11/29/2020
Today from Hiiraan Online:  _
Wararka Maanta- Khamiis, Mar 20, 2008
Dagaalkii ka socday Qeybo ka mid ah Wadada Wadnaha iyo Suuqa Bakaaraha oo sii xoogeystay


Khamiis, 20, Mar, 2008 (HOL): Waxaa sii xoogeystay Dagaalkii saaka ka bilowday Isgoyska Howl-Wadaag ee ka mid ah Waddooyinka laga galo Suuqa Bakaaraha, iyadoo dagaalkaasina uu ku faafay qeybo ka mid ah Wadada Wadnaha.
 
Dagaalkan oo bilowday kadib markii Ciidamo ka amar qaata Dowladda Federaalka Soomaaliya oo ku sugnaa Isgoyska Howl-Wadaag ay dhac u geysteen Bakhaar ku yaala meel aan u dheereyn Isgoyskaas, kadibna ay kooxo hubeysan weerar ku soo qaadeen.

Dagaalka ayaa intii uu socday waxaa gacan ku heynta qeybo ka mid ah Wadada Wadnaha, gaar ahaan Isgoyada Howl-Wadaag, Aadan Cadde iyo Xaafadda Geed Jaceyl la wareegay Kooxaha hubeysan ee dagaalka kala soo horjeeda Ciidamada Dowladda Federaalka, iyadoo kadibna ay Isgoyska Howl-Wadaag isugu soo baxeen Dadweyne aad u faro badan, kuwaasi oo riixayay labo gaari oo la sheegay in ay ka carareen Ciidamadii Isgoyskaas ku sugnaa.

Khasaaraha ka dhashay dagaalkan ayaa wuxuu gaarayaa dhimashada Shan Ruux oo isugu jira Ciidamo ka amar qaata Dowladda Federaalka Soomaaliya iyo Dad Rayid ah, iyadoo sidoo kalena ay jiraan Dad aan tiradooda la ogeyn oo dagaalka uu dhaawac ka soo gaaray.

Dagaalka ayaa haatan wuxuu ka soconayaa qeybo ka mid ah Wadada Wadnaha, gaar ahaan inta u dhaxeysa Xaafadda Geed Jaceylka iyo Isgoyska Xararyaale, halkaas oo laga maqlayo rasaas ay labada dhinac isku ridayaan, iyadoo mararka qaarkoodna laga maqlayo dhawaqa Madaafiic ku soo dhaceysa qeybo ka mid Suuqa Bakaaraha.

Suuqa Bakaaraha ayaa kadib markii uu dagaalkan dhacay waxaa isaga baxay Dadkii ganacsiga u soo aaday iyo kuwo wax iibsiga u yimid, kuwaasi oo la arkayay iyagoo ku sii kala cararaya Waddooyinka ka baxa Suuqa Bakaaraha.

Dagaalka maanta ka dhacay Suuqa Bakaaraha iyo Nawaaxigiisa ayaa wuxuu ku soo beegmayaa iyadoo shalay Deegaanka Suuqa Xoolaha uu ka dhacay Dagaal dhexmaray Ciidamo Itoobiyaan ah iyo Kooxo hubeysan oo ka soo horjeeday, iyadoo dagaalkaasina uu sababay dhimashada 8 Ruux oo isugu jiray Dad Rayid ah iyo Ciidamadii Itoobiyaanka.

Salaad Iidow Xasan (Xiis), Hiiraan Online
[email protected]
Mogadishu, Somalia













Click here
3/20/2008 12:22 PM EST
Khamiis, March 20, 2008(HOL): Waxaa degan goobihii ay maanta dagaallada ka dhaceen ee Suuqa Bakaaraha iyo Wadada Wadnaha, inkastoo mararka qaarkood la maqlayo rasaas ay ridayaan Ciidamo ka amar qaata Dowladda Federaalka oo dib ugu soo noqday Isgoysyada Howl-Wadaag iyo Aadan Cadde oo ay ka baxeen intii uu socday Dagaalkii maanta.

3/20/2008 12:18 PM EST
Khamiis, March 20, 2008(HOL): Toban Sarkaal oo ka tirsan Ciidamada Dowladda Nigeria ayaa maanta waxay booqasho xaqiiqo raadin ah ku tageen Caasimadda Soomaaliya ee Muqdisho.

3/20/2008 12:15 PM EST
Khamiis, March 20, 2008(HOL): Waxaa maanta is-casilay mas’uuliyiin ka tirsanaa maamulka Degmada Xamar Jajab, kuwaasi oo sheegay in ay go’aan is-casilaadda ah qaateen kadib markii ay la soo derseen culeysyo uga yimid dhinaca ehelladooda, sidoo kalena ay u baqeen ammaankooda.

3/20/2008 12:11 PM EST
Khamiis, March 20, 2008(HOL): Madaxweynaha Somaliland Md. Daahir Rayaale Kaahin ayaa cafis u fidiyay 78 Maxbuus oo la sheegay in lagu qabqabtay Dagaalladii dhex maray Somaliland iyo Puntland.

3/20/2008 12:07 PM EST
Khamiis, March 20, 2008(HOL): Gudoomiyaha Komishanka Doorashooyinka Somaliland, Md. Maxamed Aw Yuusuf Axmed ayaa iska Casilay Xilkii Gudoomiyanimada guddida Doorashooyinka.

3/20/2008 12:05 PM EST
Khamiis, March 20, 2008(HOL): Qaxooti fara badan oo ka kala yimid xaafadaha kala duwan ee magaalada Cape Town oo u kala dhashay wadamada Somalia, Zimbabwe, Congo, Malawi iyo wadamo kale ayaa waxay maanta banaan bax ku sameeyeen albaabka weyn ee baarlamaanka dowlada Koofur Afrika ee magaalada Cape Town.

3/20/2008 6:53 AM EST
Khamiis, 20, Mar, 2008 (HOL): C/qaasim Salaad Xasan Madaxweynaha Dowladdii TNG-da ee lagu soo dhisay Dalka Jabuuti oo maanta shir jaraa’id ku qabtay Hoygiisa Magaalada Muqdisho ayaa wuxuu shaaca ka qaaday in dhibaatooyinka ka jira Soomaaliya ay ka dambeeyaan Ciidamada Shisheeye ee ku sugan gudaha Soomaaliya.

3/20/2008 6:01 AM EST
Khamiis, 20, Mar, 2008 (HOL): Hal Ruux ayaa geeriyooday Seddex ruux oo kalena dhaawac ayaa soo gaaray kadib markii Shineemo ay daawanayeen oo ku taala Degmada Afgooye lagu tuuray Bambo Gacmeed.

3/20/2008 5:25 AM EST
Khamiis, March 20, 2008(HOL): Maamul Goboleedka Puntland ayaa wuxuu shaaca ka qaaday in uu bilaabayo baaritaan uu ku sameynayo shidaalka ku jira deegaannada uu ka taliyo.

3/20/2008 5:22 AM EST
Khamiis, March 20, 2008(HOL): Shir ay maalgelineyso Dowladda Mareykanka, isla makraana ay gogoshiisa fidisay Dowladda Yemen ayaa todobaadka soo socda waxaa uu ka bilaabanayaa Dalka Yemen.

3/20/2008 4:15 AM EST
Khamiis, 20, Mar, 2008 (HOL) Waa yaab iyo Amakaag iyo waliba arin lama filaan ah kadib markii Qoysas badan oo Soomaaliyeed xiligan Noloshoodu gashay heer quus ah kadib markiii Sicir bararka ku yimid maciishadda uu qasab ka dhigay in ay soo baxaan Qoysas hal galin maalintii wax quuta maadaama qarashka ay heli karaan uu yahay mid intaa kaafiya.

3/20/2008 4:08 AM EST
Khamiis, March 20, 2008(HOL): Dagaal xooggan oo la isugu adeegsanayo hubka noocyadiisa kala duwan ayaa wuxuu haatan ka soconayaa gudaha Suuqa Bakaaraha, iyadoo dagaalkanna uu u dhaxeeyo Ciidamo ka amar qaata Dowladda Federaalka oo ku sugan Waddooyinka laga galo Suuqaas iyo Kooxo hubeysan oo ka soo horjeeda.