Kulan looga hadlayay Ammaanka Gobolka Hiiraan oo lagu soo gebagebeeyay Magaalada Beledweyne
Talaado, June 13, 2006(HOL): Kulankan oo ay ka soo qeyb-galeen Qaar ka mid ah mas'uuliyiinta maamulka Gobolka, Aqoonyahanno, Odayaasha dhaqanka Gobolka iyo Ururada Haweenka ayaa markiiba lagu bilaabay fikrado ka qeyb galayaashu ay ka dhiibanayeen qaabka iyo sida ugu haboon ee loo sugi karo ammaanka Gobolka Hiiraan, iyadoo ka qeybgalayaashiina ay arrintaas ku kala fikir duwanaadeen.
Fikradaha oo dhamaantood ku saleysnaa in marka hore la helo si loo sugo ammaanka Gobolka maamul Adag oo hanta Bulshada ayaa waxaa diirada lagu saaray waxyaabaha hortaagan in maamulka hadda jira uu ku guulysto sugida nabadgalyada oo qaar ka mid ah dhinacyadii kulanka ka hadashay ay ku tilmaameen in uusan ahayn mid ku taagan tiirar adag, loona baahan yahay in wax badan la turxaan bixiyo.
Dr. Ibraahim Dhaqane Cali oo ah wakiilka Jaamacada Gobolka Hiiraan oo ka mid ahaa aqoonyahanadii ka hadlay kulanka ayaa sheegay in marka maamul la sameynayo loo baahan yahay in maamulkaasi uu leeyahay sharci haga si markaas uu u noqdo mid hanta dhaamaanba howlihii loo doortay oo ay ka mid yihiin in uu wax ka qabto arrimaha nabad-galyada, waxaana uu Dr. Dhaqane soo jeediyay labo Qodob oo kala ah: in uu Maamulku Ogolaado dhismaha Gole iyaga ka sareeya oo u xilsaaran arrimaha nabad-galyada iyo waliba in maamulku qabsado waqti kooban oo uu wax kaga qabanayo arrimha ammaanka oo haddii uu ku guuldareysto uu xilka iska wareejinayo.
Sidoo kale Yuusuf X. Cilmi oo ka mid ahaan aqoonyahanadii kulanka ka hadlay ayaa sheegay in marka hore loo baahan yahay in la ogaado in marna aan amaanka waxba laga qaban karin hadii uusan maamul jirin, isagoo soo jeediyay in sida kaliya ee amaanka wax looga qaban karo ay la tahay in la helo xarumihii ammaanka sida Maxkamado iyo qeybihii ciidamada oo dib loo soo nooleeyo, si markaas dadku u helo damaanadqaad buuxa, hadii aan la helina waxaa uu sheegay in waxa la raaadinayo ay tahay ( Cirbad Ceel ku dhaday)
Dooda oo aheyn mid aad u kulul ayaa lagu soo ban dhigay in maamulka hadda jira uusan wali soo hordhigin bulshada qorshe cad, si markaas wax badan looga badalo sida hadda amaanku yahay, iyadoo sidoo kalena la soo ban dhigay in bulshada laftirkeeda aysan maamulka hor dhigin qorshaha waxqabad ee la doonayo in lagu dhaqaaqo taasoo keentay in arrimuhu noqdaan kuwo isku dhax yaacsan.
Madaxa xarunta Cilmi Baarista iyo wadatashiga CRD xafiiskeeda Gobolka Hiiraan Ing. Maxamed Xasan Kulmiye oo soo xiray kulanka ayaa sheegay in la qaban doono kulamo intaan ka sii ballaaran oo lagu lafa gurayo qodobkan la xiriira ammaanka oo ah mid xiligan xasaasi ah, waxaana uu sheegay in ujeedada kulanka loo qabtay ay tahay in si wada jir ah bulshadu uga wadda hadasho hadba xaaladaha taagan si loo helo fikrad mideysan oo aakhirkii laga dhaxlo in hal meel laga duulo.
Ugu dambeyntii waxaa kulanka abaal marino lagu gudoonsiiyo saddex dhanlinyaro ah oo intii uu kulanku socday soo jeediyay Gabayo si weyn u soo jiitay dareenka ka qeyb galayaasha, waxaana kaalinta koowaad ku guuleystay Sahal Xasan jimcaale oo ah waiil 18 sano jir ah oo halkaas ka soo jeediyay Gabay ka hadlaya qiimaha nabadgalyadu leedahay.