3/29/2024
Today from Hiiraan Online:  _
Wararka Maanta- Talaado, Oct 18, 2011
Ra'iisul wasaaraha Kenya oo sheegay in ciidamadooda ay u galeen Somalia si ay ula dagaalamaan Al-shabaab


Talaado, Oktoobar 18, 2011 (HOL) — Ra'iisul wasaaraha dalka Kenya, Raila Odinga ayaa sheegay markii ugu horreysay in ciidamadooda ay u galeen gudaha Somalia sidii ay ula dagaalami lahaayeen Xarakada Al-shabaab oo uu ku sheegay koox Argagaxiso ah.

Mr. Odinga wuxuu sheegay in dowladdiisu ay go'aankan qaadatay markii dunidu soo dhaweysay go'aankooda ah inay ciidamadooda u tallaabaan Soomaalia, sidoo kalena ay dalalka gobolku soo dhaweeyeen go'aankan.

"Xarakada Al-shabaab waxay khatar muuqata ku tagay dalalka gobolka iyo dunida oo dhan. Waxay isku dayeen inay soo weeraraan dalkeenna, taasoo walaac weyn nagu dhalisay," ayuu yiri Odinga oo intaas raaciyay: "Faragelinta aan ku sameynay Soomaaliya ma ahan mid waxyeello u geysanaysa madaxbannaanida dalka aynu dariska nahay ee Soomaaliya."

Ra'iisul wasaaraha Kenya, wuxuu sheegay in Somalia aysan ka jirin madaxbannaani la sheegi karo - maxaa yeelay kama jirto dowlad awood leh oo sugi karta ammaanka guud ee dalka Soomaaliya.

"Ciidamadeenu waxay ku sugan yihiin deegaannada ku dhow soohdinta ay Kenya iyo Soomaaliya wadaagaan, goobahaas oo ay horay u maamuli jirtay Al-shabaab waxayna ka baxeen markii ay ciidamadeennu gudaha u galeen Soomaaliya," ayuu Odinga ku daray hadalkiisa.

Ra'iisul waasaraha Kenya ayaa sheegay inay ka go'an tahay inay ka sifeeyaan gobolka Xarakada Al-shabaab, isagoo dunida ugu baaqay inay dalkiisa gacan ku siiyaan sidii ay howshan ugu guuleysan lahaayeen.

Xukuumadda Kenya ayaa horay ugu eedeysay Al-shabaab inay afduubyo dhowr ah ka geysteen dalkooda, inkastoo afhayeen u hadlay kooxdan uu sheegay inaysan wax lug ah ku lahayn afduubyada ka dhacaya dalka Kenya.

Dowladda Soomaaliya ayaan weli si rasmi ah shaaca uga qaadin in ciidamada dalka Kenya ay gudaha u soo galeen dalka Soomaaliya, iyadoo afhayeenka xukuumadda uu sheegay in Kenya, Soomaaliya iyo Itoobiya ay ku heshiiyeen sidii ay uga wada-shaqeyn lahaayeen ammaanka dalalkooda.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
10/18/2011 11:48 AM EST
Ammaanka Caasimadda dalka Kenya ee Nairobi ayaa sare loo qaaday, iyadoo laga cabsi qabo weeraro ka yimaada xarakada Alshabaab oo ku hanjabtay inay weerari doonto magaalooyinka Kenya , kadib markii ay Kenya ciidamadeeda ka gudbeen xadka, iyagoo baadi goobaya dagaal yahanada Alshabaab.

10/18/2011 11:18 AM EST
Golaha wasiirrada ee dalka Kenya oo maanta isugu yimid shir degdeg ah ayaa si aan qarsoodi lahayn u taageeray weerarka ay Kenya ku tilmaantay inuu yahay mid ay ku bartilmaameedsanayso xarakada Alshabaab oo ay ciidamadeedu ku galeen gudaha Jamhuuriyadda Soomaaliya.

10/18/2011 9:51 AM EST
Talaado, October 18, 2011(HOL): Qarax geystay dhimashada 3 ruux iyo dhaawaca dad kale oo aad u badan ayaa wuxuu goor dhaweyd ka dhacay Magaalada Muqdisho ee caasimadda u ah Dalka Soomaaliya.

10/18/2011 9:51 AM EST
Talaado, October 18, 2011(HOL): Dowladda Soomaaliya iyo Kenya ayaa isu baheysanaya la dagaallanka kooxda Al-Shabaab, iyadoo maanta ay Muqdisho booqdeen Wasiirrada Arrimaha Dibadda iyo Gaashaandhigga ee Dowladda Kenya.

10/18/2011 7:55 AM EST
Saxafiga Soomaaliyeed ee Faarax Maxamed Cali (Faarax Blue) ayaa xubin ka noqday guddiga Saxafiyiinta ajaanibta ah ee ka shaqeeyay dalalka bariga iyo bartamaha Africa ee Foreign Correspondents’ Association of East Africa (FCA).

10/18/2011 7:31 AM EST
Talaado, Oktoobar 18, 2011 (HOL) — Dagaalyahanada badan oo ka tirsan Xarakada Al-shabaab ayaa buuxiyay degmada Afmadow ee gobolka Jubbada hoose, iyadoo dadkii ku noolaa ay bilaabeen inay degmadaas uga baxaan sababo cabsi dagaal ah awgood.

10/18/2011 7:22 AM EST
Talaado, Oktoobar 18, 2011 (HOL) — Sheekh Xasan C/llaahi Xirsi (Sheekh Xasan Turki) oo ka mid ahaa saraakiisha ururka Raaskambooni oo xiriir la leh hadda dowladda KMG ah ayaa sheegay in ururkaas uu ula mid yahay dalalka cadowgooda ah sida Kenya.

10/18/2011 7:17 AM EST
Talaado, Oktoobar 18, 2011 (HOL) — Wasiirrada arrimaha dibada iyo gaashaandhigga dalka Kenya Moses Watang'ula iyo Maxamed Yuusuf Xaaji ayaa ku sugan Muqdisho, iyagoo kulammo kula leh xarunta madaxtooyada Soomaaliya madaxweyne Sheekh Shariif.

10/18/2011 7:09 AM EST
Talaado, Oktoobar 18, 2011 (HOL) — Iyadoo ay isa soo tarayaan Deeqaha lacageed ee soo gaaray deegaanka iyo weliba howlaha loogu gurmanayo dadka ay waxyeelada ka soo gaartey dhibaatooyinka Abaaraha ee ka taagan Gobolka ayaa maalmahii ugu dambeeyey Deeq lacageed oo ka timid Jaaliyada Soomaalida ee Dalka Masar,gaar ahaan kuwooda degan Magaalada Qaahira ayaa waxaa Raashin Gargaar ah loogu iibiyey Qoysas ku dhibaateysan Kaamamka Barakacayaasha ee ku yaala daafaha Magaalada Baardheere.

10/18/2011 4:03 AM EST
Talaado, Oktoobar 18, 2011 (HOL) — Afhayeenka Xarakada Al-shabaab, Sheekh Cali Maxamuud Raage (Sheekh Cali Dheere) oo shir jaraa'id ku qabtay Muqdisho ayaa ugu baaqay dowladda Kenya inay ciidamadeeda kala baxdo Soomaaliya, haddii kale ay beegsan doonaan.

10/18/2011 3:54 AM EST
Talaado, Oktoobar 18, 2011 (HOL) — Wasiirka gaashaandhigga dalka Kenya Maxamed Yuusuf Xaaji oo saxaafadda dalkiisa la hadlay ayaa sheegay in ciidamadooda ay ku jiraan gudaha Soomaaliya, isagoo sheegay inaysan raalligelin ka bixinayn faragelinta ay ku sameeyeen Soomaaliya.

10/18/2011 3:48 AM EST
Taalado, Oktoobar 18, 2011 (HOL) — Maxkamada gobolka Saaxil ayaa dacwad lagu soo oogay Badhasaabka gobolka Saaxil Maxamuud Cali Hayste (Ramaax) iyo Maareeyaha dekeda Berbera Axmed Yuusuf Dirir iskaga leexiyey maxkamada sare.