6/13/2021
Today from Hiiraan Online:  _
Wararka Maanta- Sabti, July 21, 2012
Barack Obama oo Mamnuucay Dhoofinta Dhuxusha Somalia, Sheegayna in la Cunno-qabteynayo ciddii ku lug yeelata Musuq-maasuqa Deeqaha Soomaaliya


Sabti, July 21, 2012 (HOL) — Madaxweynaha Mareykanka, Barack Obama ayaa mamnuucay dhoofinta dhuxusha Soomaaliya, taasoo uu sheegay inay dhaqaale ka hesho Xarakada Al-shabaab oo dagaal kula jirta DKMG ah iyo AMISOM, isagoo sidoo kale sheegay in cunno-qabteyn la saari doono cid walba oo ku lug yeelata musuq-maasuqa dhaqaalaha loogu deeqo Soomaaliya iyo kuwa askareeya caruurta.

Warsaxaafadeed kasoo baxay wasaaradda arrimaha dibadda ee Mareykanka ayaa lagu sheegay in xayiraadda dhoofka dhuxusha Soomaaliya ay xoojinayso qaraarkii uu horay u meel-mariyay golaha ammaanka ee Qaramada Midoobay kaasoo lagu mamnuucay dhoofka dhuxusha Soomaaliya.

"Manuucidda dhoofka dhuxusha Soomaaliya waa mid cadaadis saaraysa Al-shabaab oo dhaqaale badan ka hela dhoofinta dhuxusha," ayay tiri Victoria Nuland oo ah afhayeenad u hadashay wasaaradda arrimaha dibadda ee Mareykanka. "Dhuxusha ayaa waxay dhibaato ku haysaa deegaanka, waana mid sii xumaysa dhibaatooyinka bani'aadamnimo ee Soomaaliya muddada dheer ka taagan."

Warbixinta ayaa lagu sheegay in Al-shabaab oo ku dhawaaqday billowgii sannadkan inay ku biirtay Al-Qaacida inay khatar weyn ku hayso ammaanka, nabadda, inay Soomaaliya xasillooni kusoo laabato iyo iyadoo is-hortaagtay in gargaarka deg-deg lagu gaarsiiyo dadka u baahan.

Sidoo kale, warbixintan oo lasoo saaray Jimcihii shalay ayaa lagu sheegay in cunno-qabteyn la saari doono cid walba oo ku lug yeelata musuqmaasuqa gargaar loogu talogalay Soomaalida iyo kuwa carruurta askar ka dhigta.

Xarakada Al-shabaab ayay warbixintu sheegay in dhaqalaaha ugu badan ee ay ku dagaalanto ay ka hesho dhoofka dhuxusha, taasoo ka baxda dekedaha ku yaalla Koonfurta Soomaaliya oo ay iyadu maamusha, iyadoo dhuxushaas loo iib-geeyo dalalka Khaliijka Carabta oo ay ku jiraan Yemen, Sucuudiga iyo Imaaraadka Carabta.

Dowladda Soomaaliya oo xilligeedu ku eg-yahay bisha soo socota ee Ogoosto ayaa tan iyo markii la dhisay sannadkii 2004 waxay awoodi wayday inay xasillooni kusoo celiso Soomaaliya ama ay awooddeeda ku baahiso dalka oo dhan.

Ugu dambeyn, warbixinta ayaa lagu sheegay in Mareykanka uu kala shaqeyn doono Soomaaliya, dalalka gobolka iyo beesha caalamka sidii loo cabsi-gelin lahaa kuwa khatarta ku ah ammaanka, nabadgalyada iyo deggenaashaha Soomaaliya.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
7/21/2012 9:42 AM EST
Sabti, July 21, 2012 (HOL) — Annagoo soo dhaweyneyna bisha Ramadaan ee Barakaysan, madaxda ururrada Soomaalida ee UK iyo dhammaan dadka jecel dhaqanka, afka iyo akhriska waxaa lagu martiqaadayaa kulan-dhaqameed muhiim ah oo hordhac u ah xuska 40-guurada qoraalkii Far-Soomaalida.

7/21/2012 9:41 AM EST
Sabti, July 21, 2012 (HOL) — Ra'iisul wasaaraha Soomaaliya, C/weli Maxamed Cali iyo xubno wasiirro ah ayaa maanta la kulmay guddiga xallinta khilaafaadka iyo guddiga farsamo ee soo xulista ergooyinka ansixinta dastuurka iyo xulista xubnaha baarlamaanka, kaasoo looga hadlay dedejinta howlgaha lagu ansixinayo dastuurka iyo go'aan ka gaarsinta odayaal la isku haysto.

7/21/2012 9:39 AM EST
Sabti, July 21, 2012 (HOL) — Maamulka gobolka Bay ee dowladda Soomaaliya ayaa xabsiga u taxaabay maanta hawl-wadeenno u shaqeynayay hay’adda samafalka ee Islamic Relief iyo nin ganacsade ah.

7/21/2012 9:25 AM EST
Sabti, July 21, 2012 (HOL) — Isbahaysiga NATO ayaa beesha caalamka weydiistay inay qayb ka qaataan sidii loo ciribtiri lahaa burcadbadeedda Soomaaliya, iyagoo sheegay inay aad hoos ugu dhigeen weerarradii burcad-bdeedda ay ka fulin jireen biyaha Soomaaliya iyo kuwa ku dhow.

7/21/2012 8:26 AM EST
Sabti, July 21, 2012 (HOL) — Mas'uuliyiin ka tirsan Puntland, oo uu horkacayey madaxweynaha Cabdiraxmaan Maxamed Maxamuud Faroole ayaa duhurnimadii maanta booqday fanaanada Saado Cali Warsame, oo shalay ku dhaawacantay shil gaari, xilli ay dhinaca magaalada Garoowe kusoo jeedey.

7/21/2012 8:20 AM EST
Sabti, July 21, 2012 (HOL) — Al-shabaab waxay qorsheynaysaa weerarro ay ka geysato magaalada Nairobi inta lagu jiro bisha Ramadaan, kuwaasoo qorshahoodu yahay inay maanta oo Sabti ah billowdaan ayaa laga soo xigtay sarkaal sare oo ka tirsan booliiska Kenya.

7/21/2012 7:45 AM EST
Sabti, July 21, 2012 (HOL) — Ciidamada ammaanka ee Puntland ayaa gacanta ku soo dhigay dooni yar oo nooca kaluumaysiga ah, taasoo la sheegay inay kusoo jeeday degmada Caluula ee gobolka Bari.

7/21/2012 7:31 AM EST
Sabti, July 21, 2012 (HOL) — Hal sano kadib markii Qaramada Midoobay ay ku dhawaaqday in laba gobol oo ku yaalla Koonfurta Soomaaliya ay macluuli ka dilaacday ayaa waxaa laga soo sheegayaa gobollo badan oo Koonfurta ku yaalla abaaro khatar ah, kuwaasoo ay sababeen roobabkii xilliga oo yaraaday.

7/21/2012 7:06 AM EST
Sabti, July 21, 2012 (HOL) — Xaaladda caafimaad ee fanaanadda Soomaaliyeed ee Saado Cali Warsame ayaa soo hagaagaysa, kaddib markii ay shalay shil ku gashay inta u dhexeysa degmooyinka Gaalkacayo iyo Garoowe. Dhaawaca fanaanadda ayaa isugu jira, jab kasoo gaarey gacanta midig iyo nabaro fudud oo kaga dhacay qoorta iyo wejiga.

7/21/2012 6:49 AM EST
Sabti, July 21, 2012 (HOL) — Iyadoo maanta lagu waday inuu Muqdisho ka furmo shirweynaha ansixinta dastuurka qabyada ah ee Soomaaliya ayaa waxaa ku yimid dib u dhac, kaasoo lagu sheegay cillad farsamo oo dhinaca xulidda ergooyinka ah.

7/21/2012 6:47 AM EST
Sabti, July 21, 2012 (HOL) — Howlahan lagu dayactirayo isbitalka Dhoobleey ayaa waxa gacan ka geeystay qurbajoog ku dhaqan dalka Mareeynkanka oo kasoo jeeda gobollada Jubooyinka, waxaana dayactirku uu ku socdaa dhamaan qeybaha kala duwan ee Isbitalka.

7/21/2012 3:42 AM EST
Sabti, July 21, 2012 (HOL) — Ciidamada dowladda KMG ah ee Soomaaliya ayaa xalay howgallo lagu sugayay ammaanka ka sameeyay Muqdisho, iyadoo sidoo kale ay isla xalay kooxo ku labisan dharka ciidamada oo wata gaadiid dagaal ay dhac u geysteen dukaammo ganacsi oo ku yaalla xaafadda Suuqa Xoolaha ee degmada Huriwaa.