6/13/2021
Today from Hiiraan Online:  _
Wararka Maanta- Isniin, July 23, 2012
Ra'iisul wasaaraha DKMG ah ee Soomaaliya oo odayaasha dhaqanka ka dalbaday in la ilaaliyo Saamiga Haweenka


Isniin, July 23, 2012 (HOL) — Ra'iisul wasaaraha dowladda KMG ah ee Soomaaliya, Cabdiweli Maxamed Cali oo ay wehliyaan xubno ka tirsan golihiisa wasiirrada ayaa maanta ka qaybgalay kulan ay odayaasha dhaqanku ku lahaayeen Muqdisho, isagoo ku boorriyay inay sida ugu dhaqsiyaha badan kusoo xulaan ergooyinka laga sugayo.

Ra'iisul wasaaruhu wuxuu sheegay in shirka ansixinta dastuurka oo saddex jeer baaqday uu si rasmi ah u furmi doono 25-ka bishan oo ku beegan maalinta Arbacada ah ee soo socota.

Hadal uu ra'iisul wasaaruhu u jeediyay odayaasha dhaqanka ayuu kaga codsaday inay tixgeliyaan saamiga ay haweenku ku leeyihiin dowladda iyo ergada ansixinta dastuurka, isagoo sheegay in laga sugayo inay 30% xubnaha ay soo xulayaan ay noqdaan haween.

Kulanka ra'iisul wasaaraha Soomaaliya, xubno wasiirro ah iyo Mahiga ay la yeesheen maanta odayaasha dhaqanka Soomaaliyeed ayaa kusoo beegmaya iyadoo weli aan la xallin khilaafyo la sheegay inay ka taagan yihiin xulista ergooyinka, shirweynaha ansixinta dastuurkan uu u baaqday dhowr jeer.

Dhanka kale, guddiga farsamo ee soo xulista ergooyinka ansixinta dastuurka ayaa shaaciyay in 763 ergay ay u sameeyeen warqadihii aqoonsiga ayna dhameystiri doonaan inta harsan maanta iyo berri.

Mas'uuliyiinta guddigan oo shir jaraa'id ku qabtay dugsiga tababarka booliiska oo uu ka dhici doono shirka ansixinta dastuurka ayaa sheegay inay rajo wanaagsan ka qabaan in shir uu si kama dambeys ah u furmo Arbacada soo socota.

Maxamed Xaaji Xuseen, Hiiraan Online
[email protected]
Muqdisho, Soomaaliya











Click here
7/23/2012 2:21 PM EST
Isniin, July 23, 2012(HOL): Gudoomiyihii hore ee ururka SSC Saleebaan Ciise Axmed (Xagla-toosiye) ayaa maanta waxaa si heer sare ah loogu soo dhoweeyey magaala madaxda gobolka Cayn ee Buuhoodle. Xagla-toosiye oo dhowaan dalka dibadiisa kasoo laabtay wuxuu beryihii u danbeeyey ku sugnaa magaala madaxda Puntland ee Garoowe.

7/23/2012 9:52 AM EST
Isniin, July 23, 2012 (HOL) — Magaalada Gaalkacayo ee xarunta gobolka Mudug waxaa ka bilaabmay howgal balaaran oo ay ciidamada maamulka Puntland ku raad goobayaan kooxo la sheegay in ay Burcad-badeed yihiin, islamarkaana xiliyada qaar khal khal geliya ammaanka iyo xasiloonida guud ee gobolka.

7/23/2012 8:39 AM EST
Isniin, July 23, 2012 (HOL) — Ergayga xoghayaha guud ee Qaramada Midoobay u qaablisan arrimaha Soomaaliya, danjire Augustine Mahiga ayaa sheegay in tirada xildhibaannada baarlamaanka Soomaaliya oo horay loo go'aamiyay inay noqdaan 225 xubnood laga dhigayo 275-xubnood.

7/23/2012 8:35 AM EST
Isniin, July 23, 2012 (HOL) — Xisbiga Mucaaradka ah ee UDUB oo laba garab u kala jabay ayaa shaaciyey wakhtiga ay shirweynahoodda golaha dhexe qabsoomi doonaan.

7/23/2012 7:53 AM EST
Isniin, July 23, 2012 (HOL) — Madaxweynaha dowladda Soomaaliya, Sheekh Shariif Sheekh Axmed oo wareysi siiyay telefishinka ku hadla afka dowladda KMG ah ayaa kaga hadlay arrimo badan oo ay ka mid yihiin wax ka bedelka dastuurka, qorshaha looga baxayo xilliga KMG ah iyo arrimo kale oo ay ka mid yihiin inuu beeniyay inuu ka mid yahay kooxda Aala-Sheekh.

7/23/2012 7:24 AM EST
Isniin, July 23, 2012 (HOL) — Odayaal dhaqameedyo ka qayb-galayay shirka ka socda Muqdisho ayaa sheegay maanta inay isaga baxeen shirkaas, kaddib markii ay ogaadeen inaan talo looga baahnayn, sidoo kalena aysan lahayn awood ay wax ku sixi karaan.

7/23/2012 6:50 AM EST
Isniin, July 23, 2012 (HOL) — Iyadoo lagu wado in bisha Ogoosto ee sannadkan ay ka dhacdo Muqdisho doorashada madaxweynaha cusub ee Soomaaliya, ayaa waxaa xilkaas isku taagnay haweeneydii ugu horreysay oo rajo ka qabta inay Soomaaliya madaxweyne ka noqto.

7/23/2012 6:47 AM EST
Isniin, July 23, 2012 (HOL) — Guddiga wanaag-farista Iyo Xumaan Reebista ayaa bilaabay olole ka dhan ah ma soomayaasha caadaystay inay bisha la sooman yahay aan soomin, kuwaas oo meelo qarsoodi ah cuntooyin loogu sameeyo.

7/23/2012 4:16 AM EST
Isniin, July 23, 2012 (HOL) — Munaasabad afur ah oo ka dhacday hoteelka Capetonian ee ku yaalla xeebta magaalada Cape Town ee Gobolka Western Cape ayaa looga hadlay sidii lagu furi lahaa safaaradda ay ku yeelanayso Soomaaliya dalka Koonfur Afrika.

7/23/2012 3:39 AM EST
Isniin, July 23, 2012 (HOL) — Waxaa markii saddexaad maanta dib u dhac uu ku yimid shirkii ansixint dastuurka qabyada ah ee Soomaaliya, iyadoo dib u dhaca lagu sheegay mid farsamo oo maanta la xallinayo.

7/23/2012 3:34 AM EST
Isniin, July 23, 2012 (HOL) — Xarakada Al-Shabaab ayaa meel fagaare ah Axadii ku dilay saddex ruux oo ka tirsanaa xoogaggeeda, kuwaasoo ay ku eedaysay inay sir-doon u ahaayeen hay’adaha muqaadaraadka dalalka Mareykanka iyo Ingiriiska, sida ay soo warisay wakaalada wararka ee AP.