3/28/2024
Today from Hiiraan Online:  _
Wararka Maanta- Khamiis, July 5 , 2012
Hay'ad Samafal oo sheegtay in boqolaal kun oo qof ay khatar ugu jiraan cunno yaraan ku wajahan Soomaaliya
Khamiis, July 05, 2012 (HOL) — Hay'adaha Save the Children ayaa warbixin ay soo saartay maanta oo khamiis ah ku sheegtay in boqolaal kun oo Soomaali ay khatar ugu jiraan cunno yaraan ba'an oo Soomaaliya ku wajahan, kaddib markii ay yaraadeen roobabkii sannadkan di'i lahaa.

Digniintan ayaa qayb ka noqonayso digniino noocan oo kale oo ay bixiyeen qaar ka mid ah hay'adaha samafalka caalamiga ah oo ay ku jiraan kuwa Qarmaada Midoobay kuwaasoo sheegay in digniintooda ay ka dhalatay saadaalo la sameeyay.

"Sannadkii hore cunno la'aantii ka dhalatay abaarihii xumaa ee ku dhuftay Somalia waxay sababeen in qoysas badan ay deegaannadooda uga carareen," ayay tiri Sonia Zambakides oo ah madaxa barnaamijyada hay'adda badbaada caruurta ee Soomaaliya.

Hay'addu waxay sheegtay in roob yaraatii sannadkan ay sababeen in dalagii uu u soo go'i waayo sidii la rabay, tanina ay sabab u noqon karto in 1.4-milyan oo ku barakacay abaarihii sannadkii hore ay dib ugu soo kabsan waayaan.

Sidoo kale, hay'adaha gargaarka ayaa ugu baaqay beesha caalamka inay gacan ka geystaan sidii dhibaatada cunno yaraan ee ka taagan dalka geeska Afrika ku yaalla ee Soomaaliya.

"Waxaan u baahannahay in la qaado taallaabooyin looga hortagayo khatarta cunno yari ee ku wajahan Soomaaliya, sidoo kalena looga hortagayo in baahida dadkaas ay noqoto mid muddo socota," ayay tiri Zambakides.

Abaarihii sannadkii hore ku dhuftay Soomaaliya ayaa waxay saameyn ku yeesheen 10 milyan oo qof oo ku nool afar waddan oo Bariga Afrika ku yaalla, kuwaasoo ay ku jirto Soomaaliya.

Dalka Soomaaliya ayaa wuxuu noqday midkii ay saameyn xun ku yeelatay abaartii sannadkii hore sidoo kalena ay uga tagtay saameyn weli muuqata, iyadoo cabsida ugu weyn ee jirta ay tahay in dadkii ay abaaruhu horay u saameeyeen ay mar kale khatar wajahaan.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
7/5/2012 12:37 PM EST
Khamiis, July, 5 2012 (HOL)- Maktabada wareegta oo qayb ka ah carwada caalamiga ah ee buugaagta Hargeysa oo maalmaha soo socda lagu qaban doono magaaladda Hargeysa, ayaa safar ku tagay magaalada Boorama ee gobolka Awdal, waxaana soo dhoweyey ardayda jaamacadaha Boorame iyo Naadiga Akhriska gobolka Awdal ee Maskax-maal.

7/5/2012 8:17 AM EST
Khamiis, July 05, 2012 (HOL) — Dr. C/raxmaan Macallin Cabdullaahi (Baadiyoow) oo ka mid ah murashaxiinta u taagan xilka madaxnimo ee Soomaaliya oo Muqdisho dib ugu soo laabtay ayaa soo jeediyay in loo diyaar-garoobo tartan doorasho oo xalaal ah, xilli uu warbaahinta kula hadlayay garoonka diyaaradaha Muqdisho.

7/5/2012 8:16 AM EST
Khamiis, July 05, 2012 (HOL) — Wafdi uu horkacayay guddoomiyaha hay'adda CCD, Ciise Axmed Cumar oo ay ka mid ahaayeen fannaaniinta kooxda Qayla-dhaan sida Jooqle Shire Jaamac iyo, Cabdixakiim Ciise Guuleed (Farayare) ayaa maanta si weyn loogu soo dhaweeyay magaalada Muqdisho ee xarunta Soomaaliya.

7/5/2012 8:14 AM EST
Khamiis, July 05, 2012 (HOL) — Guddoomiye ku xigeenkii hore ee xisbiga KULMIYE C/raxmaan C/Qaadir oo jug ka soo gaadhay shirweynihii golaha dhexe ee xisbiga Taladda haya ee KULMIYE oo muddo xaalad caafimaad ku maqnaa dalka Ingiriiska ayaa dalka dib ugu soo laabtay, waxaana duleedka magaaladda Hargeysa kaga hor tagay boqolaal Dadweyne iyo gaadiid faro badan oo ku soo dhoweeyey magaaladdda Hargeysa.

7/5/2012 7:28 AM EST
Khamiis, July 05, 2012 (HOL) — Jen. Cali Caraaye Cosoble (Gacma-duulle) oo ka mid ah saraakiisha milateriga Soomaaliya ayaa sheegay in 3,000 oo dhallihyaro ah lagu qabtay howgallo ay ciidamada dowladda KMG ah ka sameeyeen Muqdisho, iyadoo 235 ka mid ah la sheegay in la ogaaday inay xiriir la leeyihiin Al-shabaab.

7/5/2012 6:52 AM EST
Khamiis, July 05, 2012 (HOL) — Wafdigan oo ka socda Hay'adda NRC islamarkaasina ay wehlinayeen wufuud ka socota dowladda Kenya ayaa magaalada Dhoobley kulan kula qaatay saraakiisha ciidamada dowladda KMG iyo kuwa ururka Raaskaambooni ee ka dagaalama gobollada Jubooyinka.

7/5/2012 4:02 AM EST
Khamiis, July 05, 2012 (HOL) — Madaxweynaha Soomaaliya, Sheekh Shariif Sheekh Axmed ayaa booqday xarunta shirkad lacago u daabacaysa Soomaaliya oo ku taalla dalka Suudaan, isagoo kulan la qaatay madaxa shirkaddaas daabacaadda sameysa.

7/5/2012 3:59 AM EST
Khamiis, July 05, 2012 (HOL) — Ciidamada dowladda KMG ah ayaa saakay howgallo ka billaabay degmooyin ka tirsan Muqdisho iyo deegaanka Ceelasha Biyaha oo ka mid ah deegaannada ku yaalla inta u dhexeysa Muqdisho iyo Afgooye.

7/5/2012 3:59 AM EST
Khamiis, July 05, 2012 (HOL) — Hal qof oo la sheegay inuu ahaa ruuxii aasayay ayaa ku dhintay miino xalay ka qaraxday degmada Yaaqshiid ee gobolka Banaadir, iyadoo maamulka degmadaas uu sheegay inaysan jirin cid kale oo waxyeello kasoo gaartay qaraxaas.