6/13/2021
Today from Hiiraan Online:  _
Wararka Maanta- Axad, July 22, 2012
Ururka PSA oo deeq Marawaxado ka kooban gaarsiiyey maxaabiista ku jirta xabsiga weyn ee magaalada Boosaaso [SAWIRO]



Axad, July 22, 2012(HOL) — Ururka dhalinyarada iyo horumarinta arimaha bulshada Puntland (PSA) ayaa maanta deeq Marawaxado ka kooban gaarsiiyey xabsiga weyn ee magaalada Boosaaso (Gaal-shire).

Munaasabadii deeqdan lagula kala wareegayey oo ka dhacday gudaha xabsiga, waxaa kaso qayb galay maamulka degmada Boosaaso, taliska ilaalada xabsiga, waxgarad iyo xubnaha ugu sareeya ururka PSA.

Ugu horeyn waxaa goobta ka hadlay gudoomiyaha ururka dhalinyarada iyo horumarinta arimaha bulshada Puntland Cabdifataax Maxamed Sugulle, wuxuuna sheegay in Marawaxadahan oo ay tiradoodu 16 xabo tahay loogu tala galay in lagu xiro qolalka ay maxaabiistu ku jiraan.

Mr. Sugulle ayaa intaas raaciyey in qiimeyn ay ku sameeyeen baahiyaha ay maxaabiistu qabaan kadib ay garowsadeen in ay Marawaxado u keenaan, maadaama lagu jiro bisha barakaysan ee Ramadaan, jewiguna uu yahay mid aad u kulul, maxaabiista intooda badanina ay sooman yihiin.

Taliye ku xigeenka xabsiga Xasan Maxamed Xasan oo isaga rasmi ah agabkan loogu wareejiyey ayaa sheegay inay ku faraxsan yihiin deeqda uu ururka PSA soo gaarsiiyey. Taliyaha oo hadalkiisa sii wata ayaa xusay in agabka maanta maxaabiista loo keenay uu yahay mid kooban, balse marka la eego baahida xiligan loo qabo uu wax badan tari doono.

Duqa degmada Boosaaso Xasan Cabdallah Xasan oo qayb ka ahaa mas'uuliyiintii madashaas ka hadashay, ayaa tilmaamay inay haboon tahay in wax lala baxo inta lagu guda jiro bisha barakaysan ee Ramadaan, wuxuuna PSA uga mahad celiyey dadaalka ay muujiyeen isagoo sheegay in uu yahay mid ku dayasho mudan.

Gudoomiyaha nabadoonada gobolka Bari Cabdiqaadir Axmed Ibraahim (Xarago) oo ugu danbeyntii hadalka qaatay ayaa ku dheeraaday ka sheekeynta sida ay lagama maarmaanka u tahay in loo naxariisto maxaabiistam maadaama ay yihiin dad aan xoriyad haysan.

Nabadoonku wuxuu baaq u diray bulshada Puntland kuwa dalka ku nool iyo kuwooda qurba joogta ahba, wuxuuna ka codsaday in ay xil iska saaraan sidii ay gacan uga geysan lahaayeen daboolista baahiyaha maxaabiista sida: iibinta shidaalka Matoorka xabsiga iyo weliba afursiinta maxaabiista sooman.

Xabsiga (Gaal-shire) ee magaalada Boosaaso oo ah kan ugu weyn xiligan guud ahaan deegaanada Puntland, waxaa ku jira maxaabiis ay tiradoodu boqolaal kor u dhaafayso, waana markii ugu horeysey ee urur kamid ah kuwa maxaliga ah ee ka jira Puntland uu deeq noocan oo kale ah gaarsiiyo.






Maxamed Salaad Xaaji Dirir, Hiiraan Online
[email protected]
Puntland, Somalia












Click here
7/22/2012 6:37 PM EST
Axad, July 22, 2012(HOL) Bandhig isugu jiray soo bandhigid buugaag ay qoreen abwaanno dalkeenna sida aadka ah looga qadderiyo oo ay ka mid yihiin Maxamed Ibrahim Hadraawe iyo Mustafa Sheekh Cilmi.

7/22/2012 9:07 AM EST
Axad, July 22, 2012 (HOL) — Guddoomiyaha dhawaan dowladda KMG Soomaaliya u soo magacaawday maamulka degmada Baladweyne, Xuseen Ibraahim Cabdi (Gurey) ayaa markii ugu horreysay baaq u diray hay’addaha samafalka ka howlgala magaalada.

7/22/2012 8:39 AM EST
Axad, July 22, 2012 (HOL) — Magaalada Baydhabo ee gobolka Bay ayaa markii ugu horreysay tan iyo markii ay burburtay dowladdii dhexe ee Soomaaliya 22-sano ka hor waxaa maanta lagu qabtay imtixaan loogu tartamayo deeq waxbrasaho.

7/22/2012 8:36 AM EST
Axad, July 22, 2012 (HOL) — Shirkadda isgaarsiinta Hormuud Telecom ayaa waxay maanta gargaar afurin ah gaarsiisay maxaabiista ku jira xabsiga dhexe ee Muqdihso iyadoo gargaarkaas lagu wareejiyay taliyaha ciidanka asluubta Soomaaliyeed, Jen. Cabdi Maxamed Ismaaciil iyo wasiirka owqaafta iyo arrimaha diinta DKMG ah, Axmed Xasan Gaboobe.

7/22/2012 8:07 AM EST
Axad, July 22, 2012 (HOL) — Iskahorimaad ku dhexeeyay dibadbaxayaal muslimiin ah iyo booliiska Itoobiya ayaa shalay oo Sabti ahayd ka dhacay waqooyiga Addis Ababa oo ah xarunta dalka Itoobiya, inkastoo iskahorimaadkaas uusan sababin wax dhimasho iyo dhaawac ah, haddana waxay booliisku xireen tiro dibadbaxayaasha ka mid ahaa.

7/22/2012 7:42 AM EST
Axad, July 22, 2012 (HOL) — Iska-horimaad xooggan ayaa xalay ka dhacay degmada Badhaadhe ee gobolka Jubbada Hoose kaasoo u dhexeeyay ciidamada Dowladda KMG iyo kuwa Raaskaambooni oo kaashanaya Militariga Kenya iyo Xarakada Al-shabaab.

7/22/2012 6:55 AM EST
Axad, July 22, 2012 (HOL) — Wasiirka Duulista Hawadda Somaliland oo hogaaminayo wefti iskugu jira, wasiiro iyo xildhibaano, ayaa olole bannayn ah ka bilaabay garoonkii diyaaradaha ee magaaladda Burco ee xarunta gobolka Togdheer kaas oo muddo badan aan shaqayn.

7/22/2012 6:53 AM EST
Axad, July 22, 2012 (HOL) — Qof haweeney ah ayaa ku dhimatay, laba qof oo kalena way ku dhaawacmeen iska-horimaad ciidammo kawada tirsan dowladda KMG Soomaaliya ku dhexmaray maanta oo Axad ah waddada Maka Al-Mukarama ee magaalada Muqdisho.

7/22/2012 4:23 AM EST
Axad, July 22, 2012 (HOL) — Guddoomiyaha gobolka Galguduud ay dowladda KMG toddobaadkii hore u magacowday gobolkaas, Yuusuf Xasan Ciyoow iyo xubno wehlinaya ayaa saakay ka dagay garoonka diyaaradaha ee degmada Guriceel, halkaasoo ay ku soo dhaweeyeen dadweyne fara badan.

7/22/2012 3:59 AM EST
Axad, July 22, 2012 (HOL) — Warsaxaafadeed ay AMISOM soo saartay maanta oo Axad ah ayay ku sheegtay in ciidamadooda ka socda dalka Kenya iyo kuwa DKMG ah ee ku sugan gobolka ay hub ka heleen saldhig ay Al-shabaab ku lahayd deegaanka Tarako ee gobolka Gedo, aroortii hore ee Salaasadii lasoo dhaafay.