Xildhibaan Jeylaani Iikar oo loo doortay Guddoomiye ku xigeenka Baarlamaanka Soomaaliya
 |
| Guddoomiye ku xigeenka 1aad ee Baarlamaanka Jeylaani Iikar |
Tuesday, August 28, 2012Talaado, August 28, 2012(HOL): Waxaa goor dhaweyd soo gebagebowday doorashada guddoomiye ku xigeenka koowaad ee Golaha Baarlamaanka Soomaaliya, kaasi oo ay isu soo taageen illaa 10 musharrax.
Tobanka Musharrax ee jagadan isu soo taagay ayaa waxay kala ahaayeen:
Xildhibaan Jeylaani Nuur Iikar
Xildhibaan C/weli Ibraahim Muudey
Xildhibaan Bashiir Maxamed Jaamac
Xildhibaan Maxamed Cabdi Xayir Maareeye
Xildhibaan Maxamed Cusmaan
Xildhibaan Ibraahim Saalax Deyfullaah
Xildhibaan Tahliil Maxamed Cabdi
Xildhibaan Maxamed Cumar Dalxa
Xildhibaan Cabdalla Boos Axmed
Xildhibaan Cabdixakiin Cige Guuleed
Xildhibaan Maxamed Cali Xagaa
Wareeggii koowaad ee codbixinta markii ay soo gebagebowday ayaa waxaa wareeggaas ku haray 6 xildhibaan oo aanan helin codadkii u saamixi lahaa in ay gudbaan wareegga labaad, sidaasna waxaa wareegga labaad ugu soo gudbay Xildhibaan Jeylaani Nuur Iikar, Xildhibaan C/weli Ibraahim Muudey, Xildhibaan Bashiir Maxamed Jaamac iyo Xildhibaan Maxamed Cabdi Xayir Maareeye, waxaana wareeggaas markii uu dhammaaday isu soo haray Xildhibaan Jeylaani Nuur Iikar oo helay 91 cod iyo Xildhibaan C/weli Ibraahim Muudey oo helay 58 cod, kaddibna waxaa in uu wareeggii ugu dambeeyay ka tanaasulay ku dhawaaqay Xildhibaan C/weli Ibraahim Muudey.
Wararka naga soo gaaraya xarunta Dugsiga Tababarka Booliska ee Jen. Kaahiye (Ex. School Polizia) ayaa waxay sheegayaan in ay billaabatay doorashada guddoomiye ku xigeenka labaad ee Golaha Baarlamaanka, waxaana jagadan isu soo taagay Xildhibaan Cusmaan Cilmi Boqorre, Xildhibaan Mahad Cabdalla Cawad, Xildhibaan Maxamed C/llaahi Xasan iyo Xildhibaan Cabdullaahi Cusmaan Ducaale, waxaana la sugayaa xildhibaanka xilka ku soo baxa.
Doorashadii maanta ee Guddoomiyenimada Baarlamaanka Soomaaliya oo uu ku guuleystay Xildhibaan Maxamed Cusmaan Jawaari ayaa waxaa lagu kala baxay wareegga koowaad, waxayna guushaas timid kaddib markii uu tanaasulay Xildhibaan Cali Khaliif Galeyr.
Waxaa xusid mudan in uu weli howsha Baarlamaanka uu sii wado Guddoomiyaha KMG ah ee Baarlamaanka Jen. Muuse Xasan Cabdulle, wuxuuna howsha sii wadi doonaa illaa guddoomiyaha baarlamaanka Xildhibaani Jawaari loo dhaariyo xilka guddoomiyenimada. Guddoomiyaha cusub ee Baarlamaanka ayaa markii maanta loo doortay xilkan waxaa ammaankiisa la wareegay Ciidamada Amisom iyo kuwa Dowladda Soomaaliya.
Howsha ugu horreysa ee hortaalla Baarlamaanka Soomaaliya ayaa waxay tahay in uu soo doorto Madaxweynaha Soomaaliya hoggaamin doona, kaasi oo noqon doono dhowr iyo 20 sano kaddib madaxweyne dowlad aan KMG ahayn oo ay Soomaaliya leedahay, taasina waxay dadka iyo dalka Soomaaliyeed u tahay sharaf maadaama dalal badan oo caalamka ah aysan Soomaaliya ula dhaqmi jirin sida dowlad dhameystiran.
Salaad Iidow Xasan (Xiis), Hiiraan Online
[email protected]
