Xarrakatul Shabaabul Mujaahidiin oo maanta badashay guddoomiyihii maamulka gobolka Banaadir
Arbaco, 16 Feberaayo, 2011 (HOL) – Xarrakatul Shabaabul Mujaahidiin ayaa maanta xilkii ka qaaday guddoomiyihii maamulkooda gobolka Banaadir Sheekh Cali Max'ed Xuseen, iyagoo xilkaas u magacaabay mas'uul cusub oo lagu magacaabo Sheekh Maxamed Xasan Cumar (Abuu-C/raxmaan).
Munaasabad labadan mas'uul xilalka loogu kala wareejinayo ayaa maanta ka dhacday Muqdisho, waxaana goobjoogayaal ka ahaa mas'uuliyiin uu ka mid ahaa madaxa siyaasadda iyo xiriirka gobollada Xararkatul Shabaab Sheekh Xuseen Cali Fiidow.
Guddoomiyaha gobolka Banaadir ee Xarrakatul Shabaab ee maanta xilkii laga qaaday ayaa noqonaya mas'uulkii ugu horreeyay oo Xarrakadu ay u magacowday sannadkii hore inuu guddoomiye ka noqdo maamulkooda gobolka Banaadir.
Sheekh Xuseen Fiidow ayaa xafladda magacaabidda iyo xil wareejinta isugu jirtay kaga sheekeeyay waxqabadkii guddoomiyihii hore ee gobolka Banaadir isagoo ka dalbaday shacabka gobolka Banaadir inay la shaqeeyaan mas'uulka cusub.
Waaligii hore ee gobolka Banaadir Sheekh Cali Maxamed Xuseen oo isaguna hadal kooban ka jeediyay xafladda ayaa sheegay inuu aqbalay xilka laga qaaday, isagoo ka codsaday in shacabka gobolka Banaadir ay ka cafiyaan haddii ay jiraan khalad uu ka galay intii uu xilka hayay.
Guddoomiyaha cusub oo isaguna hadal kooban jeediyay ayaa shacabka gobolka Banaadir ka codsaday inay gacan ku siiyaan sidii uu u gudan lahaa xilka culus ee dusha laga saaray, isagoo sheegay inuu howsha maamulka gobolka halkeedii kasii wadi doono.
Xarrakatul Shabaab ayaa ka talisa gobollada Koonfureed ee dalka iyo inta badan degmooyinka gobolka Banaadir, mana ahan maamulkii ugu horreeyay oo isbadal ay ku sameyso madaxdiisa, waxaase sannadkii hore ay sidan oo kale isbadallo ku sameeyeen maamulladooda gobollada koonfureed ee Soomaaliya.
Maxamed Xaaji Xuseen, Hiiraan Online
[email protected]
Muqdisho, Soomaaliya