11/27/2020
Today from Hiiraan Online:  _
Wararka Maanta- Talaado, Mar 18, 2008
Diyaarado joog hoose ku duulayay oo lagu arkay Magaalada Marka ee Gobolka Shabeelaha Hoose


Talaado, March 18, 2008 (HOL): Diyaarado joog hoose ku duulayay ayaa maanta lagu arkay hawada Magaalada Marka ee Gobolka Shabeelaha Hoose, iyadoo diyaaradahaasina ay si weyn u cabsi geliyeen dadka degmadaas ku dhaqan.
 
Dadka ku dhaqan magaalada Marka ayaa markii ay maqleen dhawaqa diyaaradaha waxay isugu soo baxeen Waddooyinka Magaalada, iyagoo daawanayay diyaaradaha dul heehaabayay.

Diyaaradahan oo aan la ogeyn halka ay ka soo duuleen ayaa waxaa lagu qiyaasay in ay ahaayeen Diyaaradaha wax basaasa ee aaney duuliyayaasha la socon, iyadoo ay dadka Marka is-weydiinayeen sababta keentay in Diyaaradahaas lagu soo kiciyo.

Ma ahan Magaaladii ugu horeysay oo  Magaalo ka tirsan Dalka Soomaaliya oo lagu arko diyaarado ceynkan oo kale ah, waxaana dhowr jeer lagu arkay Deegaano dhowr ah oo ku yaala Koofurta Soomaaliya, gaar ahaan Magaalooyinka Xeebaha u dhow, dhawaan ayayna ahayd markii diyaarado joog hoose ku socda lagu arkayo Deegaano ka tirsan Gobolka Jubbada Hoose.

Diyaaradahan maanta lagu arkay magaalada Marka ee Gobolka Shabeelaha Hoose ayaa aragtidooda waxay ku soo beegmeysaa iyadoo horaantii bishan ay Ciidamo Mareykan ah oo ku sugan Xeebaha Soomaaliya ay Gantaalo ku duqeeyeen Magaalada Dhoobley ee Gobolka Jubbada Hoose, iyadoo duqeyntaasna ay waxyeello ka soo gaartay Dad iyo Xoolo ku dhaqnaa Degmadaas.

Si kastaba arrintu ha ahaatee, tan iyo wixii ka dambeeyay markii ay burburtay Dowladdii hore ee Soomaaliya ayaa Xuduudaha Hawada, Badda iyo Berriga Soomaaliya waxay noqdeen kuwo ay ku soo xadgudubto cid kasta, halka Xuquuqda Xuduudaha Dalalka Caalamka ay yihiin kuwo dhowrsan oo ay sharci darro tahay in ruqsad la’aan la galo.
 
Salaad Iidow Xasan (Xiis), Hiiraan Online
[email protected]
Mogadishu, Somalia













Click here
3/18/2008 11:01 AM EST
Talaado, March 18, 2008 (HOL): Deegaanka Ceelasha Biyaha ee Gobolka Shabeelaha Hoose oo ah meesha ugu badan ee ay u barakaceen dadkii ku noolaa Magaalada Muqdisho ee ka cararay dagaallada u dhaxeeya Ciidamada Dowladda Federaalka Soomaaliya iyo kuwa Itoobiya oo isku dhinac ah iyo kooxo hubeysan oo ka soo horjeeda ayaa maanta waxaa ka dhacay banaanbax looga soo horjeeday Guddoomiyaha Gobolka Banaadir, ahna Duqa magaalada Muqdisho Maxamed Cumar Xabeeb (Maxamed Dheere).

3/18/2008 6:09 AM EST
Talaado, March 18, 2008 (HOL): Dadka ku dhaqan Degmooyinka Wadajir iyo Dharkeenley ee Gobolka Banaadir ayaa maanta waxay sameeyeen dibadbax ay uga soo horjeedeen ganacsatada Degmooyinkaas oo isugu daray sicir barar iyo weliba in ay diidaan lacagta duugowday ee Kunka Shillin Soomaaliga ah.

3/18/2008 5:28 AM EST
Talaado, March 18, 2008 (HOL): Odayaasha Dhaqanka iyo Midnimada Beelaha Hawiye, garabka uu Hoggaamiyo Maxamed Xasan Xaad ayaa si weyn u soo dhaweeyay hadal uu shalay sii daayay Ra’iisal Wasaare Nuur Cadde oo shir jaraa’id Muqdisho ku qabtay.

3/18/2008 5:26 AM EST
Talaado, March 18, 2008 (HOL): Ciidamo Boolis iyo Mileteri ah oo ka wada tirsan Dowladda Federaalka Soomaaliya ayaa isku rasaaseeyay gudaha Magaalada Baydhabo, xili ay labada ciidan sameynayeen howlgallo amni sugid ah.

3/18/2008 5:24 AM EST
Talaado, March 18, 2008 (HOL): Deegaanka Xararyaale oo ka tirsan Degmada Wardhiigley ee Gobolka Banaadir ayaa saaka waxaa ka dhacay iska hor-imaad dhexmaray Ciidamo ka amar qaata Dowladda Federaalka Soomaaliya iyo Kooxo hubeysan oo ka soo horjeeda.

3/18/2008 5:22 AM EST
Talaado, March 18, 2008 (HOL): Tan iyo wixii ka danbeyay dhawaan markii ay kooxo hubeysan ku toogteen gudaha Degmadda Buula-burte Sarkaal ka tirsanaa Ciidamadda Dowladda Federaalka waxaa la so darsay xaaladda guud ee Degmadda jahwareer dhinaca Nabad-galyada oo sameyn buuxdda ku yeeshay howlihii Maamulka ee halkaa ka jiray.