kismaayo ee xarunta Gobolka Jubada Hoose.

5/29/2012 7:02 AM EST
Talaado, May 29, 2012 (HOL) — Maxkamadda gobolka Banaadir ayaa maanta ku ridday xukunno isugu jira dil toogasho ah iyo xabsi u dhexeeya hal sano illaa shan sano, eedeysanayaan dambiyo kala duwan loo haystay.

5/29/2012 6:24 AM EST
Talaado, May 29, 2012(HOL): Shirkii odayaasha dhaqanka iyo ururada Bulshada Rayidka ah ayaa si habsami leh uga soconaya magaalada Istanbuul ee dalka Turkiga halkaasoo ay ku shirsan yihiin ku dhowaad 400 oo ergooyin kala matalaya qeybaha Bulshada Rayidka, Qurba joogta, Odayaasha dhaqanka, Culimaa’udiinka, waxgaradka iyo dowladda KMG ah ee Soomaaliya.

5/29/2012 3:18 AM EST
Talaado, May 29, 2012 (HOL) — Dowladda Soomaaliya iyo Xarakada Al-shabaab ayaa guulo ka kala sheegtay weerarro ka dhacay inta u dhexeysa Muqdisho iyo Afgooye, halkaasoo ay maalmo ka hor ciidamada dowladdu iyo kuwa AMISOM kula wareegeen dagaal saddex maalmood socday.

5/29/2012 3:00 AM EST
Talaado, May 29, 2012 (HOL) — Booliiska Denmark ayaa sheegay inay xireen laba qof oo Soomaali ah, kuwaasoo haysata dhalashada dalkooda, kuwaasoo ay ku eedeeyeen inay qorsheynayeen qaraxyo argagaxiso oo ay dalkaas ka geystaan.

5/29/2012 2:35 AM EST
Talaado, May 29, 2012 (HOL) — Maraakiib nooca dagaalka oo aan ilaa imika la garaneyn cida iska leh ayaa saaka duqeymo ba'an ku wada Magaalada Kismaayo ee xarunta gobolka Jubada Hoose, iyadoona duqeymahaasi ay sababeen qasaarooyin lixaad leh.

5/29/2012 2:26 AM EST
Talaado, May 29, 2012 (HOL) — Ra'iisul wasaaraha dalka Kenya, Raila Odinga oo ka hadlay qaraxii shalay ka dhacay magaalada Nairobi ee dhaawacay 35-ka qof ayaa sheegay inuu ahaa mid ka dhashay weerar bambaano oo Kenya lagu soo qaaday.