11/27/2020
Today from Hiiraan Online:  _
Wararka Maanta- Axad, Mar 16, 2008
Maxkamadaha Islaamka oo sheegtay in ay ka dambeeyeen weerar xalay lagu qaaday fariisimo ay ku sugan yihiin Ciidamo Soomaali iyo Itoobiyaan ah


Axad, March 16, 2008(HOL): Weerar xooggan oo xalay lagu qaaday fariisin ay Ciidamada Dowladda Federaalka Soomaaliya iyo kuwa Itoobiyaanka ay ku leeyihiin gudaha magaalada Muqdisho iyo daafaheeda ayaa waxaa sheegtay Maxkamada Islaamka.

Afhayeen ka  hadla howlgallada Maxkamadaha Islaamka oo lagu magacaabo C/raxiin Ciise Caddow ayaa sheegay in ay Ciidamadooda weerar ku qaadeen fariisimo ay Ciidamo ka amar qaata Dowladda Federaalka Soomaaliya ay ku leeyihiin inta u dhaxeysa Deegaanka Ceel Carfiid iyo Cali-yaale, halkaas ay ku dileen seddex askari oo ka tirsan Ciidamo ku sugnaa bar koontarool oo sida uu sheegay gaadiidka iyo dadka safarka ah lagu dhibaateyn jiray.
 
C/raxiin Ciise Caddow waxaa uu intaas ku daray in ay sidoo kale Ciidamadooda weerar gaadmo ah ku qaadeen Fariisimo ay Ciidamada Itoobiya ku leeyihiin Warshaddii baastada iyo Warshaddii Xeyla Bariise, wuxuuna sheegay in ay khasare gaarsiiyeen Ciidamadii halkaas ku sugnaa.
 
Mar wax laga weydiiyay wax khasaare ah oo dhinacooda soo gaaray ayuu sheegay C/raxiin Ciise Caddow in aysan jirin wax khasaare ah oo soo gaaray, wuxuuna sheegay in ay u bareereen in ay shacabka Somaaliyeed dhibaatada ka dul qaadaan, ayna u soo celiyaan xornimadooda.
 
Afhayeenka Howlgallada Maxkamada Islaamka C/raxiin Ciise Caddow waxaa uu sheegay in ay howlgalladan sii wadi doonaan sida uu u yiri ilaa dalka Soomaaliya laga xoreynayo cadawga ku soo duulay.
 
Mar la weydiiyay su’aal ku saabsaneyn waxa ay kala yihiin howlgallada Isbaheysiga Dib u xoreynta Soomaaliya iyo Maxkamadaha Islaamka waxaa uu sheegay in ay isku mid yihiin, isla markaana ay Isbaheysiga Dib u xoreynta madax ka yihiin mas’uuliyiintii hoggaanka u ahayd Maxkamadaha Islaamka.

Ugu dambeyntiina,  Ciidamo Itoobiyaan ah oo ka soo Warshaddii baastada iyo Warshaddii Xeyla Bariise oo xalay la weeraray ayaa saaka waxay howlgallo ka sameeyeen xaafadaha u dhow fariisimadooda, inkastoo aysan wax dad ah ka helin meelaha ay ka howlgaleen oo la sheegay in ay yihiin xaafado ay dadkii deganaa mar hore ka barakaceen sabab la xiriirta in dhowr jeer dushooda lagu dagaalamay.

Salaad Iidow Xasan (Xiis), Hiiraan Online
[email protected]
Mogadishu, Somalia













Click here
3/16/2008 1:14 PM EST
Axad, March 16, 2008(HOL): Shiikh Xasan Daahir Aweys oo ka mid ah Mas’uuliyiinta Maxkamada Islaamka iyo Isbaheysiga Dib u xoreynta Soomaaliya ayaa isagoo ku sugan magaalada Asmara ee Dalka Eritrea waxaa uu u sheegay Wakaaladda Wararka Reuters in aysan wax wada hadal ah la geleynin Dowladda Federaalka Soomaaliya.

3/16/2008 1:10 PM EST
Axad, March 16, 2008(HOL): Dowladda Uganda ayaa ugu deeqday Ciidamada Booliska Dowladda Federaalka Soomaaliya 8 gaari oo nooca Toyota Pick Up ah, kuwaasi oo ay Ciidamada Booliska u isticmaali doonaan howlgallada gurmadka ah.

3/16/2008 1:08 PM EST
Axad, 16 March 2008 (HOL)- Madaxweynaha Somaliland Md. Daahir Rayaale Kaahin, ayaa markii u horaysay si rasmi ah u caddeeyay inuu Maraykanka ku martiqaaday inuu saldhig milatari ka samaysto magaalada Dekedda ah ee Berbera, oo uu sheegay inuu hore ugu lahaan jiray saldhig.

3/16/2008 1:05 PM EST
Axad, 16 March 2008 (HOL)- Wasiirka Caafimaadka Somaliland, Md. Cabdi Haybe Maxamed ayaa daboolka ka qaaday in dad loo malaynayo inay doonayeen inay xadaan Dukumentiyo ay dorraad barqadii u soo dhaceen Xarunta Wasaaradda Caafimaadka oo ku taalla badhtamaha magaalada Hargeysa, isla markaana ay jabsadeen qaar ka mid ah xafiisyada Wasaaradda.

3/16/2008 6:47 AM EST
Axad, March 16, 2008(HOL): Ra’iisal Wasaaraha Xukuumadda Federaalka Soomaaliya Nuur Xasan Xuseen (Nuur Cadde) iyo Guddiga Ammaanka Qaranka oo ka kooban Taliyayaasha kala duwan ee Ciidamada Dowladda Federaalka Soomaaliya iyo Guddoomiyaha Gobolka Banaadir ayuu shir uga socdaa hoyga uu Muqdisho ka degan yahay Ra’iisal Wasaaraha.

3/16/2008 6:02 AM EST
Axad, March 16, 2008(HOL): Mas’uuliyiin ka tirsan maamulka Degmada Buur-hakaba ee Gobolka Bay ayaa lagu soo waramayaa in ay Degmadaas isaga baxeen kadib markii uu soo gaaray war ku saabsan in ay weerar ku soo yihiin xoogag ka amar qaata Maxkamadihii Islaamka.

3/16/2008 6:01 AM EST
Axad, March 16, 2008(HOL): Waxaa saaka isku day lagu dili lahaa ka badbaaday Guddoomiyaha Degmada Xamar Jajab Axmed Shiikh Maxamuud Qoor-leex, kaasi oo ay rag dhalinyaro ah ay bambo gacmeed ku tuureen meel uu ku sugnaa.

3/16/2008 5:59 AM EST
Axad, March 16, 2008(HOL): Hay'adaha Samafalka ka howl-gala ee ka howl-gala Gobalka Hiiraan iyo Ururadda aan Dowligga aheyn ayaa siweyn ugu howlan wax ka qabashadda xaaladda caafimaad ee dadka uu soo ridanayo cudurka Shubanka oo 48 Saac ee la soo dhaafay ku dhacay in badan oo ka mid ah Caruurta ku dhaqan Gobalka Hiiraan gaar ahaan Magaaladda Beledweyne.

3/16/2008 5:58 AM EST
Axad, March 16, 2008(HOL): Dad gaaraya 10,000 oo dibad-baxayaal ah ayaa waxaa ay isugu soo baxeen fagaaraha Trafalgar Square ee ku yaala Magaaladda London is ay u xusaan sanad guuradda 5aad ee kasoo wareegtay duulaankii dalkaasi Ciraaq lagu qaaday.