7/11/2020
Today from Hiiraan Online:  _
Wararka Maanta- Isniin, Dec 17, 2012
Baarlamaanka Puntland oo Cod Aqlabiyad ah ku Ogolaaday Xeerka Furashada Xarumaha Caafimaadka iyo kan Isticmaalka Bacaha


Isniin, December 17, 2012 (HOL) — Fadhi ay baarlamaanka Puntland ku yeesheen magaalada Garoowe shalay oo Axad ahayd ayay ku meel-mariyeen labo xeer oo ay horay ugu soo gudbiyeen wasaaradaha caafimaadka iyo deegaanka. Xeerarkan oo uu goluhu in muddo ah ka doodayey ayaa kala ah xeerka mamnuucista ka ganacsiga iyo soo dejinta bacaha iyo xeerka furashada xarumaha caafimaadka ee gaarka loo leeyahay.

Fadhiga maanta oo ay soo xaadireen 38 xildhibaan ayuu goluhu si aqlabiyad leh ku meel mariyey labadan qodob, iyagoo sheegay in dood dheer kadib ay isla qaateen in ay xeerarkan sida ugu dhaqsaha badan u meel mariyaan maadaama ay yihiin kuwo lagama maarmaan ah saameyn weynna ku leh bulshada dhexdeeda.

Isticmaalka bacaha ayaa horay waxaa uga dayriyey mas'uuliyiinta sare ee dowladda, gaar ahaan madaxweynaha oo sheegay in dowladdu ay sharci adag kasoo saari doonto, maadaama ay dhibaato weyn ku hayaan deegaanka, caafimaadka bulshada iyo nolosha duunyada la dhaqdo.

Sidoo kale goobaha caafimaadka ee gaarka loo leeyahay oo iyagu sanadihii u danbeeyey si aad ah ugu soo badanayey gudaha Puntland ayaa horay waxaa digniin uga soo jeedisey wasaaradda caafimaadka ee Puntland. Arimaha ugu waaweyn ee goobahaas lagu dhaliilayna waxaa kamid ah: in ay ka howlgalaan dad aan aqoon fiican lahayn.

Waxaana xusid mudan in sanadkan gudihiisa gacanta lagu dhigay dad ajaanib ah oo u badnaa Keenyaati, kuwaasoo sheegtay in ay dhakhaatiir yihiin, haseyeeshee markii baaritaan lagu sameeyey aqoonsiyadooda iyo weliba shahaadooyinka ay wataan, la ogaadey in ay been abuur yihiin.

Xeerarka cusub ee uu maanta golaha baarlamaanka Puntland ansixiyey ayaa noqonaya kuwo ay si aad ah usoo dhoweeyaan qaybaha kala duwan ee bulshadu, iyadoo horay baarlamaanku intii lagu guda jirey sanadkan sii dhamaanaya ee 2012 ay meel mariyeen xeerar 10 kor u dhaafaya, qaar kalena ay laaleen.

Maxamed Salaad Xaaji Dirir, Hiiraan Online
[email protected]
Puntland, Soomaaliya










Click here
12/17/2012 7:15 AM EST
Isniin, December 17, 2012 (HOL) — Ra'iisul wasaaraha Soomaaliya, Cabdi Faarax Shir-doon (Saacid) oo warbaahinta la hadlay kaddib kulan ay golaha wasiirradu ku yeesheen maanta xaruntooda Muqdisho ayaa ka hadlay sababihii keenay in wasaarad walba uu u magcaabo laba wasiir ku xigeen.

12/17/2012 7:01 AM EST
Isniin, December 17, 2012 (HOL) — Madaxweynaha Soomaaliya, Xasan Sheekh iyo madaxweynaha Jabuuti Ismaaciil Cumar Geelle ayaa maanta ka hadlay munaasabad lagu xusayay sannadguuradii 40-aad ee kasoo wareegtay markii la qoray farta Soomaaliga, waxayna ku baaqeen in la xoojiyo horumarinta afka Soomaaliga.

12/17/2012 6:36 AM EST
Isniin, December 17, 2012 (HOL) — Ciidamada ammaanka dalka Kenya ayaa maanta buuxiyay xaafadda Islii ee magaalada Nairobi halkaasoo ay baaritaanno kawadaan, iyadoo la sheegay in ka badan 30-qof lagu qabqbatay baaritaannadaas.

12/17/2012 6:02 AM EST
Isniin, December 17, 2012 (HOL) — Bayaan kasoo baxay xafiiska warfaafinta ee Al-shabaab maanta oo Isniin ah ayaa lagu sheegay in Cumar Xamaami oo loo yaqaan Abuu-Mansuur Al-Amriiki uusan matelin kuna hadli karin magaca dagaalyahannada ajnabiga ah ee ka barbar dagaalama xoogagga Al-shabaab, sidoo kalena aysan jirin jago uu ka hayo Al-shabaab.

12/17/2012 5:24 AM EST
Isniin, December 17, 2012 (HOL) — Kooxo hubeysan ayaa isgoyska Aadan Cadde oo ku dhow suuqa bakaaraha ee Muqdisho ku toogtay mid ka mid ah saraakiisha nabadsugidda dowladda Soomaaliya oo magaciisa lagu soo gaabiyay Afloow; iyadoo kooxaha dilka geystay ay u suurogashay inay si nabadgalyo ah uga baxsadaan halkaas.

12/17/2012 1:50 AM EST
Isniin, December 17, 2012 (HOL) — Munaasabaddan oo ay ka qaybgalayaan madax uu ka mid yahay madaxweynaha Soomaaliya, Xasan Sheekh Maxamuud, madaxweynaha Jabuuti Ismaaciil Cumar Geelle, madaxweynaha Somaliland, Axmed Maxamed Maxamuud Siilaanyo, dublamaasiyiin ka socda dalalka Kenya iyo Itoobiya ayaa maanta ka furmaysa magaalada Jabuuti ee xarunta dalka Jabuuti.

12/17/2012 1:33 AM EST
Isniin, December 17, 2012 (HOL) — War-saxaafadeed kasoo baxay wasaaradda amniga ee Puntland oo nuqul ka mid ahi uu soo gaarey shabakadda HOL ayaa lagu sheegay in ciidamada Puntland ay gacanta ku dhigeen sahay ku socotay xoogagga Al-shabaab ee ku sugan buuraleyda Galgala ee gobolka Bari.

12/17/2012 1:30 AM EST
Isniin, December 17, 2012 (HOL) — Ugu yaraan hal qof ayaa ku dhintay laba qof oo kalena si xun ayay ugu dhaawacmeen saddex qarax oo xalay ka dhacay xaafadda Islii ee magaalada Nairobi, iyadoo booliiska Kenya ay ku eedeeyeen weerarradaas inay ka dambeysay Al-shabaab.