10/23/2017
Today from Hiiraan Online:  _
Wararka Maanta- Talaado, May 12, 2009
Maamulka Gobolka Banaadir oo sheegay in dagaallada ka socda Muqdisho ay wadaan Dad Gobollo kale ka yimid


Guddoomiyaha Gobolka Banaadir, Maxamed Cusmaan Cali Dhagaxtuur
Talaado,  May 12, 2009(HOL): Maamulka Gobolka Banaadir ayaa shaaca ka qaaday in dagaalladii maalmihii tegay ka dhacayay Magaalada Muqdisho ay ka dambeeyaan Dad gobollo kale ka yimid.

Guddoomiyaha Gobolka Banaadir, ahna Duqa Magaalada Muqdisho Maxamed Cusmaan Cali Dhagaxtuur ayaa sheegay in dadka ku nool Soomaaliya, gaar ahaan Magaalada Muqdisho aysan xamili karin dagaallo sii socda 20 sano kaddib, wuxuuna caddeeyay in dagaallada hadda socda ay yihiin kuwo ay wadaan dad sida uu yiri gobollo kale ka yimid.

“Wallaahi Billaahi Tallaahi, ma yeeleyno in Dadka ku nool Gobolka Banaadir ay dhibaateeyaan dad ka yimid Gobollo kale oo nabadgelyo ka jirto, arrintaasna maamulka go’aan ayuu ka qaadan doonaa”ayuu yiri  Maxamed Cusmaan Cali Dhagaxtuur, Guddoomiyaha Gobolka Banaadir.

Hadalka uu sii daayay Guddoomiyaha Gobolka Banaadir ayaa wuxuu ku soo beegmayaa iyadoo maalmihii aynu ka soo gudubnay ay magaalada Muqdisho ka dhacayeen dagaallo geystay dhimasho iyo dhaawac aad u faro badan.

Horay waxaa hadal midkan la mid ah u jeediyay Odayaasha Dhaqanka iyo Midnimada Beelaha Hawiye, gaar ahaan Guddoomiyaha Maxamed Xasan Xaad iyo Afhayeenka Dhaqanka Axmed Diiriye Cali, kuwaasi oo sheegay in dagaallada oo dhan lagu soo koobay magaalada Muqdisho, gobollo badan oo ay ka yimaadeen dad Muqdisho ka dagaallamayana ay ka socdaan adeegyada bulshada.

Salaad Iidow Xasan (Xiis), Hiiraan Online
[email protected]
Muqdisho, Soomaaliya





Post your comments

5/12/2009 12:42 PM EST
Talaado, 12, 2009 (HOL): Ergayga gaarka ah ee Qaramada Midoobay u qaabilsan Arrimaha Soomaaliya, Ahmedou Ould-Abdallah ayaa si xoog leh u cambaareeyey dagaallada ka socda Magaalada Muqdisho ee lagu bartilmaameedsanaayo Dawlada Sharciga ah ee Soomaaliyeed,wuxuuna sheegay dagaalka iyo qaska socda ee sababay dhimashada iyo barakaca dad fara badan oo shacab ah uu yahay mid aan la aqbali karin.

5/12/2009 12:33 PM EST
Talaado, 12, 2009 (HOL) Warar goor dhaw soo baxay ayaa xaqiijinaya in dagaal culus oo u dhaxeeya Xoogagga Al-shabaab iyo kooxo ka soo horjeeda uu ka bilawday deegaanka Maxaas ee Goballka Hiiraan.

5/12/2009 7:03 AM EST
Talaado, May 12, 2009(HOL): Madaxa Siyaasadda iyo Gobollada Al-Shabaab Shiikh Cali Fiidow oo shir jaraa’id ku qabtay Magaalada Muqdisho ayaa wuxuu shirkiisa jaraa’id uga hadlay hadallo ka soo baxay Dowladda Soomaaliya oo ahaa in ay Al-shabaab ka dhinac dagaallamayaan rag ajnabi ah, dagaalladii Muqdisho ka dhacay maalmihii aynu ka soo gudubnay, go’aanno dagaal-joojin ah oo ay saartay Hay’adda Culimada Soomaaliyeed iyo sida ay Dowladda u dhaqangelineyso Shareecada Islaamka.

5/12/2009 5:42 AM EST
Talaado, May 12, 2009(HOL): Ururka BANAADIRVZW oo ka dhisan Wadanka Belguium Gaar ahaan Magaalada GENT ayaa Waxay Casuumaad soo dhaweyn ah u sameeyeen Ururo ka kala Yimiday Wadamada Netherland & Sweden oo kala ah S.S.U.P & EUROSOMA & S.N.B.F iyo marti Sharaf kale oo iyagana ka kala Yimid Qaar ka tirsan Wadamada Qaaradda Yurub.

5/12/2009 4:54 AM EST
Talaado, May 12, 2009(HOL): Kooxda Al-shabaab oo bilihii aynu soo dhaafnayba ku sugnaa qeybo ka mid ah Gobollka Hiiraan ayaa si toos ah waxaa ay ula wareegeen gacan ku heynta degmada Buula-burte oo qiyaastii u jirta 115 km Magaalada Beledweyne ee xarunta u ah Goballka Hiiraan.

5/12/2009 3:09 AM EST
Talaado, May 12, 2009(HOL): 14 Burcad Badeed Soomaali ah oo ay qabteen marar kala duwan Ciidamada Badda Spain ee ku sugan Xeebaha Soomaaliya ayaa lagu wareejinayaa Dowladda Kenya , sidaasi waxaa sheegay Wasiirka Arrimaha Dibadda Spain.

5/12/2009 2:40 AM EST
Talaado, May 12, 2009(HOL): Xabad-joojin aan cago badan ku taagneyn ayaa saaka waxay ka jirtaa xaafadihii ay maalmihii tegay dagaallada ka dhacayeen ee magaalada Muqdisho, iyadoo dhinaca kalena uu magaalada ka socdo barakac aad u baahsan.

5/12/2009 2:40 AM EST
Talaado, May 12, 2009(HOL): Dowladda Mareykanka ayaa cambaareysay dagaallada ka socda Caasimadda Dalka Soomaaliya ee Muqdisho, kuwaasi oo u dhaxeeya Ciidamada Dowladda iyo xoogagga hubeysan oo ka soo horjeeda.

5/12/2009 2:38 AM EST
Talaado, May 12, 2009(HOL): Maxkamadda Gobolka Saaxil ayaa xukun xadhig ah ku ridday 14 Nin oo saddex ka mid ahi maqan yihiin, kuwaas la sheegya in lagu helay falal Budhcad-Badeednimo.