7/17/2019
Today from Hiiraan Online:  _
Wararka Maanta- Jimco, Jun 15, 2012
Xarakada Al-shabaab oo sheegtay inay dagaallo ka dhacay Gobolka Gedo ku dileen Ciidamo u dhashay dalka Sierra Leone


Jimco, June 15, 2012 (HOL) — Xarakada Al-shabaab ayaa sheegtay in dagaal ka dhacay gobolka Gedo ay ku dishay askar u dhalatay dalka Siiraaliyoon, kuwaasoo ay sheegeen in ay ka barbar dagaalamayeen ciidamada dowladda KMG ee ku sugan degmada Yurkud ee gobolka Gedo.

Afhayeenka dhanka howlgallada ee Al-shabaab Sheekh C/casiis Abuu Muscab oo ka hadlay warbaahinta ayaa sheegay in dagaalyahannooda ay ciidamo katirsan kuwa Siiraaliyoon ku dileen dagaal ka dhacay nawaaxiga degmada Yurkud ee gobolka Gedo.

Sheekh Abuu-Muscab ma uusan sheegin tirada askarta u dhalatay dalka Siiraaliyoon ee ay ku dileen dagaalkii shalay, haseyeeshee waxa uu sheegay in ciidamadaasi ay ku dileen dagaal shalay duleedka Yurkud kula galeen ciidamada dowladda KMG.

"Waxaan heynaa cadeyn aan ku cadeyneyno in Ciidamada aan dilnay ay u dhasheen dalka Siiraliyoon, aqonsiyadooda ayaan heynaa, waana soo bandhigi doonaa,"ayuu yiri Abuu Muscab.

Sheegashahada xarakada Al-shabaab ee ah in ay dileen askar u dhalatay dalka Siiraaliyoon ka sokow ilaa imika ma jiraan ilo madax banaan oo cadeynaya warkaasi, mana jiraan masuuliyiin katirsan dowladda Soomaaliya oo faahfaahin ka bixisay arrintaasi.

Dowladda Siiraaliyoon ayaa hore u ballan qaaday in ay dalka Soomaaliya u soo diri doonto ciidamo kamid noqda kuwa Nabad ilaalinta Midowga Afrika ee AMISOM, iyadoona dhawaan ay gobolka Gedo soo gaareen saraakiil katirsan kuwa Siiraaliyoon, kuwaasoo dib u laabtay kadib kulamo ay la qaateen masuuliyiinta dowladda KMG iyo kuwa Kenya ee ku sugan gobolka Gedo, waxaanse ilaa imika la cadeyn karin in gobolka Gedo ay ku suganyihiin askar ka socota dalka Siiraaliyoon.

Xasan Nuur, Hiiraan Online
[email protected]   
Kismaayo, Soomaaliya












Click here
6/15/2012 4:47 AM EST
Jimco, June 15, 2012 (HOL) — Wasaaradda arrimaha gudaha ee dalka Koonfur Afrika ayaa soo saartay bayaan ay ku sheegtay in 30-ka bishan June ay al-baabbada u xiri doonto xarun lagu qaabilo qaxootiga oo ku taalla Mitland ee magaalada Cape-town basle caddeysay in dadkii horey loo qaabilay loo samayn doono goobo kale oo lagu qaabilo.

6/15/2012 4:42 AM EST
Jimco, June 15, 2012 (HOL) — Guddoomiyihii hore ee baarlamaanka Soomaaliya Allaha u raxmadee, Sheekh Mukhtaar Maxamed Xuseen ayaa lagu wadaa in maanta lagu aaso Muqdisho, kaddib markii uu laba casho ka hor ku geeriyooday magaalada Nairobi ee dalka Kenya.

6/15/2012 4:39 AM EST
Jimco, June 15, 2012 (HOL) — Kooxo hubeysan ayaa xalay ku toogtay xaafadda Laba-dhagax ee degmada Wardhiigley wiil dhallinyaro ah oo magaciisa lagu soo gaabiyay, Cabdi Yare iyadoo aan la ogeyn sababta loo dilay wiilkaas.

6/15/2012 4:32 AM EST
Jimco, June 15, 2012 (HOL) — Kulan ballaadhan oo lagu qiimaynayo Abaaraha baahsan ee ka jira goboladda Awdal iyo Selel ayaa ka qabsoomay magaaladda Boorama ee gobolka Awdal, waxaana kulankaasi ka soo qaybgalay Salaadiin, cuqaal, Ganacsato, siyaasiyiinta ururada siyaasadda, Hay’adaha dawladda ee qaabilsan arrimaha aafooyinka iyo Dadweyne kale oo badan.

6/15/2012 4:28 AM EST
Jimco, June 15, 2012 (HOL) — Wararka aynu ka heleyno Dalka South Afrika ayaa sheegaya in kooxo hubeysan oo u dhashay dalkaasi ay xalay boob u geysteen ilaa 30 dukaan oo ay lahaayeen ganacsato u dhalatay dalalka Soomaaliya, Bangaladesh iyo Hindiya, iyadoona kooxahaasi ay qaateen gabi ahaan wixii yaallay Dukaamadaasi.