Hoggaamiye Kooxeedyadii horay loo diiday oo loo ogolaaday in Baarlamaanka cusub ay ka mid noqdaan iyo Muran ka taagan Arrintan
Arbaco, Ogoosto 29, 2012 (HOL) — Maxkamada sare ee dalka ayaa go'aamisay inay hogaamiye kooxeedyadii horay loogu diiday inay baarlamaanka ka mid noqdaan ay ka mid noqon karaan baarlamaanka, iyadoo baabi'isay diidmadii guddiga farsamada kasoo baxday.
Gudoomiyaha Maxkamada sare ayaa sheegay in xildhibaanadan oo tiradoodu tahay 15 xubnood ay xaq u leeyihiin inay baarlamaanka ka mid noqdaan maadaama aanay jirin maxkamad ku xukuntay dambiyo dagaal oo ay horay u geysteen.
"Eedeeymihii xubnahan loosoo jeediyay waa kuwo waxba kama jiraan ah, waayo shuruudihii lagu ogolaan karo ka mid noqoshada baarlamaanka kuma jirin in ruux aan dambi lahayn loo diido, ragganna waa la ogaa. Haddii ruux loogu diidayo inuu ka mid noqdo baarlamaanka hoggaamiye kooxeed buu ahaa waxaa lagu soo dari lahaa shuruudaha," ayuu lagu yiri qoraal kasoo baxay maxkamada sare ee dalka.
Xubnaha loo ogolaaday inay ka mid noqdaan baarlamaanka ee horay loo diiday ayaa waxay kala yihiin:
- Aadan Maxamed Nuur (Aadan Madoobe)
- Maxamed Qanyare Afrax
- Cabdiraxmaan Xaaji Aadan (Ibbi)
- Cabdullaahi Sheekh Ismaaciil
- Axmed Ducaale Geelle Xaaf
- Bootaan Ciise Caalin
- Cumar Maxamuud Maxamed (Filish)
- Maxamed Ibraahim Xaabsade
- Maxamed Xuseen Isaaq Afaraale
- Maxamed Xuseen Nuur Xagaafi
- Cabdicasiis Sheekh Yuusuf
- Xirsi Aadan Rooble
- Cabdulqaadir Xaaji Maxamed Yuusuf (Luga-Dheere)
- Maxamed Faarax Jimcaale
- Aadan Maxamed Nuur Xaydar (Saransoor)
Maxkamadda sare ayaa sheegtay inuusan jirin go'aan ka horimaan kara inay ka mid noqdaan baarlamaanka cusub, iyadoo lagu wado in la dhaariyo inayna si toos ah uga mid noqdaan baarlamaanka Soomaaliya oo lagu wado inuu toddobaadyo kaddib doorto madaxweynaha cusub ee Soomaaliya.
Go'aanka maxkamadda ayaa waxaa ka dhashay muran xooggan, iyadoo xubnaha guddiga ay sheegeen in go'aanka maxkamadda sare uusan ahayn mid la aqbali karo, iyagoo sheegay inuu weli jiro go'aankii loogu diiday inay baarlamaanka ka mid noqdaan.
Xubnahan oo la siiyay kaararkooda aqoonsiga ayaa waxay kulammo kula qaateen madaxtooyada Soomaaliya ee uu waqtigiisu sii dhamaanayo, Shariif Sheekh Axmed kaasoo dadaal dheeraad ah u galay sidii ay xubnahaan baarlamaanka uga mid noqon lahaayeen.
Maxamed Xaaji Xuseen, Hiiraan Online
[email protected]Muqdisho, Soomaaliya
