3/4/2021
Today from Hiiraan Online:  _
Wararka Maanta- Talaado, Dec 25, 2012
Dowladda Mareykanka oo Tababarro siinaysa Ciidamada Kenya ee Qaybta ka ah Howgalka AMISOM ee Soomaaliya


Talaado, December 25, 2012 (HOL) — Wasaaradda Gaashaandhigga Mareykanka ayaa shaacisay inay sannadka soo socda ee 2013 ay tababarro siinayso ciidamada Kenya ee qaybta ka ah howgalka AMISOM ee ka socda Soomaaliya.

War kasoo baxay wasaaradda difaaca Mareykanka ee Pentagon ayaa lagu sheegay in dalka Kenya la geynayo 200 askari oo Mareykanka ah, kuwaasoo tababarro aad u heer sarreeya siin doona ciidamada Kenya ee dalka Soomaaliya kula dagaalamaya Al-shabaab.

"Tababarradu waxay noqon doonaan kuwo la xiriira habka loola dagaalamo kooxaha argagaxisada ah, waayo waxaa la diyaariyay qorshe cusub oo lagula dagalaamayo Al-shabaab," ayuu yiri taliyaha ciidamada Mareykanka ee Afrika ku sugan ee loo yaqaan AFRICOM, Jen. Carter Ham.

Jen. Carter Ham ayaa intaas ku daray in qorshahan loogu talogalay in ciidamada 35 dal oo Afrika ku yaalla la siiyo tababar ku aaddan la dagaalanka argagaxisada, wuxuuna sheegay in Kenya ay noqotay dalka ugu horreeya ee ciidamadiisa ay siin doonaan tababarka.

Kumannaan askarta Kenya ah ayaa waxay qayb ka yihiin howgalka AMISOM ee ka socda Soomaaliya, kaasoo lagula dagaalamayo Al-shabaab laguna doonayo in lagu soo celiyo ammaanka iyo kala dambeynta Soomaaliya.

Dalka Mareykanka ayaa wuxuu udub-dhexaad u yahay dalalka taageera howlgallada ay ciidamada Midawga Afrika ka wadaan gudaha Soomaaliya iyo qaybo kale oo ka tirsan Qaaradda Afrika.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
12/25/2012 7:32 AM EST
Talaado, December 25, 2012 (HOL) — Dadweyne fara badan oo ay ku jireen arday ayaa maanta dibadbax ay uga soo horjeedaan muddo kororsiga madaxweynaha Puntland ka dhigay degmada Gaalkacyo ee xarunta gobolka Mudug, ku qaylinayay erayo ay uga soo horjeedaan muddo kororsiga xukuumadda.

12/25/2012 7:00 AM EST
Talaado, December 25, 2012 (HOL) — Ciidamada Soomaaliya, kuwa Raaskabooni iyo ciidamada Kenya ayaa maanta isaga baxay deegaanka Buulo-guduud ee gobolka Jubbada Hoose oo maalin ka hor ay kala waregeen Al-shabaab, iyado saraakiisha u hadashay dowladda ay ka bixitaankaas ku sheegeen xeelad dagaal.

12/25/2012 6:32 AM EST
Talaado, December 25, 2012 (HOL) — Roobab dabeylo wata ayaa tan iyo xalay ksa da'ayay xeebaha Puntland, gaar ahaan deegaanka Bandar-bayla ee goboka Bari iyo deegaanka Eyl ee gobolka Nugaal, iyadoo dooni u rarnayd ganacsato Soomaaliyeed oo ku socotay Muqdisho ay saakay ku dagtay xeebaha gobolka Bari.

12/25/2012 3:48 AM EST
Talaado, December 25, 2012 (HOL) —Xarakada Al-shabaab ayaa sheegay in ciidamada dowladda Soomaaliya iyo kuwa Amisom ay ku fashilmeen sugidda amniga magaalada Muqdisho ee caasimadda dalka Soomaaliya.

12/25/2012 2:31 AM EST
Talaado, December 25, 2012 (HOL) — Muslimiinta dalka Kenya ayaa sheegay inay taageerayaan xilliga doorashada madaxnimo ee dalka Kenya, Raila Odinga oo uu isbahaysiga CORD u doortay inuu uga qaybgalo doorashada madaxnimo ee Kenya.

12/25/2012 2:05 AM EST
Talaado, December 25, 2012 (HOL) — Madaxweynaha Soomaaliya, Xasan Sheekh Maxamuud ayaa xalay la kulmay Soomaalida ku nool dalka Uganda, isagoo ka dalbaday inay dhaqaale ku taageeraan dowladdiisa si ay dalka uga saarto xilliga adag ee uu ku jiro.

12/25/2012 1:45 AM EST
Talaado, December 25, 2012 (HOL) — Wasiirka arrimaha gudaha iyo ammaanka Qaranka, C/kariin Xuseen Guuleed, taliyaha ciidanka booliiska, Jen. Shariif Sheekhunaa Maye iyo taliyaha nabadsugidda gobolka Banaadir, Col. Khaliif Axmed Ereg ayaa xalay kormeer ku maray degmooyin ku yaalla Muqdisho.