Arbaco, 16 February 2011 (HOL)- Munaasabad aad u ballaaran oo lagu soo bandhigayay waxqabadka shirkadda Mubaarak Group of Company ayaa lagu qabtay hoolka shirarka ee Rukhsan ee magaalada Garoowe.
Waxaa ka soo qayb galay madax ka tirsan maamulka oo ay ka mid ah ahaayeen wasiirka ganacsiga iyo warshadaha Puntland ,duqa degmada Garowe ,gudoomiyaha barlamanka Puntland iyo ganacstada ugu caansan gobolka qaar ka mid ah.
"Shirkada tobonkii sano ee la soo dhaafay waxa ay xafiisyo badan ka furatay qaybo ka mid ah dalka gaar ahaan Puntland "ayuu yiri maamulaha guud ee shirkada Mubaarak Group C/qaadir Xaaji oo munaasabada ka hadlay
Waxaa kaloo maamulaha uu sheegay in ay jiraan qorshayaal lagu hormarinayo waxqabadka shirkada mustaqbalka soo socda,isagoo ku baaqay in laga wada qayb qaato horumarka dalka.
"Aad ayaan u soo dhawaynaynaa cid kasta oo doonaysa in maal gashi ay ku samayso caasimada Puntland ee Garowe "ayuu yiri duqa degmada oo goobta ka hadlay,isagoo ku baaqay in lagu daydo shirkada Mubaarak Group of Compnay.
Wasiirka ganacsiga iyo warshadaha Puntland oo isna goobta ka hadlay ayaa dhiirigaliyay shaqadii shirkada qabtay tobankii sano ee la soo dhaafay,waxaana uu amaanay shaqada Shirkada.
"Aad ayaan ula riyaaqay markii aan arkay in ganacsiga gobolka oo aad u kordhay waqtiyadan danbe ,waxaana aan leeyahay meeshiina ka sii wada "Ayuu yiri wasiirka oo hadal kooban goobta ka jeediyay.
Shirkada Mubaarak Group of Companay waxaa la asaasay sanadkii markuu ahaa 2000,iyadoo xafiiskeedi ugu horeeyay laga hirgaliayay magaalada Bosaaso waana shirkad qaabilsan dhimayaasha qaybahooda kala duwan.
Faisel Maxamed Hassan, Hiiraan Online
[email protected]
Boosaaso, Soomaaliya