7/12/2020
Today from Hiiraan Online:  _
Wararka Maanta- Isniin, Dec 17, 2012
Ra'iisul wasaaraha Soomaaliya oo ka warbixiyay Sababtii keenay in wasaarad walba uu u magacaabo laba wasiir ku-xigeen


Isniin, December 17, 2012 (HOL) — Ra'iisul wasaaraha Soomaaliya, Cabdi Faarax Shir-doon (Saacid) oo warbaahinta la hadlay kaddib kulan ay golaha wasiirradu ku yeesheen maanta xaruntooda Muqdisho ayaa ka hadlay sababihii keenay in wasaarad walba uu u magcaabo laba wasiir ku xigeen.


Mudane Saacid ayaa sheegay in sababtu ay tahay sidii ay wasiiraddu ay shaqooyin mucayin ah u yeelan lahaayeen, maadaama ay wasaarad walba ka kooban tahay laba wasaaradood iyo in ka badan.

"Wasaarad walba waxay ka koobanayd laba wasaaradood iyo ka badan, wasaarad walba waxaanu u sameynay laba wasiir ku xigeen oo kala qaybsan doona howlaha wasaaradaha horyaalla, taasina waxay keenaysaa in howlaha mid-mid loo gaaro," ayuu yiri ra'iisul wasaare Saacid.
 
Sidoo kale, ra'iisul wasaaraha oo hadalkiisa sii wata ayaa yiri: "Arrintan waxay keenaysaa in wasaaradihii ay noolaadaan, wasiirraduna ay helaan shaqooyin mucayin ah. Runtiina sidanna waxaan u aragnay inay ku jirto danta guud.".

Ra'iisul wasaaruhu wuxuu sheegay in shacabka iyo xidhibaannada uu uga mahad-celinayo sidii ay ula fahmeen qorshaha ay kusoo magacaabeen wasiir ku xigeennada. Isagoo intaas ku daray in shacabka uu sidoo kale uga mahadcelinayo sida ay ula fahmeen inaysan jirin Soomaali kala dhiman oo ay Soomaalidu siman tahay.

Dhanka kale, ra'iisul wasaaraha Soomaaliya wuxuu sheegay in kulankii maanta ay kasoo qaybgaleen dhammaan xubnaha golaha wasiirrada oo ay ku jiraan xubnihii dhawaan la magacaabay, isagoo sheegay in ajandayaashii ay ka hadleen oo dhan ay isla garteen.

"Waxaan ku faraxsanahay in maanta ay markii ugu horreysay kulan isugu yimaadaan golaha wasiirrada xukuumadda Soomaaliya oo dhan, marka laga reebo kuwo yaryar oo dalka dibaddiisa shaqooyin ugu maqan," ayuu yiri ra'iisul wasaaraha.

Mudane Saacid ayaa dhawaan dhameystiray golihiisa wasiirrada inkastoo uu wasiir ku xigeen ka mid ahaa kuwii uu magacaabay uu iska casilay xilkiisii, isagoo sheegay in xilkan uu yahay mid aan u cuntamayn beeshiisa.

Maxamede Xaaji Xuseen, Hiiraan Online
[email protected]
Muqdisho, Soomaaliya









Click here
12/17/2012 7:01 AM EST
Isniin, December 17, 2012 (HOL) — Madaxweynaha Soomaaliya, Xasan Sheekh iyo madaxweynaha Jabuuti Ismaaciil Cumar Geelle ayaa maanta ka hadlay munaasabad lagu xusayay sannadguuradii 40-aad ee kasoo wareegtay markii la qoray farta Soomaaliga, waxayna ku baaqeen in la xoojiyo horumarinta afka Soomaaliga.

12/17/2012 6:36 AM EST
Isniin, December 17, 2012 (HOL) — Ciidamada ammaanka dalka Kenya ayaa maanta buuxiyay xaafadda Islii ee magaalada Nairobi halkaasoo ay baaritaanno kawadaan, iyadoo la sheegay in ka badan 30-qof lagu qabqbatay baaritaannadaas.

12/17/2012 6:02 AM EST
Isniin, December 17, 2012 (HOL) — Bayaan kasoo baxay xafiiska warfaafinta ee Al-shabaab maanta oo Isniin ah ayaa lagu sheegay in Cumar Xamaami oo loo yaqaan Abuu-Mansuur Al-Amriiki uusan matelin kuna hadli karin magaca dagaalyahannada ajnabiga ah ee ka barbar dagaalama xoogagga Al-shabaab, sidoo kalena aysan jirin jago uu ka hayo Al-shabaab.

12/17/2012 5:24 AM EST
Isniin, December 17, 2012 (HOL) — Kooxo hubeysan ayaa isgoyska Aadan Cadde oo ku dhow suuqa bakaaraha ee Muqdisho ku toogtay mid ka mid ah saraakiisha nabadsugidda dowladda Soomaaliya oo magaciisa lagu soo gaabiyay Afloow; iyadoo kooxaha dilka geystay ay u suurogashay inay si nabadgalyo ah uga baxsadaan halkaas.

12/17/2012 1:50 AM EST
Isniin, December 17, 2012 (HOL) — Munaasabaddan oo ay ka qaybgalayaan madax uu ka mid yahay madaxweynaha Soomaaliya, Xasan Sheekh Maxamuud, madaxweynaha Jabuuti Ismaaciil Cumar Geelle, madaxweynaha Somaliland, Axmed Maxamed Maxamuud Siilaanyo, dublamaasiyiin ka socda dalalka Kenya iyo Itoobiya ayaa maanta ka furmaysa magaalada Jabuuti ee xarunta dalka Jabuuti.

12/17/2012 1:33 AM EST
Isniin, December 17, 2012 (HOL) — War-saxaafadeed kasoo baxay wasaaradda amniga ee Puntland oo nuqul ka mid ahi uu soo gaarey shabakadda HOL ayaa lagu sheegay in ciidamada Puntland ay gacanta ku dhigeen sahay ku socotay xoogagga Al-shabaab ee ku sugan buuraleyda Galgala ee gobolka Bari.

12/17/2012 1:30 AM EST
Isniin, December 17, 2012 (HOL) — Ugu yaraan hal qof ayaa ku dhintay laba qof oo kalena si xun ayay ugu dhaawacmeen saddex qarax oo xalay ka dhacay xaafadda Islii ee magaalada Nairobi, iyadoo booliiska Kenya ay ku eedeeyeen weerarradaas inay ka dambeysay Al-shabaab.

12/17/2012 1:28 AM EST
Isniin, December 17, 2012 (HOL) — Fadhi ay baarlamaanka Puntland ku yeesheen magaalada Garoowe shalay oo Axad ahayd ayay ku meel-mariyeen labo xeer oo ay horay ugu soo gudbiyeen wasaaradaha caafimaadka iyo deegaanka. Xeerarkan oo uu goluhu in muddo ah ka doodayey ayaa kala ah xeerka mamnuucista ka ganacsiga iyo soo dejinta bacaha iyo xeerka furashada xarumaha caafimaadka ee gaarka loo leeyahay.