Hay'adda SHARDO oo Boqol Dhallinyaro ah u soo Gabgabeysay Tababar lagu barayay Aqoon la xiriirta Ganacsiga
Sabti, Ogoosto 25, 2012 (HOL) — Munaasabad ay soo qabanqaabisay hay'ad lagu magacaabo SHARDO oo tababar loogu soo gabagabeynayay boqol dhallinyaro ah ayaa shalay ka dhacday magaalada Muqdisho, waxaana ka qaybgalay mas'uuliyiin ka socday dowladda Soomaaliya iyo maamulka gobolka Banaadir.
Tababarkan oo socday muddo sideed bilood ah ayay dallinyaradu ku baranayeen laba xirfadood oo kala ah: maamulida ganacsiga iyo dhisidda iskaashatooyin ganacsi waxaana barnaamijkaan maal-geliyay hay'ad lagu magacaabo JICA oo dalka Japan laga leeyahay iyadoo dhaqaalaha soo marisay hay'adda shaqaalaha adduunka ILO.
Dhallinyarada tababarka dhameysatay ayaa waxay ahaayeen 25 kooxood oo koox walba ay ka koobnayd afar qof, kuwaasoo la guddoonsiiyay lacag dhan $2000 oo dollarka Mareyanka ah.
Lacagta ayaa la sheegay in dhallinyarada ay ku sameynayaan shirkado ganasi si loo hubiyo wixii ay ka faa'iideen tababarkooda, iyadoo mas'uuliyiinta SHARDO ay xuseen in dhallinyarada loo sameeyay sharci hoosaadyo ay isku maamulayaan.
Mashruucaan oo lagu magacaabo "Youth for change" (Isbedelka dhalinyarada) ayaa waxaa hadallo kala duwan ka jeediyay guddoomiyaha SHARDO, Abuukar Sheekh Maxamed, wuxuuna u mahad-celiyay dhammaan dadkii kasoo qeyb-galay munaasabadda tababarka loogu soo xirayay dhallinyarada.
"Dhallinyarada sideeda bilood ah baranayay xirfadaha kala duwan ee maamulka ganacsiga iyo dhisidda iskaashatooyinka ganacsiga waa inay ka faa'iideystaan waxyaabihii ay baranayeen," ayuu yiri guddoomiye Abuukar Sheekh oo ku booriyay dhallinyaradaasi inay ka dhabeeyaan ganacsigooda ayna sii amba qaadaan howlaha horyaala.
Munaasabadda xiritaanka tababarka dhallinyarada oo ka dhacday hoteel City Plasa ee magaalada Muqdisho ayaa waxaa sidoo kale goob-joog ka ahaa 25 ruux oo kooxdiiba ay hal qof ka wakiil ahayd dhallinyarada tababarka loosoo xiray, kuwaasoo si weyn ugu mahad-celiyay hay'adaha ay ugu horeyso SHARDO oo iyagu fulineysa barnaamijkaan.
Dhinaca kale; madaxda kasoo qayb-galay munaasabadaasi ayaa waxaa mid ahaa wasiirka wasaaradda shaqada, dhallinyarada iyo isboortiga Aweys Xadaad ayaa khudbad gaaban oo uu halkaasi ka jeediyay wuxuuna kula dardaarmay dhallinyarada inaysan iska lumin fursadda ay heystaan isla markaana ay ka faa'iideystaan waxyaabihii ay soo barteen.
Madaxda dowladad, maamulka gobolka Banaadir, guddoomiyaha degmada C/casiis iyo xubin ka socotay wasaaradda arrimaha gudaha ayaa waxaa sidoo kale ka qayb-galay xubno ka socday hay'ado ay ka mid yihiin: SOYDEN, DAN-GUUD, CPD, UNDP, ILO iyo IOM iyo marti sharaf kale oo lagu casuumay inay ka soo qayb-galaan.
Maxamed Xaaji Xuseen, Hiiraan Online
[email protected]Muqdisho, Soomaaliya
