3/29/2024
Today from Hiiraan Online:  _
Wararka Maanta- Arbaco, Dec 19, 2012
Dowladda Kenya oo Qoxootiga Soomaalida ee dalkeeda ku nool ku amartay in ay ku laabtaan Xeryaha Qoxootiga

Arbaco, December 19, 2012 (HOL) — Dowladda Kenya ayaa amar ku siisay qoxootiga Soomaalida ah ee ku nool magaalooyinka Kenya inay dib ugu laabtaan xeryaha qoxootiga, gaar ahaan xeryaha adduunka ugu weyn ee Dhadhaab.

Waaxda arrimaha qoxootiga ee dalka Kenya, ayaa sheegtay in amarkan uu qayb ka yahay xoojinta ammaanka gudaha Kenya, kaddib qaraxyo ka dhacayay bilihii ugu dambeeyay magaalooyinka Mombassa iyo Nairobi, gaar ahaan xaafadda ay dagto Soomaalida ee Islii.

"Xukuumadda Kenya waxay go'aansatay inay xirto goobihii qoxootiga laga diiwaan-gelin jiray, waxayna ku amartay qoxootiga inay dib ugu labataan xeryihii ay horay ugu jireen," ayuu yiri madaxa hay'adda qoxootiga Kenya, Badu Katelo.

Hay'adaha Qaramada Midoobay ayaa sheegay in tiro ka badan 30,000 oo qoxooti Soomaaliyeed ah ay ku nool yihiin magaalada Nairobi, halkaasoo ay ka dhacaan qaxyarada ugu badan oo hay'adha ammaanka Kenya ay ku eedeeyaan inay mas'uul ka tahay Al-shabaab.

Dhanka kale, danjiraha Soomaaliya u fadhiya dalka Kenya, Maxamed Cali Ameerika ayaa wax laga xumaado ku tilmaamay in ciidamada ammaanka Kenya ay xiraan dad aan dambiyo lahayn, isagoo sheegay inay madaxda Kenya kala hadleen arrintaas.

"Kenya waxaa ku jiran in ka badan 200 qof oo Soomaali ah, kuwaasoo wadooyinka laga qabtay, waxaanse dadaal ugu jirnaa sidii ay xorriyadooda ku heli lahaayeen," ayuu yiri dajire Ameerika oo sheegay in Kenya ay xaq u leedahay inay amnigeeda sugato, balse aan loo baahnayn inay xiraan dad aan dambiyo lahayn.

Dalka Kenya oo ay ciidammo kaga sugan yihiin Soomaaliya ayaa waxaa tan iyo markii uu ciidamadiisa u soo diray Soomaaliya ka dhacayay qaraxyo iyo falal ay ka mid yihiin toogashooyin lagu dilay askar ka tirsan ciidamada Kenya.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
12/19/2012 3:02 PM EST
Arboco, December 19, 2012 (HOL) - Kadib qaraxyo iyo weeraro is xigxigay oo ka dhacay xaafadda Islii ee ay Soomaalida ugu badan ka deggan tahay Nairobi caasimadda dalka Kenya ayaa waxay Hay'adda qaxootiga u qaabilsan qaramada midoobay ee UNHCR iyo dowladda Kenya ay isku waafaqeen in Qaxootiga Soomalaida ee ku sugan magaalooyinka kala duwan ee Kenya ay iska xaadiriyaan xeryaha Qaxootiga ee Kakuma ama Dadaab.

12/19/2012 8:33 AM EST
Arbaco, December 19, 2012 (HOL) — Markab la yiraahdo MV Daesan oo waddanka waqooyiga Kuuriya laga leeyahay oo 18-kii bishii hore ee November ay ciidamada badda Puntland kasoo qabteen meel dhowr iyo toban mayl u jirta Boosaaso xilli uu badda sibir (Shimiito) ku daadinayay ayaa lala baxsaday.

12/19/2012 8:19 AM EST
Arbaco, December 19, 2012 (HOL) — Madaxweynaha Soomaaliya, Xasan Sheekh Maxamuud ayaa maanta ku qaabilay madaxtooyada Soomaaliya ergayga gaarka ah ee Qaramada Middobay u qaabilsan arrimaah Soomaaliya danjire, Augustine Mahiga.

12/19/2012 8:05 AM EST
Arbaco, December 19, 2012 (HOL) — Dowladda Puntland ayaa si kulul uga jawaabtey eedeymo dhowr ah oo uu maanta u jeediyey Jen. Cabdullaahi Siciid Samatar oo ah siyaasi horay xilal kala duwan uga soo qabtay Puntland, dhowaanna shaaciyey in uu yahay musharrax u taagan xilka madaxweyne-nimada.

12/19/2012 8:01 AM EST
Arbaco, December 19, 2012 (HOL) — Hay'adda qoxootiga adduunka ee UNHCR ayaa sheegtay inay sii wadayso diiwaan-gelinta qoxootiga ku nool magaalooyinka Kenya, iyadoo dowladda Kenya ay dhawaan sheegtay inay xirtay xafiisyadii lagu diiwaan-gelin jiray qoxootiga.

12/19/2012 7:45 AM EST
Arbaco, December 19, 2012 (HOL) — Jen. Cabdilaahi Siciid Samatar oo ah siyaasi horay xilal kala duwan uga soo qabtay Puntland, dhawaanna sheegay inuu yahay musharrax u taagan xilka madaxtinimada ee Puntland ayaa waraysi uu maanta oo Arbaca ah bixiyay kaga hadlay arrimo badan.

12/19/2012 7:29 AM EST
Arbaco, December 19, 2012 (HOL) — Askari ka tirsan ciidamada dowladda Somalia ayaa baqonimadii maanta ku dhaawacay afaafka hore ee madaxtooyada sarkaal ka tirsanaa xarunta madaxtooyada, iyadoo askariga uu markiiba goobta ka baxsaday.

12/19/2012 7:05 AM EST
Arbaco, December 19, 2012 (HOL) — Kooxo hubeysan oo la sheegay inay wateen mootooyin ayaa maanta barqonimadii ku toogtay magaalada daarusalaam ganacsade Soomaali ah, iyagoo ka dhacay lacago fara badan oo uu watay.

12/19/2012 5:59 AM EST
Arbaco, December, 19, 2012 (HOL) – Xilli xaalado nolaleed oo aad u liita ay soo food saareen kumanaan qoysas ah oo bishii September ka barakacay fatahadii ku dhuftaay magaalada Baladweyne, ayaa dhinaca kale waxaa soo baxaya in la la lunsaday lacago malaayiin doolar ah oo ay hay’addaha safamalka ugu talagaleen in lagu kaalmeeyo dadka dhibaateysan.

12/19/2012 1:40 AM EST
Arbaco, December 19, 2012 (HOL) — Ciidammo ka tirsan kuwa dowladda Soomaaliya oo tiradooda lagu sheegay in ka badan boqol askari ayaa sameeyay gadood, kuwaasoo sheegay inaysan wax mushaaraad iyo xuquuq ah ka helin dowladda Soomaaliya muddo bilooyin ah.