9/26/2018
Today from Hiiraan Online:  _
Wararka Maanta- Isniin, Jun 4 , 2012
Dhaqdhaqaaq iyo Abaabul Ciidan oo laga Dareemayo Magaalada Kismaayo ee Xarunta Gobolka Jubbada Hoose


Isniin, June 04, 2012 (HOL) — Iyadoo dhawaan ciidamada DKMG, kuwa Kenya iyo xoogagga Raaskambooni oo is-garabsanaya ay la wareegeen degmada Afmadow ee gobolka Jubada Hoose ayaa waxa dhaqdhaqaaqyo ciidan iyo abaabullo dagaal laga dareemayaa magaalada Kismaayo ee xarunta gobolka Jubada Hoose.

Goobjooge ku sugan Magaalada Kismaayo oo magaciisa ka gaabsaday ayaa HOL u sheegay in maalmihii ugu danbeeyay ay magaalada Kismaayo ka socdeen abaabullo ciidan oo aad u xooggan oo gurmad loogu dirayo dagaalyahannada Al-shabaab ee difaaca kaga jira duleedka Afmadow, isagoona intaa ku daray in gudaha magaalada laga furay goobo lagu diiwaangelinayo dadka doonaya in ay ka qeybqaataan dagaallada lagu difaacayo magaalada Kismaayo ee xarunta gobolka Jubada Hoose.

Sidoo kale waxaa magaalada kusoo qulqulaya gurmadyo ciidan oo ka kala yimid degmooyinka kala duwan ee Jubooyinka iyo qeybo katirsan gobollada dalka, iyadoona ciidamadaasi loo qaaday dhanka Degmada Afmadow, waxaana xoogagga Al-shabaab ay qorsheynayaan weerar xooggan oo ay ku qaadaan magaalada Afmadow ee dhawaan ka baxday gacantooda.

"Dhaqdhaqaaqyada siweyn ayaa looga dareemayaa magaalada, Masaajidda waaweyn ee magaaladana waxa ka istaagto culumo dadka ugu baaqeeysa Jihaad," ayuu goobjooguhu hadalkiisii raaciyay.

Guddoomiyaha dhaqdhaqaaqa Raaskaambooni Sheekh Axmed Max'ed Islaam (Axmed Madoobe) oo shalay wareysi siiyay laanta Af-Soomaaliga ee BBC-da ayaa sheegay in aysan ku ekaan doonin magaalada Afmadow, balse ay qorsheynayaan duulaan ay ku qaadaan degmooyinka kale ee gobollada Jubooyinka.

Xaaaladda gobolka Jubada Hoose ayaa aad u kacsan, waxaana suuragal ah in xilli walba uu qarxo dagaal dhexmara dhinacyada isku haya gobolka, waxaana dagaalyahannada Al-shabaab ay ciidamo fara badan ku soo daadgureeyeen gobollada Jubooyinka, iyadoona ay ka go'antahay in ay difaacdaan magaalada Dekedda leh ee Kismaayo, oo dhinacyada Al-shabaab kasoo horjeeda ay u hanqaltaagayaan sidii ay gacanta ugu dhigi lahaayeen.

Xasan Nuur, Hiiraan Online
[email protected]
Kismaayo, Soomaaliya







Click here
6/4/2012 7:19 AM EST
Isniin, June 04, 2012 (HOL) — Ururka Raaskaambooni ee ka barbar dagaalama ciidamada dowladda KMG ee Jubooyinka ayaa maanta maamul cusub kaga dhawaaqay degmada Afmadow ee gobolka Jubada Hoose, iyadoona la sheegay in maamulkani uu noqon doono mid KMG ah.

6/4/2012 7:12 AM EST
Isniin, June 04, 2012 (HOL) — Booliiska dalka Uganda ayaa sheegay inay gacanta ku dhigeen laba dagaalyahan oo ajnabi ah; kuwaasoo magcayadooda lagu sheegay, Axmed Khaalid oo 33-jir ah loona yaqaaan Martin Muller iyo Emrah Erdogan oo 24-jir ah loona yaqaan Alias Imraan Al-Kurdi.

6/4/2012 3:36 AM EST
Isniin, June 04, 2012 (HOL) — Ra'iisul wasaaraha Soomaaliya, C/weli Maxamed Cali oo u warramayay wakaaladda wararka Turkiga ee Anatolia isagoo dalkaas ku sugan ayaa sheegay in Turkiga iyo Soomaaliya ay yihiin laba dal oo shirko ah oo ay ka dhexeeyaan dano muhiim ah.

6/4/2012 3:15 AM EST
Isniin, June 04, 2012 (HOL) — Maxkamadda ciidamada xoogga DKMG Soomaaliya ayaa Axaddii shalay xafiis ka furatay deegaanka Ceelasha-biyaha ee duleedka Muqdisho, iyadoo ciidamada dowladda looga digay inay dadka shacab ah ee ku nool inta u dhexeysa Muqdisho iyo Afgooye ay dhibaateeyaan.

6/4/2012 3:05 AM EST
Isniin, June 04, 2012 (HOL) — Xarakada Al-shabaab oo dagaal kula jirta DKMG ah ayaa kasoo horjeesatay qodobbadii kasoo baxay shirkii magaalada Istanbuul lagu qabtay ee looga hadlayay arrimaha Soomaaliya, iyagoo ku tilmaamay qodobbadaas shir-qool loo maleegayo Soomaalida.

6/4/2012 3:02 AM EST
Isniin, June 04, 2012 (HOL) — Ugu yaraan afar qof ayaa ku dhintay tiro intaas ka badanna way ku dhaawacmeen kaddib weerar ay kooxo hubeysan ku qaadeen gaari ka amababaxay Gaalkacyo oo ku socday deegaanno kale oo gobolka Mudug ka tirsan.

6/4/2012 2:43 AM EST
Isniin, June 04, 2012 (HOL) — Saraakiisha hay’adaha Turkiga ee Muqdisho ka howl-gala ayaa sheegay inay kaalinta hore kaga jiraan dadaallada ay dowladda Turkigu ku doonayso inay ku samatabixiso magaalada Muqdisho oo muddo dheer dagaallo sokeeye kusoo jirtay, xilli ay hay’adaha UN-ku fariisimo ka sameysteen dalka Kenya oo ay daris yihiin Soomaaliya.

6/4/2012 2:39 AM EST
Isniin, June 04, 2012 (HOL) — Maxkamadda magaaladda Hargeysa ayaa xukuno kala duwan ku ridday shalay oo Axad ahayd masuuliyiin lagu eedeeyey inay lunsadeen deeq mucaawimo oo ku socotay dad masaakiin ah.

6/4/2012 2:38 AM EST
Isniin, June 04, 2012 (HOL) — Dagaallo culus oo dagaalyahannada Ahlusunna iyo kuwa Xarakada Al-shabaab ku dhexmaray deegaanno hoos taga degmada Ceelbuur ee gobolka Galgaduud ayaa waxaa guulo ka sheegatay Ahlusunna.