7/8/2020
Today from Hiiraan Online:  _
Wararka Maanta- Isniin, Dec 17, 2012
Madaxweynayaasha Soomaaliya iyo Jabuuti oo ka Hadlay Munaasabad weyn oo lagu Xusayay Qoraalka Farta Soomaaliga


Isniin, December 17, 2012 (HOL) — Madaxweynaha Soomaaliya, Xasan Sheekh iyo madaxweynaha Jabuuti Ismaaciil Cumar Geelle ayaa maanta ka hadlay munaasabad lagu xusayay sannadguuradii 40-aad ee kasoo wareegtay markii la qoray farta Soomaaliga, waxayna ku baaqeen in la xoojiyo horumarinta afka Soomaaliga.


Munaasabadda ayaa sidoo kale waxaa ka hadlay aqoonyahanno Soomaaliyeed oo ka kala yimid dunida dacalladeeda kuwasaoo iyaguna hadallo guubaabo iyo dhiiri-gelin ah ka jeediyay munaasabaddan oo ka dhacday xarunta jaamacadda Jabuuti.

"Waa in la sameeyo manhaj mideysan oo ay wax ku bartaan caruurta Soomaaliyeed oo dhan, si afka uu noqdo mid ay Soomaalida oo dhan wax ku qori karaan waxna ku akhrin karaan," ayuu yiri madaxweyne Xasan Sheekh ka sheegay munaasabadda isagoo intaas ku daray in manhajka mideysan uu wax weyn ka tarayo xoojinta afka hooyo.

Sidoo kale, madaxweynaha Jabuuti oo isna ka hadlay munaasabadda ayaa sheegay in qoraalka afka Soomaaliga uu jirtay 40-sano muddo dheerna dadaal loogu jiray sidii loo horumarin lahaa, isagoo ka dalbaday Soomaalida meel walba oo ay joogaan inay ku dadaalaan xoojinta iyo horumarinta afkooda.

"Afka Soomaaliga waxaa loo qaybiyaa May iyo Maxaa-tiri, dhammaantood waxaa la doonayaa in la horumariyo, waayo luuqaddan waa middii aan u dhalanay inaan sare u qaadnana sharafteenna ayaa ku jirta," ayuu yiri Geelle.

Aqoon-yahannadii ka hadlay munaasabadda ayaa iyaguna ku boorriyay madaxdii kulankaas kasoo qaybgalay oo uu ku jiray madaxweynaha Somaliland inay ka sinnaadaan xoojinta afka, ayna ku dadaalaan sidii deegaannada ay ka taliyaan uga noqon lahaayeen luuqadda koowaad ee dadku ku hadlo iyo midda lagu shaqeeyo.

Ugu dambeyn, waxaa lagu soo bandhigay munaasabadda Qaamuus af Soomaali ah kaasoo ay ku jiraan 40,000 oo eray, waxaana qaamuuskan uu noqonayaa kii ugu horreeyay oo baaxad weyn leh oo loo qoro dadka ku hadla afka Soomaaliga.

Kulan looga hadlayo xoojinta iyo horumarinta afka Soomaaliga ayaa shanta maalin ee soo socota ka socon doona dalka Jabuuti, waxaana kulankaas lagu wadaa inay kasoo baxaan qodobbo lagu horumarinayo afka hooyo.

Maxamede Xaaji Xuseen, Hiiraan Online
[email protected]
Muqdisho, Soomaaliya









Click here
12/17/2012 7:15 AM EST
Isniin, December 17, 2012 (HOL) — Ra'iisul wasaaraha Soomaaliya, Cabdi Faarax Shir-doon (Saacid) oo warbaahinta la hadlay kaddib kulan ay golaha wasiirradu ku yeesheen maanta xaruntooda Muqdisho ayaa ka hadlay sababihii keenay in wasaarad walba uu u magcaabo laba wasiir ku xigeen.

12/17/2012 6:36 AM EST
Isniin, December 17, 2012 (HOL) — Ciidamada ammaanka dalka Kenya ayaa maanta buuxiyay xaafadda Islii ee magaalada Nairobi halkaasoo ay baaritaanno kawadaan, iyadoo la sheegay in ka badan 30-qof lagu qabqbatay baaritaannadaas.

12/17/2012 6:02 AM EST
Isniin, December 17, 2012 (HOL) — Bayaan kasoo baxay xafiiska warfaafinta ee Al-shabaab maanta oo Isniin ah ayaa lagu sheegay in Cumar Xamaami oo loo yaqaan Abuu-Mansuur Al-Amriiki uusan matelin kuna hadli karin magaca dagaalyahannada ajnabiga ah ee ka barbar dagaalama xoogagga Al-shabaab, sidoo kalena aysan jirin jago uu ka hayo Al-shabaab.

12/17/2012 5:24 AM EST
Isniin, December 17, 2012 (HOL) — Kooxo hubeysan ayaa isgoyska Aadan Cadde oo ku dhow suuqa bakaaraha ee Muqdisho ku toogtay mid ka mid ah saraakiisha nabadsugidda dowladda Soomaaliya oo magaciisa lagu soo gaabiyay Afloow; iyadoo kooxaha dilka geystay ay u suurogashay inay si nabadgalyo ah uga baxsadaan halkaas.

12/17/2012 1:50 AM EST
Isniin, December 17, 2012 (HOL) — Munaasabaddan oo ay ka qaybgalayaan madax uu ka mid yahay madaxweynaha Soomaaliya, Xasan Sheekh Maxamuud, madaxweynaha Jabuuti Ismaaciil Cumar Geelle, madaxweynaha Somaliland, Axmed Maxamed Maxamuud Siilaanyo, dublamaasiyiin ka socda dalalka Kenya iyo Itoobiya ayaa maanta ka furmaysa magaalada Jabuuti ee xarunta dalka Jabuuti.

12/17/2012 1:33 AM EST
Isniin, December 17, 2012 (HOL) — War-saxaafadeed kasoo baxay wasaaradda amniga ee Puntland oo nuqul ka mid ahi uu soo gaarey shabakadda HOL ayaa lagu sheegay in ciidamada Puntland ay gacanta ku dhigeen sahay ku socotay xoogagga Al-shabaab ee ku sugan buuraleyda Galgala ee gobolka Bari.

12/17/2012 1:30 AM EST
Isniin, December 17, 2012 (HOL) — Ugu yaraan hal qof ayaa ku dhintay laba qof oo kalena si xun ayay ugu dhaawacmeen saddex qarax oo xalay ka dhacay xaafadda Islii ee magaalada Nairobi, iyadoo booliiska Kenya ay ku eedeeyeen weerarradaas inay ka dambeysay Al-shabaab.

12/17/2012 1:28 AM EST
Isniin, December 17, 2012 (HOL) — Fadhi ay baarlamaanka Puntland ku yeesheen magaalada Garoowe shalay oo Axad ahayd ayay ku meel-mariyeen labo xeer oo ay horay ugu soo gudbiyeen wasaaradaha caafimaadka iyo deegaanka. Xeerarkan oo uu goluhu in muddo ah ka doodayey ayaa kala ah xeerka mamnuucista ka ganacsiga iyo soo dejinta bacaha iyo xeerka furashada xarumaha caafimaadka ee gaarka loo leeyahay.