3/29/2024
Today from Hiiraan Online:  _
Wararka Maanta- Talaado, Dec 4 , 2012
Kooxda Xuquuqda Aadamaha ee EU-da iyo Maraykanka oo Somaliland kala hadlay ilaalinta Xuquuqda Aadamaha iyo Warbaahinta
Talaado, December 04, 2012 (HOL) — Kooxda Xuquuqda aadamaha ee Midawga Yurub, Norway, Switzerland iyo Maraykanka ayaa ku baaqay in wax laga qabto meel ka dhacyada ka dhanka ah saxaafadda iyo weliba xad-gudubyada ku dhisan jinsiga.

Kooxdani waxay sidaa ka sheegeen shir jaraa'id oo ay  ku qabteen hoteelka Ambassador ee magaalada Hargeysa, ka dib markii ay booqasho hal maalin ah ku yimaadeen Somaliland, isla markaana wada hadalo iyo is-xog-waraysi la yeesheen xukuumadda Somaliland iyo weliba ururada bulshada.

“Kooxda xuquuqda aadamuhu waxay ku bogaadiyeen Somaliland horumar laga sameeyay xagga xuquuqda aadamaha gaar ahaana abuuritaanka Guddida Xuquuqda aadamaha  iyo weliba xoojinta dhinaca garsoorka. Sidoo kale waxay kooxda xuquuqda aadamuhu Somaliland ku hambalyaysay  doorashada golaha deegaanka ee sida nabdoon uga qabsoontay Somaliland. Waxaanay kooxdan rajaynaysaa in hawlahani nabdoon sii socon doonaan,” ayuu yidhi Tomas Konigsfeldt oo ah u qaybsanaha arrimaha siyaasadda ee Safarada Denmark ee magaalada Nairobi oo ka hadlay waxyaabihii ay la kulmeen intii ay Somaliland joogeen oo ay ka mid tahay meel ka dhacyada ka dhanka ah xuquuqda aadamaha kor u qaadida ka qayb galka haweenka ee xagga siyaasadda iyo weliba arrimo kale.

Waxaanu intaas ku daray  “Kulamadayadii waxaanu ku gorfaynay dhawr arrimood oo la xidhiidha xuquuqda aadamaha oo ay ku jiraan xorriyadda hadalka iyo madax banaanida warbaahinta. Taasi oo ay kooxdu u aragto inay fure u tahay horumarka. Waxaanay kooxdu danaynaysaa arrimahaasi oo ay ka mid yihiin dil, xadhig iyo garaacis lagula kaco suxufiyiinta, taasi oo khatar ku ah warbaahinta. Waxaanay kooxdu dawladda Somaliland ugu baaqaysaa in la sameeyo xeer warbaahineed oo lagaga maarmo in loo raaco xeerka ciqaabta”.

Sidoo kale, waxay ka hadleen xeerka sirdoonka Somaliland oo qodobo ka mid ah warbaahinta caqabad ku ah, waxaanu yidhi “ Waxa kale oo ay kooxdu  qiimeyn ka yeelatay arrimaha la xidhiidha xorriyadda hadalka iyo madax banaanida saxaafadda gaar ahaana xeerka hay'adda sirdoonka qaranka oo ay awoodaheedu muquuninayaan warbaahinta. Waxaanay kooxdu dhiirigelinaysaa in arrinta xeerkaasi laga fiirsado. Waxa kale oo ay kooxdu ku baaqaysaa in warbaahinta madaxa banaan ee Somaliland la taageero gaar ahaana xagga horumarinta”.

Kooxdani waxa kale oo ay sheegeen in sanadkan la doonayo in dumarku ka qaybqaataan arrimaha danta guud, isla markaana dumarka iyo dadka laga tiradda badan yahay wakiilo  ku yeeshaan goleyaasha deegaanka, maadaama oo ay adag tahay inay cod ku soo baxaan.

Waxa iyaduna halkaasi ka hadashay  gudoomiyaha guddida madaxa banaan ee xuquuqda aadamaha Qaranka  Somaliland Marwo: Fatxiya Xuseen, waxaanay sheegtay in dumar badani ka sharaxan yihiin goleyaasha deegaanka, balse ay adag tahay inay soo baxaan,  isla markaana loo baahan yahay in kooto ahaan doorashadda lagu siiyo dumarka, waxa kale oo ay sheegtay in saxaafadu tahay mid aan laga maarmayn, isla markaana horumarka wadanka qayb ka qaatay sidaa darteed ay tahay in si fiican loola shaqeeyo.

“Guddi ahaan waxaanu nahay guddi madax banaan oo ay baarlamaanku soo ansixiyeen, isla markaana Guddidani u taagan tahay in gargaaridda qof kasta oo la dulmo, sidaasi darteed cid kasta oo cabanaysa haddii ay noqoto dadweynaha reer Somaliland iyo haddii ay tahay dadka kale ee ku soo barakacayba inay ogaadaan in aanu la qabanayno oo aanu diyaar u nahay inaanu wax la qabano” ayay tidhi Farxiye mar ay sharaxaysey guddida madaxa banaan ee xaquuqda aadamaha Si kastaba ha ahaatee, kooxda u doodaysa xuquuqda aadamaha ayaa xukuumadda somaliland kala hadlay ilaalinta xaquuqda adaamaha, gaar ahaan dumarka, dadka laga tirade badan yahay iyo saxaafadda.

Barkhad-Ladiif  M. Cumar, Hiiraan Online
[email protected]
Hargeysa, Somaliland












Click here
12/4/2012 11:46 AM EST
Talaado, December 04, 2012 (HOL)- Garoonka diyaaradaha ee magaalada Boosaaso waxaa maanta laga soo dejiyey 5 maxbuus oo in muddo ah ku jirey xabsi ku yaalla Seychelles, kadib markii ay maxkamadi ku riddey xukunno kala duwan oo la xiriira falal Burcad-badeednimo oo ay ku lug lahaayeen.

12/4/2012 8:43 AM EST
Talaado, December 04, 2012 (HOL) — Sarkaal u hadlay Qaramada Midoobay ayaa sheegay maanta oo Salaaso ah in xaaladda bani'aadamnimo ee Soomaaliya ay weli tahay mid khatar ah, balse ay jiraan rajooyin ka dhalanaya isbedel siyaasadeed iyo midka ammaan ee dalka ka hirgalay.

12/4/2012 7:21 AM EST
Talaado, December 04, 2012 (HOL) — Taliyaha ciidamada ilaalada waddooyinka, Jen. Cali Xirsi Barre (Cali-gaab) ayaa ka hadlay dhaawac fudud oo uu u geystay askari la sheegay inay isbaaro u taallay jidka 21-Oktoobar ee degmada Waabeir ee Magaalada Muqdisho.

12/4/2012 6:56 AM EST
Talaado, December 04, 2012 (HOL) — Maxaabiis budhcad badeed ah oo lagu soo maxkamadeeyey dalka Seychelles ayaa shalay lagu soo wareejiyey gacanta Somaliland.

12/4/2012 5:42 AM EST
Talaado, December 04, 2012 (HOL) —Kooxo ku hubeysan baastoolado ayaa shalay gelinkii danbe toogasho ku dilay Sheekh siweyn looga yaqaanay magaalada Baardheere xilli uu kusii jeeday masaajid.

12/4/2012 3:19 AM EST
Talaado, December 04, 2012 (HOL) — AMISOM ayaa sheegtay inay qaadayso tallaabo lagu adkeynayo ammaanka jidka isku xirta magaalada Marko ee xarunta gobolka Shabeellada Hoose iyo deegaanka Lambar 50 ee isla gobolka Shabeellada hoose, kaddib laba weerar lagu qaaday gaadiid kolonyo ah oo waday wasiirro ka tirsan xukuumadda Soomaaliya oo ka dhacay waddadaas.

12/4/2012 3:01 AM EST
Talaado, December 04, 2012 (HOL) — Ra'iisul wasaaraha Soomaaliya, Cabdi Faarax Shir-doon (Saacid) oo warbaahinta la hadlay ayaa sheegay in wafdiyo heer wasiir ah ay xukuumaddiisu u dirayso gobollada dhexe iyo magaalada Kismaayo oo uu weli ka taagan yahay muran dhinaca maamulka ah.

12/4/2012 2:42 AM EST
Talaado, December 04, 2012 (HOL) — Ugu yaraan sideed askari oo ka tirsanaa ciidamadii dagaalamay ayaa ku dhintay tiro kalena way ku dhaawacmeen dagaal culus oo ciidamada dowladda Soomaaliya iyo xoogagga Al-shabaab ku dhexmaray deegaanka Garsaale oo ku dhow degmada Jowhar ee xarunta gobolka Shabeellada Dhexe.

12/4/2012 2:25 AM EST
Talaado, December 04, 2012 (HOL) — Madaxweynaha Soomaaliya, Xasan Sheekh Maxamuud iyo wafdi uu hoggaaminayo oo afar wasiir ay ku jiraan ayaa maanta u dhoofay dalka Turkiga, waxaana wafdigan sii sagootiyay guddoomiyaha baarlamaanka Soomaaliya, Prof. Maxamed Cismaan Jawaari.