3/28/2024
Today from Hiiraan Online:  _
Wararka Maanta- Arbaco, Mar 9 , 2011
Koob lagu maamuusayay maalinta haweenka adduunka oo lagu qabtay Garoonka kubadda Cagta Xaafadda Islii (SAWIRRO)


Arbaco, Maarso 09, 2011 (HOL) Koobkan oo ay soo qabanqaabiyeen ururka SYAO ayaa waxaa lagu maamuusayay maalinta haweenka adduunka oo ku beegnayd shalay, waxaana kasoo qaybgalay boqolaal haween ah, safiirka Soomaaliya ee Kenya Maxamed Cali Ameerika, xiddigii hore ee Qaranka K/Koleyga Soomaaliya Saciid Qorsheel, guddoomiyaha Ahlusunah ee gobolka Banaadir Axmed Sheekh Aadan Dheere "Shuqul", aqoonyahanno iyo ganacsatada xaafadda Islii ee magaalada Nairboi.

Koobkan ayaa waxaa ku tartamay 12-kooxood oo gabdho iyo wiilal isugu jirtay, iyadoo ciyaartii kama dambeysta ahayd ay isugu soo hareen lix kooxood oo gabdho iyo wiilal kala ahaa.

Ciyaaraha ayaa loo qeybiyay saddex ciyaar, waxaana ciyaartii ugu dambeysay ay dhexmartay labada kooxood oo gabdho ah kuwaasoo ku ciyaarayay magacyada SYAO iyo Heegan, halka sidoo kale ay ciyaar xiiso leh soo bandhigeen wiilal da’dooda ka hooseysay 12-sano jirka kuwaasoo kala watay magacyada SYAO iyo Horseed.

Ciyaarta gabdhaha ayaa waxaa ku adkaaday kooxda SYAO oo ku badisay 27 - 22 oo ay ku adkaatay kooxda SYAO, halka wiilasha da’yarta ahna ay adkaatay kooxda Horseed.


Inta ciyaarahan ay socdeen ayaa waxaa garoonka kusoo bandhigay ciyaaro hidaha iyo dhaqan Soomaaliyeed ah kooxda Shamsu-diin oo sidoo kale soo bandhigtay heeso ka hadlayay muhimadda maalintan ay u leedahay haweenka aduunka, gaar ahaan haweenka Soomaaliyeed.

Ugu horreyn, danjiraha Soomaaliya ee dalka Kenya Maxamed Cali Ameeriko oo hadal ka jeediyay munaasabadda ayaa haweenkii munaasabadda joogay ugu baaqay inay nabadda ka shaqeeyaan oo ay midnimadooda dhisaan, isagoo uga mahadceliyay SYO sida ay uga shaqeynayaan hawlaha horumarinta haweenka, nabada iyo wacyigalinta dhallinyarada.

Guddoomiyaha SYAO Maxamed Ibrahim Cali (Cajiib) oo kaddib isna munaasabadda ka hadlay ayaa sheegay in SYAO oo ka shaqeysa nabadda iyo wacyigalinta dhallinyarada ay koobkan kusoo beegeen weyneynta haweenka Soomaaliyeed oo uu ku tilmaamay kuwo laf dhabar u ah nabada Soomaaliya.

"Horumarinta haweenka iyo ka shaqeynta wacyigalinta dhalinyarada iyo qaybaha kale ee bulshada waa astaanta koowaad ee ay ku shaqeyso SYAO, waxaana ku faraxsannahay inaan maanta haweenka Soomaaliyeed ee Nairobi u qabanayno dabaal-degga maalintooda," ayuu yiri Maxamed Cajiib.

Sidoo kale guddoomiyaha SYAO wuxuu ballanqaaday inay qabanayaan koobab kale oo noocan oo kale ah, isagoo sheegay in ololaha isboortiga ee ay kawadaan xeryaha qaxootiga iyo garoommo ku yaala Islii oo kubadaha cagta iyo koleyga lagu ciyaarayo.


Gudoomiyaha kooxda Shamsu-diin Shamso Macallin oo ku hadashay magaca haweenkii kasoo qaybgalay munaasabadda ayaa ku baraarujisay haweenka inay adkeystaan midnimadooda, ayna qayb ka qaataan daganaasho soo celinta dalka, waxaana ay fariin nabadeed u dirtay munaasabadda darteed haweenka Soomaaliyeed meel walba oo ay joogaan.

Ciyaaryahankii Qaranka Soomaaliyeed ee kubadda Kolayga Saciid Qorsheel ayaa dhinaciisa SYAO uga mahadceliyay horumarinta qaybaha Isboortiga, wuxuuna sheegay in wiilasha da’da yar ay mateli doonaan mustaqbalka dhow Qaranka Soomaaliya, isagoo ku booriyay ururka SYAO inay sii wadaan dadaallada ay tababarka ku siinayaan da’yarta Soomaaliyeed ee horumarinta xirfada isboortiga sida kubadda koleyga iyo kubadda cagta.

Ugu dambeyn, waxaa la bixiyay koobab qaali ah iyo hadiyado kale oo isugu jiray qalab isboorti kuwaasoo ay SYAO ugu talogashay in lagu dhiirri-geliyo dhallinyarada da’yarta ah ee loo tababarayay muddooyinkii ugu dambeeyay xirfada kubadda koleyga iyo sidoo kale gabdhihii ku guuleystay ciyaarti kama dameysta ahayd ee koobka lagu maamuusayay maalinta haweenka.






Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
3/9/2011 7:41 AM EST
Arbaco, Maarso 09, 2011 (HOL) – Qoraal toddobaadkan kasoo baxay Maxkamadda sare ee dalka ayaa lagu dalbaday maxkamadda ciidammada qalabka sida inay u wareejiso dacwadda eedeysan Maxamed Cumar Xabeeb (Maxamed Dheere) maxkamadda gobolka Banaadir.

3/9/2011 7:14 AM EST
Arbaco, Maarso 09, 2011 (HOL) – Dood ay ka qaybgaleen in ka badan 50 ka mid ah haweenka suxufiyiinta ah ee Soomaaliyeed ayaa maanta lagu qabtay Hotel saxafi ee magaalada Muqdisho, taasoo gundhiggeedu ahaa sidii lagu horumarin lahaa haweenka suxufiyiinta ah ee Soomaaliyeed waxaana dooddan soo agaasintay ha'yadda CCD.

3/9/2011 6:57 AM EST
Arbaco, Maarso 09, 2011 (HOL) – Madaxweynaha Soomaaliya Shariif Sheekh Axmed ayaa maanta socod qaatay muddo saacado ah ku tagay aagagga ay degmooyinka Hodan, Holwadaag iyo Wardhiigley kaga sugan yihiin ciidamada DKMG ah iyo kuwa AMISOM, isagoo socdaalkiisa markii uu dhammaaday la hadlay saxaafadda.

3/9/2011 6:13 AM EST
Arbaco, Maarso 09, 2011 (HOL) – Dhaqdhaqaaqyo ciidan ayay DKMG ka billowday xuduudda u dhexeysa Soomaaliya iyo Kenya, gaar ahaan dhinaca Jubbooyinka oo ay ku xooggan tahay Xarrakatul Shabaab Al-Mujaahidiin, kuwaasoo u muuqda kuwo ay doonayaan inay ku weeraraan gobollada Jubooyinka

3/9/2011 3:01 AM EST
Arbaco, Maarso 09, 2011 (HOL) – Sheekh Cumar Faaruuq Xaaji Cabdi-Suldaan Xaaji Maxamuud wuxuu ku dhashay degmada Qooxley oo Qallaafe iyo Qabridaharre u dhaxeysa, halkaasi oo magaceeda caanka ahi yahay "Carmaale" . Carmaale waxaa dariiqa diimeed ka hayey aabihiis Xaaji Cabdi-Suldaan, dariiqadaasoo ka koobanayd dugsi Quraan iyo barida diinta islaamka oo uu hayey Sheekh waalid u ahaa Sheekh Cumar Faaruuq oo la oran jirey macallin Cusmaan Macallin Dhicis.

3/9/2011 2:48 AM EST
Arbaco, Maarso 09, 2011 (HOL) – Dowladda Soomaaliya ayaa sheegtay inay xalay kala wareegtay xoogagga Xarrakatul Shababa deegaanno hoostaga degmada Rabdhuurre ee gobolka Bakool oo ku taalla xuduudda ay wadaagaan Soomaaliya iyo Itoobiya.

3/9/2011 2:47 AM EST
Arbaco, Maarso 09, 2011 (HOL) – Barnaamijka cunnada adduunka ee WFP ayaa soo saaray warbixin uu ku sheegay inuu gargaar deg-deg ah u qaybinayo 50,000 qof oo ku nool Muqdisho iyo daafaheeda, kuwaasoo ay sheegeen inay haysato xaalad cuuno la'aaneed oo daran.

3/9/2011 2:44 AM EST
Arbaco, Maarso 09, 2011 (HOL) – Dowladda Soomaaliya ayaa soo dhaweysay xog ururin lagu sameeyay dadweynaha Soomaaliyeed oo ay Sabtida toddobaadkan soo bandhigay Hoyga Saxafiyiinta Muqdisho (Muqdisho Media House), iyadaoo sheegtay in tani u taagan tahay tallaabo loo qaaday dimoqoraadiyad dhab ah oo waddanka ka dhacda.

3/9/2011 1:58 AM EST
Arbaco, 09, Maarso, 2011 (HOL) Saakay waabarigii hore xali dadku isku diyaarinayay Salaada subax ayaa mar kaliya waxaa ku soo dhacay dhagaha dadka reer Beledweyne dhawaqa qarax aad u culus oo ka dhacay halka lagu magacaabo Buunda-koowaad oo ku dhaw xaafadda Nuur Xawaad.

3/9/2011 1:40 AM EST
Arbaco, Maarso 09, 2011 (HOL) – Wasiir ku xigeenka wasaaradda shaqada shaqaalaha, dhallinyarada iyo isboortiga dowladda KMG ah ee Soomaaliya, C/rashiid Maxamed Xiddig ayaa dalbaday in DKMG ah xilliga loo kordhiyo si ay u sii waddo howlgallada milateri ee ay ku doonayso inay dalka oo dhan ku qabsato.