11/27/2020
Today from Hiiraan Online:  _
Wararka Maanta- Khamiis, Mar 20, 2008
C/qaasim Salaad Xasan oo ka hadlay Dhibaatooyinka ka jira Soomaaliya, gaar ahaan Magaalada Muqdisho


Khamiis, 20, Mar, 2008 (HOL): C/qaasim Salaad Xasan Madaxweynaha Dowladdii TNG-da ee lagu soo dhisay Dalka Jabuuti oo maanta shir jaraa’id ku qabtay Hoygiisa Magaalada Muqdisho ayaa wuxuu shaaca ka qaaday in dhibaatooyinka ka jira Soomaaliya ay ka dambeeyaan Ciidamada Shisheeye ee ku sugan gudaha Soomaaliya.
 
C/qaasim Salaad Xasan waxaa uu sheegay in uu rumeysan yahay in ay ka  jiraan Soomaaliya Dad is-difaacaya oo ay Ciidamo shisheeye ah weerar ku soo qaadeen, isla markaana uusan ogeyn Dad dagaal wada oo gudaha Soomaaliya ku sugan.

Madaxweynihii hore ee Soomaaliya C/qaasim Salaad Xasan waxaa uu soo jeediyay dhowr qodob oo ku saabsan sida xal lagu gaari karo, waxaana qodobaada uu soo jeediyay ka mid ahaa: In Ciidamada Itoobiya laga saaro dalka Soomaaliya, lana keeno kuwo ka socda UN-ka, in sidoo kalena Gudaha Magaalada Muqdisho laga saaro Maleeshiyooyin Beeleedyada, In la soo daayo Dadka Xabsiyada lagu hayo, In Dib loo soo celiyo Dadkii ka barakacay Magaalada Muqdisho, isla markaana Xaafadihii ay ku noolaayeen laga saaro maleeshiyooyinka, In la helo jawi ay ku wada hadli karaan dhinacyada uu khilaafka u dhaxeeyo, In la sameeyo Guddi madax bannaan oo dhexdhexaadiya dhinacyda isku haya Soomaaliya, isla markaana ay dib u heshiisiintaas noqoto mid ay ka qeybqaataan dhamaan qeybaha kala duwan ee shacabka Soomaaliyeed.

C/qaasim Salaad Xasan Madaxweynihii hore ee Soomaaliya waxaa uu sheegay in uu si weyn uga xun yahay in dad aan waxba galabsan dil loo geysto, isla markaana lagu dilo meelo ay Masjidyo ka mid yihiin, wuxuuna caddeeyay in qofkii dila qof masjid ka soo baxay uu isagu ka jawaabi doono maalinta Aakhiro.

Isagoo sii hadlayay C/qaasim Salaad Xasan waxaa uu sheegay in ay Dalka Soomaaliya, gaar ahaan Magaalada Muqdisho ay ka jiraan dhibaatooyin la xiriira Arrimaha Bulshada, wuxuuna carrabka ku dhuftay in Dagaalladii Muqdisho ka dhacay ay ku xirmeen Isbitaallo, goobo Waxbarasho iyo goobo ganacsi, kuwaasi oo ay dadka ka heli jireen adeegyo kala duwan.

Dowladda Mareykanka ayuu sheegay Madaxweynihii hore ee Soomaaliya C/qaasim Salaad Xasan in ay faragelin ku heyso Arrimaha Soomaaliya, wuxuuna ugu baaqay Dowladda Mareykanka in ay ka deyso Dadka Soomaaliyeed dhibaateynta iyo faragelinta ay ku heyso.

Waxaa uu sheegay C/qaasim Salaad Xasan in haddii loo baahan yahay Ciidamo Shisheeye la keeni karo Ciidamo ka socda Qaramada Midoobay, kuwaasi oo la caddeeyay howsha ay qabanayaan iyo waqtiga ay joogaan, isagoo intaas kadibna ugu baaqay Dadka Soomaaliyeed in aysan Ciidamadaas yeelin sidii ay yeeleen kuwii ay horay Qaramada Midoobay u keentay Soomaaliya.

Ugu dambeyntiina, shirka Jaraa’id ee uu maanta Hoygiisa Muqdisho ku qabtay C/qaasim Salaad Xasan ayaa wuxuu ku soo beegmayaa iyadoo Xaaladda Soomaaliya ay sii cakirmeyso, isla markaana ay ka dhacayaan Magaalada Muqdisho dagaallo u dhaxeeya Ciidamada Dowladda Federaalka Soomaaliya iyo kuwa Itoobiya oo isku dhinac ah iyo Kooxo hubeysan oo ka soo horjeeda, iyadoo dagaalladdaasina ay socdaan muddo sanad ah oo ka soo bilaabaneysa Maarso Sanadkii hore ilaa Maarso Sanadkan.
 
Salaad Iidow Xasan (Xiis), Hiiraan Online
[email protected]
Mogadishu, Somalia













Click here
3/20/2008 12:22 PM EST
Khamiis, March 20, 2008(HOL): Waxaa degan goobihii ay maanta dagaallada ka dhaceen ee Suuqa Bakaaraha iyo Wadada Wadnaha, inkastoo mararka qaarkood la maqlayo rasaas ay ridayaan Ciidamo ka amar qaata Dowladda Federaalka oo dib ugu soo noqday Isgoysyada Howl-Wadaag iyo Aadan Cadde oo ay ka baxeen intii uu socday Dagaalkii maanta.

3/20/2008 12:18 PM EST
Khamiis, March 20, 2008(HOL): Toban Sarkaal oo ka tirsan Ciidamada Dowladda Nigeria ayaa maanta waxay booqasho xaqiiqo raadin ah ku tageen Caasimadda Soomaaliya ee Muqdisho.

3/20/2008 12:15 PM EST
Khamiis, March 20, 2008(HOL): Waxaa maanta is-casilay mas’uuliyiin ka tirsanaa maamulka Degmada Xamar Jajab, kuwaasi oo sheegay in ay go’aan is-casilaadda ah qaateen kadib markii ay la soo derseen culeysyo uga yimid dhinaca ehelladooda, sidoo kalena ay u baqeen ammaankooda.

3/20/2008 12:11 PM EST
Khamiis, March 20, 2008(HOL): Madaxweynaha Somaliland Md. Daahir Rayaale Kaahin ayaa cafis u fidiyay 78 Maxbuus oo la sheegay in lagu qabqabtay Dagaalladii dhex maray Somaliland iyo Puntland.

3/20/2008 12:07 PM EST
Khamiis, March 20, 2008(HOL): Gudoomiyaha Komishanka Doorashooyinka Somaliland, Md. Maxamed Aw Yuusuf Axmed ayaa iska Casilay Xilkii Gudoomiyanimada guddida Doorashooyinka.

3/20/2008 12:05 PM EST
Khamiis, March 20, 2008(HOL): Qaxooti fara badan oo ka kala yimid xaafadaha kala duwan ee magaalada Cape Town oo u kala dhashay wadamada Somalia, Zimbabwe, Congo, Malawi iyo wadamo kale ayaa waxay maanta banaan bax ku sameeyeen albaabka weyn ee baarlamaanka dowlada Koofur Afrika ee magaalada Cape Town.

3/20/2008 6:54 AM EST
Khamiis, 20, Mar, 2008 (HOL): Waxaa sii xoogeystay Dagaalkii saaka ka bilowday Isgoyska Howl-Wadaag ee ka mid ah Waddooyinka laga galo Suuqa Bakaaraha, iyadoo dagaalkaasina uu ku faafay qeybo ka mid ah Wadada Wadnaha.

3/20/2008 6:01 AM EST
Khamiis, 20, Mar, 2008 (HOL): Hal Ruux ayaa geeriyooday Seddex ruux oo kalena dhaawac ayaa soo gaaray kadib markii Shineemo ay daawanayeen oo ku taala Degmada Afgooye lagu tuuray Bambo Gacmeed.

3/20/2008 5:25 AM EST
Khamiis, March 20, 2008(HOL): Maamul Goboleedka Puntland ayaa wuxuu shaaca ka qaaday in uu bilaabayo baaritaan uu ku sameynayo shidaalka ku jira deegaannada uu ka taliyo.

3/20/2008 5:22 AM EST
Khamiis, March 20, 2008(HOL): Shir ay maalgelineyso Dowladda Mareykanka, isla makraana ay gogoshiisa fidisay Dowladda Yemen ayaa todobaadka soo socda waxaa uu ka bilaabanayaa Dalka Yemen.

3/20/2008 4:15 AM EST
Khamiis, 20, Mar, 2008 (HOL) Waa yaab iyo Amakaag iyo waliba arin lama filaan ah kadib markii Qoysas badan oo Soomaaliyeed xiligan Noloshoodu gashay heer quus ah kadib markiii Sicir bararka ku yimid maciishadda uu qasab ka dhigay in ay soo baxaan Qoysas hal galin maalintii wax quuta maadaama qarashka ay heli karaan uu yahay mid intaa kaafiya.

3/20/2008 4:08 AM EST
Khamiis, March 20, 2008(HOL): Dagaal xooggan oo la isugu adeegsanayo hubka noocyadiisa kala duwan ayaa wuxuu haatan ka soconayaa gudaha Suuqa Bakaaraha, iyadoo dagaalkanna uu u dhaxeeyo Ciidamo ka amar qaata Dowladda Federaalka oo ku sugan Waddooyinka laga galo Suuqaas iyo Kooxo hubeysan oo ka soo horjeeda.