6/22/2021
Today from Hiiraan Online:  _
Wararka Maanta- Isniin, July 23, 2012
Xarakada Al-shabaab oo toogasho ku dishay Saddex dhallinyaro oo ay ku eedeysay in ay la shaqeynayeen Hay'ado Sirdoon


Isniin, July 23, 2012 (HOL) — Xarakada Al-Shabaab ayaa meel fagaare ah Axadii shalay ku toogtay saddex ruux oo ka tirsanaa xoogaggeeda, kuwaasoo ay ku eedaysay inay sir-doon u ahaayeen hay’adaha muqaadaraadka dalalka Mareykanka iyo Ingiriiska, sida ay soo warisay wakaalada wararka ee AP.

Al-Shabaab ayaa sheegtay in raggan ay warbixino sir ah u gudbin jireen hay’adaha CIA-da iyo MI6, taasina ay horseedday in diyaaraha aan duuliyaha lahayn ay dhowr mar duqeyn ka geystaan Soomaaliya, isla markaasina ay dilaan hogaamiyaal kooxda ka tirsan.

Maxamed Jaamac, oo ka mid ah dadka deggen magaalo xeebeedka Marko oo xarun u ah gobolka Shabeellada hoose ayaa sheegay in daraasiin ka tirsan xoogagga Al-Shabaab ay xir-xireen saddexdaan ruux kaddibna ay rasaas oodda uga qaadeen.

Qaaliga Al-shabab ayaa xukunka dil ah ku riday saddexda ruux, waxaana la toogtay iyadoo ay daawanayeen boqolaal shacab ah oo deggen magaalada Marka, kuwaas oo lagu qasbay inay daawadaan sida uu dilku u dhacayo, waxaana uu Maxamed Jaamac sheegay in qaar ka mid ah dadkii daawanayay dilka ay hunqaaceen.

Magacyada saddexda qof ee la dilay ayaa waxay kala ahaayeen: Isxaaq Cumar Xasan oo 22-jir ahaa, Yaasiin Cusmaan Axmed oo 23-jir ahaa labadan ayaa lagu eedeeyay inay la shaqeynayeen sirdoonka Mareykanka ee CIA-da iyo Mukhtaar Ibraahim Sheekh Axmed oo 33-jir ahaa kaasoo lagu eedeeyay inuu la shaqeynayya sirdoonka Ingiriiska ee MI6.

Guddoomiyaha gobolka Shabeellada hoose ee Al-shabaab, Sheekh Maxamed Abuu- Cabdalla ayaa sheegay inay raggan baarayeen muddo ka badan lix bilood ka hor inta aan lagu fulin xukunka dilka ah.

“Sadexdaan nin waxay qayb ka ahaayeen shabakad isku xiran oo jawaasiis u ah hay’adaha sirdoonka ee Biritishka iyo Amaarikaanku ay soo daadgureeyeen si ay ugu soo gudbiyaan sirta Al-shabaab,” sidaasi waxaa lagu yiri hadal lagu shaaciyay qaanad ay kooxda Al-shabaab ku leedahay barta internet-ka ee Twitter-ka.

Hadalkan ay Al-shabaab baahisay ayaa sidoo kale lagu sheegay in raggan la dilay lagu eedeeyay waxyaabo ay ka mid yihiin inay gacan ka geysteen dilkii Bilal Al-Barjaawi oo ka mid ahaa madaxda ajaanibta ah ee Al-shabaab, kaasoo lagu dilay duqeyn ka dhacday duleedka Muqdisho, kaddib markii gaari uu watay sarkaalkaas ay ku rakibeen qalab sirdoon oo fududeeyay in duqeynta lagu dilo.

Tobonnaan ruux oo haysta dhalashooyinka dalalka Mareykanka iyo Britain asal ahaanna kasoo jeeda Soomaaliya ayaa ku biiray Al-shabab si ay uga dagaalamaan Al-shabaab, waxaana saraakiisha dalalkaas ay ka walaacsan yihiin shaqsiyaadkan haysta baasaboorradooda ay dib u soo laabtaan isla markaasna ay fuliyaan weerarro argagixiso.

Maxamed Faarax Talyaani, Hiiraan Online
[email protected]
Minneapolis, Minnesota










Click here
7/23/2012 2:21 PM EST
Isniin, July 23, 2012(HOL): Gudoomiyihii hore ee ururka SSC Saleebaan Ciise Axmed (Xagla-toosiye) ayaa maanta waxaa si heer sare ah loogu soo dhoweeyey magaala madaxda gobolka Cayn ee Buuhoodle. Xagla-toosiye oo dhowaan dalka dibadiisa kasoo laabtay wuxuu beryihii u danbeeyey ku sugnaa magaala madaxda Puntland ee Garoowe.

7/23/2012 9:52 AM EST
Isniin, July 23, 2012 (HOL) — Magaalada Gaalkacayo ee xarunta gobolka Mudug waxaa ka bilaabmay howgal balaaran oo ay ciidamada maamulka Puntland ku raad goobayaan kooxo la sheegay in ay Burcad-badeed yihiin, islamarkaana xiliyada qaar khal khal geliya ammaanka iyo xasiloonida guud ee gobolka.

7/23/2012 8:39 AM EST
Isniin, July 23, 2012 (HOL) — Ergayga xoghayaha guud ee Qaramada Midoobay u qaablisan arrimaha Soomaaliya, danjire Augustine Mahiga ayaa sheegay in tirada xildhibaannada baarlamaanka Soomaaliya oo horay loo go'aamiyay inay noqdaan 225 xubnood laga dhigayo 275-xubnood.

7/23/2012 8:38 AM EST
Isniin, July 23, 2012 (HOL) — Ra'iisul wasaaraha dowladda KMG ah ee Soomaaliya, Cabdiweli Maxamed Cali oo ay wehliyaan xubno ka tirsan golihiisa wasiirrada ayaa maanta ka qaybgalay kulan ay odayaasha dhaqanku ku lahaayeen Muqdisho, isagoo ku boorriyay inay sida ugu dhaqsiyaha badan kusoo xulaan ergooyinka laga sugayo.

7/23/2012 8:35 AM EST
Isniin, July 23, 2012 (HOL) — Xisbiga Mucaaradka ah ee UDUB oo laba garab u kala jabay ayaa shaaciyey wakhtiga ay shirweynahoodda golaha dhexe qabsoomi doonaan.

7/23/2012 7:53 AM EST
Isniin, July 23, 2012 (HOL) — Madaxweynaha dowladda Soomaaliya, Sheekh Shariif Sheekh Axmed oo wareysi siiyay telefishinka ku hadla afka dowladda KMG ah ayaa kaga hadlay arrimo badan oo ay ka mid yihiin wax ka bedelka dastuurka, qorshaha looga baxayo xilliga KMG ah iyo arrimo kale oo ay ka mid yihiin inuu beeniyay inuu ka mid yahay kooxda Aala-Sheekh.

7/23/2012 7:24 AM EST
Isniin, July 23, 2012 (HOL) — Odayaal dhaqameedyo ka qayb-galayay shirka ka socda Muqdisho ayaa sheegay maanta inay isaga baxeen shirkaas, kaddib markii ay ogaadeen inaan talo looga baahnayn, sidoo kalena aysan lahayn awood ay wax ku sixi karaan.

7/23/2012 6:50 AM EST
Isniin, July 23, 2012 (HOL) — Iyadoo lagu wado in bisha Ogoosto ee sannadkan ay ka dhacdo Muqdisho doorashada madaxweynaha cusub ee Soomaaliya, ayaa waxaa xilkaas isku taagnay haweeneydii ugu horreysay oo rajo ka qabta inay Soomaaliya madaxweyne ka noqto.

7/23/2012 6:47 AM EST
Isniin, July 23, 2012 (HOL) — Guddiga wanaag-farista Iyo Xumaan Reebista ayaa bilaabay olole ka dhan ah ma soomayaasha caadaystay inay bisha la sooman yahay aan soomin, kuwaas oo meelo qarsoodi ah cuntooyin loogu sameeyo.

7/23/2012 4:16 AM EST
Isniin, July 23, 2012 (HOL) — Munaasabad afur ah oo ka dhacday hoteelka Capetonian ee ku yaalla xeebta magaalada Cape Town ee Gobolka Western Cape ayaa looga hadlay sidii lagu furi lahaa safaaradda ay ku yeelanayso Soomaaliya dalka Koonfur Afrika.

7/23/2012 3:39 AM EST
Isniin, July 23, 2012 (HOL) — Waxaa markii saddexaad maanta dib u dhac uu ku yimid shirkii ansixint dastuurka qabyada ah ee Soomaaliya, iyadoo dib u dhaca lagu sheegay mid farsamo oo maanta la xallinayo.