3/29/2024
Today from Hiiraan Online:  _
Wararka Maanta- Arbaco, Apr 4 , 2012
Madaxdii Isboortiga Soomaaliyeed oo ku geeriyootay Qaraxii ka dhacay Tiyaatarka


Arbaco, April 04, 2012(HOL): Saaka barqadii abbaarihii 11:45 daqiiqo ayaa waxaa uu qarax ka dhacay gudaha tiyaatarka qaranka Soomaaliyeed, kaasi oo geystay dhimasho iyo dhaawac soo gaartay dad muhiim u ah bulshada Soomaaliyeed.

Qaraxa oo uu fuliyay qof dumar ah oo ismiidaamisay ayaa waxaa ku geeriyooday afar ruux oo ay ka mid yihiin Guddoomiyihii Guddiga Olombikada Soomaaliyeed  (GOS) Aadan Xaaji Yabarow Wiish iyo Guddoomiyihii Xiriirka Soomaaliyeed ee Kubadda Saciid Maxamuud Nuur Mugaambe oo labaduba xilal sare ka hayay Isboortiga Soomaaliya.

Labadan Marxuum ee geeriyooday ayaa xilligii uu burburka dalka ku jiray waxay si aad ah isugu mashquuliyeen in ay horumariyaan Isboortiga Soomaaliya, isla markaana gaarsiiyay in Soomaaliya ay ka qeybgasho cayaaraha caalamiga ah iyo kuwa heer gobol, tiiyoo la ogsoon yahay in dalka Soomaaliya uu muddo dheer burbur ku soo jiray.


Qaraxa ayaa waxaa sidoo kale ku dhaawacmay xubno ka mid ah golayaasha Dowladda iyo dad rayid ah, kuwaasi oo markii qaraxa dhacayay daawanayay barnaamij lagu maamuusayay sanadguuradii koowaad ee ka soo wareegatay dib-u-yagleelka Taleefashinak Qaranka Soomaaliyeed iyo sanadguuradii 28aad ee ka soo wareegatay markii la aas-aasay TV-ga Qaranka Soomaaliyeed.

Qaraxa kaddib ayaa waxaa saxaafadda la hadlay Ra’iisal Wasaaraha Xukuumadda Soomaaliya C/weli Maxamed Cali Gaas oo si weyn u cambaareeyay dadkii qaraxaas ka dambeeyay, isagoo tilmaamay in ay qaraxaas ka dambeeyeen argagixisada caalamiga ah iyo Al-Shabaab.

“Mar kasta oo ay wiiqanto awoodda kooxahan argagixisada ah, waxay ku soo noqdaan shacabka oo ay laayaan, waxaanse u sheegeynaa in qaraxyada iyo waxyaabaha ay sameynayaan aysan waxba u dhimmi doonin howlaha Dowladda iyo in ay sugto ammaanka”ayuu yiri Ra’iisal Wasaare C/weli oo intaas ku daray in dowladda ay labuulaabi doonto wax-ka-qabashada ammaanka, aysanna ka hari doonin Al-shabaab illaa ay dalka ka xoreeyaan.

Intaas kaddib Ra’iisal Wasaaraha Soomaaliya C/weli Maxamed Cali waxaa uu tacsi u diray shacabka Soomaaliyeed isagoo uga tacsiyeeyay dadkii qaraxaas ku dhintay, sidoo kalena u rajeeyay caafimaad dadkii qaraxa ku dhaawacmay.



Wixii ku soo kordha kula soco wararkii dambe haddii Alle idmo

Salaad Iidow Xasan (Xiis), Hiiraan Online
[email protected]













Click here
4/4/2012 8:34 AM EST
Arbaco, Abriil 04, 2012 (HOL) — Warsaxaafadeed kasoo baxay taliska ciidamada Midowga Afrika ee AMISOM, ayaa lagu sheegay in weerarkii Tiyaatarka uu ahaa mid ismiidaamin ah oo ay fulisay haweeney, kaasoo ay ku dhinteen dad shacab ah kuwo kalena ay ku dhaawacmeen.

4/4/2012 8:09 AM EST
Arbaco, Abriil 04, 2012 (HOL) — Ra'iisul wasaaraha Soomaaliya, Cabdiweli Maxamed Cali oo ka hadlay qaraxii ka dhacay Tiyaatarka Muqdisho ayaa sheegay inuusan wax khasaare ah kasoo gaarin, isagoo ku tilmaamay qarax fulaynimo ah oo waxyeello ay kasoo gaartay dad shacab ah.

4/4/2012 7:53 AM EST
Arbaco, Abriil 04, 2012 (HOL) — Xarakada Al-shabaab ayaa sheegtay inay iyadu mas'uul ka ahady qarax khasaare badan geystay oo ka dhacay Tiyaatarka Muqdisho maanta, xilli ay ka socotay xaflad lagu maamuusayay furitaankii telefishinkta Qaranka.

4/4/2012 5:33 AM EST
Arbaco, Abriil 04, 2012 (HOL) — Qarax sababay dhimsho iyo dhaawaca fara badan maanta oo Arbaco ah ayaa ka dhacay golaha murtida iyo madadaaalada ee Muqdisho oo ay ka socotay munaasabad lagu xusayay sannadguuradii koowaad ee kasoo wareegtay markii dib loo howlgeliyay telefishinka dowladda Soomaaliya.

4/4/2012 3:15 AM EST
Arbaco, Abriil 04, 2012 (HOL) — Magaalada Muqdisho oo ah xarunta dalka Soomaaliya oo ay xasillooni-darro ay ka jirtay muddo 21-sano ah ayaa u muuqata xiligan mid xaaladdeeda nololeed ay caadi kusoo laabanayso.

4/4/2012 2:41 AM EST
Arbaco, Abriil 04, 2012 (HOL) — Xarakada Al-shabaab ayaa sheegtay inay saakay la wareegeen gacan ku haynta degmada Ceelbarde ee gobolka Bakool, halkaasoo saldhig u ahayd ciidamada dowladda KMG ah saddexdii sano ee lasoo dhaafay.

4/4/2012 2:39 AM EST
Arbaco, Abriil 04, 2012 (HOL) — Guddoomiyaha guddiga fulinta ee ururka Ahlusunna Waljamaaca, Sheekh Maxamed Yuusuf Xeefow ayaa sheegay in ciidamada Itoobiya ee gacanta ku siinaya dagaallada ay kula jiraan Al-shabaab ay isaga bixi doonaan deegaannada ay ka taliyaan dhammaadka bishan Abriil.