6/24/2021
Today from Hiiraan Online:  _
Wararka Maanta- Isniin, July 23, 2012
Shirweynihii Ansixinta Qaybo-qoraalka Dastuurka Soomaaliya oo markii saddexaad uu Maanta dib u dhac ku yimid


Isniin, July 23, 2012 (HOL) — Waxaa markii saddexaad maanta dib u dhac uu ku yimid shirkii ansixint dastuurka qabyada ah ee Soomaaliya, iyadoo dib u dhaca lagu sheegay mid farsamo oo maanta la xallinayo.

Shirkan oo isugu jira ansixinta dastuurka cusub ee Soomaaliya iyo xulista xildhibaannada cusub ee baarlamaanka ay Soomaaliya yeelanayso ayaa la sheegay inuu furmi doono maalinta Arbacada ah ee soo socota.

"Dib u dhaca shirka waxaa sabab u ah ergooyinka oo aan qaarkood soo gaarin Muqdisho, waxaase la filayaa inay maanta soo gaaraan shirkuna uu maalin kaddib furmo," ayuu yiri wasiir u dowlaha wasaaradda dastuurka iyo arrimaha federaalka, Xasan Maxamed Jaamac oo saakay la hadlay warbaahinta Soomaalida.

Wasiir u dowluhu wuxuu sheegay inaysan jirin sabab kale oo shirka uu maanta dib ugu dhacay, isagoo xusay in shirkaas uu si rasmi ah u furmi doono berri oo Salaaso ah, wuxuuna rajo wanaagsan ka muujiyay furitaanka shirka ee berri.

Odayaasha dhaqanka ayaan iyagu ka hadlin weli sababta uu shirku dib ugu dhacay, waxaana dib u dhaca shirkan uu noqonayaa kii saddexaad iyadoo lagu waday inuu furmo 12-kii bishan, balse uu dib ugu dhacay muran ku saabsan odayaasha iyo qaar ka mid ah qodobbada dastuurka oo qalad laga sheegay.

Ra'iisul wasaaraha Soomaaliya, C/weli Maxamed iyo xubno wasiirro ah ayaa lagu wadaa maanta inay booqasho ku tagaan halka uu shirku ka furmayo oo ammaan ahaa aad loo adkeeyay.

Xukuumadda KMG ah ayaa waxay dadaal weyn ugu jirtaa sidii ay ku meel marin lahayd dastuurka qabyada ah, kaasoo la sheegay in wax ka bedel lagu sameyn doono tan iyo inta lagu ansixinayo afti dadweyne.

Maxamed Xaaji Xuseen, Hiiraan Online
[email protected]
Muqdisho, Soomaaliya











Click here
7/23/2012 2:21 PM EST
Isniin, July 23, 2012(HOL): Gudoomiyihii hore ee ururka SSC Saleebaan Ciise Axmed (Xagla-toosiye) ayaa maanta waxaa si heer sare ah loogu soo dhoweeyey magaala madaxda gobolka Cayn ee Buuhoodle. Xagla-toosiye oo dhowaan dalka dibadiisa kasoo laabtay wuxuu beryihii u danbeeyey ku sugnaa magaala madaxda Puntland ee Garoowe.

7/23/2012 9:52 AM EST
Isniin, July 23, 2012 (HOL) — Magaalada Gaalkacayo ee xarunta gobolka Mudug waxaa ka bilaabmay howgal balaaran oo ay ciidamada maamulka Puntland ku raad goobayaan kooxo la sheegay in ay Burcad-badeed yihiin, islamarkaana xiliyada qaar khal khal geliya ammaanka iyo xasiloonida guud ee gobolka.

7/23/2012 8:39 AM EST
Isniin, July 23, 2012 (HOL) — Ergayga xoghayaha guud ee Qaramada Midoobay u qaablisan arrimaha Soomaaliya, danjire Augustine Mahiga ayaa sheegay in tirada xildhibaannada baarlamaanka Soomaaliya oo horay loo go'aamiyay inay noqdaan 225 xubnood laga dhigayo 275-xubnood.

7/23/2012 8:38 AM EST
Isniin, July 23, 2012 (HOL) — Ra'iisul wasaaraha dowladda KMG ah ee Soomaaliya, Cabdiweli Maxamed Cali oo ay wehliyaan xubno ka tirsan golihiisa wasiirrada ayaa maanta ka qaybgalay kulan ay odayaasha dhaqanku ku lahaayeen Muqdisho, isagoo ku boorriyay inay sida ugu dhaqsiyaha badan kusoo xulaan ergooyinka laga sugayo.

7/23/2012 8:35 AM EST
Isniin, July 23, 2012 (HOL) — Xisbiga Mucaaradka ah ee UDUB oo laba garab u kala jabay ayaa shaaciyey wakhtiga ay shirweynahoodda golaha dhexe qabsoomi doonaan.

7/23/2012 7:53 AM EST
Isniin, July 23, 2012 (HOL) — Madaxweynaha dowladda Soomaaliya, Sheekh Shariif Sheekh Axmed oo wareysi siiyay telefishinka ku hadla afka dowladda KMG ah ayaa kaga hadlay arrimo badan oo ay ka mid yihiin wax ka bedelka dastuurka, qorshaha looga baxayo xilliga KMG ah iyo arrimo kale oo ay ka mid yihiin inuu beeniyay inuu ka mid yahay kooxda Aala-Sheekh.

7/23/2012 7:24 AM EST
Isniin, July 23, 2012 (HOL) — Odayaal dhaqameedyo ka qayb-galayay shirka ka socda Muqdisho ayaa sheegay maanta inay isaga baxeen shirkaas, kaddib markii ay ogaadeen inaan talo looga baahnayn, sidoo kalena aysan lahayn awood ay wax ku sixi karaan.

7/23/2012 6:50 AM EST
Isniin, July 23, 2012 (HOL) — Iyadoo lagu wado in bisha Ogoosto ee sannadkan ay ka dhacdo Muqdisho doorashada madaxweynaha cusub ee Soomaaliya, ayaa waxaa xilkaas isku taagnay haweeneydii ugu horreysay oo rajo ka qabta inay Soomaaliya madaxweyne ka noqto.

7/23/2012 6:47 AM EST
Isniin, July 23, 2012 (HOL) — Guddiga wanaag-farista Iyo Xumaan Reebista ayaa bilaabay olole ka dhan ah ma soomayaasha caadaystay inay bisha la sooman yahay aan soomin, kuwaas oo meelo qarsoodi ah cuntooyin loogu sameeyo.

7/23/2012 4:16 AM EST
Isniin, July 23, 2012 (HOL) — Munaasabad afur ah oo ka dhacday hoteelka Capetonian ee ku yaalla xeebta magaalada Cape Town ee Gobolka Western Cape ayaa looga hadlay sidii lagu furi lahaa safaaradda ay ku yeelanayso Soomaaliya dalka Koonfur Afrika.

7/23/2012 3:34 AM EST
Isniin, July 23, 2012 (HOL) — Xarakada Al-Shabaab ayaa meel fagaare ah Axadii ku dilay saddex ruux oo ka tirsanaa xoogaggeeda, kuwaasoo ay ku eedaysay inay sir-doon u ahaayeen hay’adaha muqaadaraadka dalalka Mareykanka iyo Ingiriiska, sida ay soo warisay wakaalada wararka ee AP.