12/13/2018
Today from Hiiraan Online:  _
Wararka Maanta- Isniin, Jan 23, 2012
Jaaliyadda Soomaalida ee Gobalka Arizona oo yeeshay kulan looga hadlay waxyaabihii u qabsoomay sanadkii lasoo dhaafay (SAWIRRO)



Isniin, January 23, 2012(HOL): Munaasabad si weyn loo soo agaasimay, laguna maamuusayey waxyaabihii sanadkii la soo dhaafay u qabsoomay Jaaliyadda Soomaalida ee Gobalka Arizona ee Wadanka Mareykanka (Somali American United Council of Arizona), ayaa xalay lagu qabtay magaalo madaxda Gobolkaasi ee Phoenix.

Xafladdan oo ay ka soo qeyb galeen Ururrada dowliga  ah ee deegaanka iyo kuwa bulshada Rayidka, shaqsiyaad ka socday Xafiisyada Dowladda Mareykanka iyo walba marti kale, ayaa waxaa lagu soo bandhigay waxqabadka xafiiska jaalidda muddadii uu shaqeynayey iyo waliba tiro-koob la sheegay in lagu sameeyey Soomaalida qaxootiga ah ee gobolka Arizona ku dhaqan.

Furitaanka Munaasabadda, ayaa waxaa ugu horreyn ka hadlay guddomiyaha Jaaliyadda Prof: Maxamed Cali Abuukar, oo sheegay in ay wax lagu farxo tahay in dadka Soomaalida ah ee gobolka ku dhaqan ay yihiin dad ka faa’iidaystay fursadihii ay heleen isla mar ahaantaasi ay yihiin dad wax badan ka bartay dhaqanka iyo nolosha bulshada ay la nool yihiin.

“Waxaan u mahadcelinayaa dhamaan ka soo qeyb galayaasha xafladda qiimaha iyo qaayaaha badan oo ay ka mid yahiin madaxda dowlada Mareykanka ee gobolka iyo xafiisyada kale ee nagala qeybgalay xafladda caawa, sidoo kale waxaa maanta muhiim ah inaan soo bandhigno wax qabadka Jaaliyadda Soomaalida” ayuu yiri Prof: Maxamed Cali.


Munaasibadda ayaa intii ay socotay waxaa sidoo kale ka hadlay qaar ka mid ah dadkii ka soo qaybgalay kuwaasi oo isugu jiray shaqsiyaad ka socday maamulka dowladda gobolka Arizona, hay’adaha bulshada ee deegaanka, aqoonyahano, culimaa’udiinka iyo ganacsato, kuwaasi oo dhammaantood ka mideysnaa waxqabadka jaaliyadda iyo sida ay uga qeybqaateen horumarka  gobolka.

Sido kale waxaa xafladda ka hadlay Mr. Jack Salvatore oo ah qareenka u qaabilsan arimaha sharciyada jaaliyadda Soomaalida Arizona, waxaana uu sheegay in uu wax badan ka faa’iiday mudadii uu la shaqeynayey dadka Soomaaliyeed ku dhaqan Gobolka Arizonna, waxyaabahaas oo uu sheegay in ay ka mid yihiin dhaqanka iyo dabeecad wadaaga, waxaana uu intaasi ku daray in ay muhiim tahay in la tageero arimaha bulshada sida ciyaaraha iyo dhaqamada Jaaliyadda Soomaaliyeed ee ku nool Gobolka Arisonna.


Ugu dambeyntiina, waxaa shihaado sharaf  halkaasi lagu guddoonsiiyey qaar ka mid ah dadkii ka soo qaybgalay munaasibada, kuwaasi oo loo arkayey in ay waxbadan ka soo qabteen arimaha horumarka bulshada, sida shabakada Hiiraan Online oo loo aqoonsaday in ay dhiirigelisay isla markaana ay tamar gelisay Soomaalida ku nool Arizona,  iyadoo shahaadadaasna uu  guddoomay Cabdiraxmaan Diiriye Nuur  oo ka mid ah Bahda Hiiraan Online.









Cabdiraxmaan D. Nur, Hiiraan Online
[email protected]
Minnesota Minneapolis







Click here
1/23/2012 8:30 AM EST
Isniin, Jannaayo 23, 2012 (HOL) − Guddoomiyaha golaha fulinta Ahlusunna, Sheekh Maxamed Yuusuf Xeefoow iyo wafdi uu hoggaaminayo oo ku sugan Muqdisho ayaa waxay kulammo la yeesheen madaxda DKMG ah ee Soomaaliya iyagoo weydiistay in gacan laga siiyo dagaalka ay kula jiraan Al-shabaab.

1/23/2012 8:28 AM EST
Isniin, Jannaayo 23, 2012 (HOL) − Ra'iisul wasaaraha Soomaaliya C/weli Maxamed Cali iyo guddoomiyaha baarlamaanka, Shariif Xasan Sheekh Aadan ayaa maanta kula kulmay Muqdisho wafdi ka socda dalka Ingiriiska oo uu hoggaaminayo ergeyga gaarka ah ee Ingiriiska u qaabilsan, Matt Baugh, wuxuuna kala hadlay xiriirka labada dal, arrimaha Roadmap-ka, horumarka laga sameeyey go'aanadii shirkii Garowe iyo shirka 23-ka bisha Febraayo lagu wado inuu ka dhaco magaalada London.

1/23/2012 8:28 AM EST
Isniin, Jannaayo 23, 2012 (HOL) − Saraakiisha AMISOM iyo kuwa dowladda KMG ah ee Soomaaliya ayaa maanta koox saxafiyiin ah geeyay fariisimihii ay Al-shabaab kaga qabsadeen dagaalkii dhacay Jimcihii, waxaana goobaha la geeyay suxufiyiinta ka mid ahaa xarunta jaamacadda Muqdisho.

1/23/2012 8:22 AM EST
Isniin, Jannaayo 23, 2012 (HOL) − Hay'adda samofalka HARO ayaa waxay gargaar isugu jira bur, bariis, sokor iyo saliid u qaybisay 550 ka mid ah barakacyaasha ku nool magaalada Muqdisho, waxaana deeqdan bixisay hay'adda WAMY.

1/23/2012 7:40 AM EST
Isniin, Jannaayo 23, 2012 (HOL) − Ururka suxufiyiinta Somaliland ee SOLJA, ayaa 15-suxufi uga furay hotel Sumar Time ee magaalada Hargeysa tababar ku saabsan qabtay loo tabiyo wararka ku saabsan arrimaha xuquuqal-insaanka.

1/23/2012 6:37 AM EST
Isniin, Jannaayo 23, 2012 (HOL) − Dowladda Kenya ayaa sheegtay inay ku dileen dagaal ka dhacay Koonfurta Soomaaliya 11 dagaalayahan oo ka tirsan Al-shabaab, dhankoodana looga dilay laba askari oo keliya.

1/23/2012 6:00 AM EST
Isniin, Jannaayo 23, 2012 (HOL) − Taliyaha ciidamada Midowga Africa ee AMISOM, Major Jen. Fred Mugisha ayaa sheegay inay ku wajahan yihiin ciidamadooda deegaannada loo barakacay ee duleedka Muqdisho, halkaasoo ay gacanta ku hayso Xarakada Al-shabaab.

1/23/2012 5:51 AM EST
Isniin, Jannaayo 23, 2012 (HOL) − Warar dheeraad ah ayaa ka soo baxayo dagaal xoogan oo xalay saqdii dhexe ilaa saaka waabarigii leedka deegaanka Taabto ee gobbalka Jubada hoose ku dhexmaray ciidamada dowladda KMG ah oo garab ka helaya kuwa kenya iyo xoogaga Al-shabab, iyadoona ay warar kala duwan ka soo baxaan khasaaraha ka dhashay dagaalkaasi.

1/23/2012 5:08 AM EST
Dawlada Kenya ayaa shaaca ka qaaday inay dib u celinayso qaxootiga Soomaalida ah ee ku jira xeryaha qaxootiga ee Dhadhaab.

1/23/2012 2:16 AM EST
Isniin, Jannaayo 23, 2012 (HOL) − Wasaaradda gaashaandhigga dalka Uganda ayaa sheegtay in laba askari oo midkood uu ahaa sarkaal sare looga dilay dagaalkii ka dhacay Muqdisho Jimcihii lasoo dhaafay, kaasoo Xarakada Al-shabaab looga qabsaday dhul ay horay ugu sugnayd.

1/23/2012 2:08 AM EST
Isniin, Jannaayo 23, 2012 (HOL) − Madaxweyaha Galmudug Col. Maxamed Axmed Caalin ayaa dadaal ugu jira sii-daynta ruux u dhashay dalka Mareykanka oo maalin ka hor lagu afduubay koonfurta degmada Gaalkacyo.

1/23/2012 1:54 AM EST
Isniin, Jannaayo 23, 2012 (HOL) − Maxkamadda ciidamada DKMG ah ee Soomaaliya ayaa saakay dil toogasho ah ku fuilisay askari ka tirsanaa ciidamada DKMG ah oo horay ugu dilay degmada Hodan askari kale oo ka tirsanaa ciidamada nabadsugidda Soomaaliya.

1/23/2012 1:49 AM EST
Isniin, Jannaayo 23, 2012 (HOL) − Ugu yaraan shan qof oo isugu jira dhinacyadii dagaalamay iyo dad shacab ah ayaa ku dhintay, tiro intaas ka badanna way ku dhaawacmeen dagaallo xalay ka dhacay xaafado ka tirsan degmooyinka Kaaraan iyo Dharkeynley ee magaalada Muqdisho.