fiogf49gjkf0d
Curiye: Ibrahim Hassan Gagale
Friday, May 15, 2009
Gabayga soo socda waxaa lagu maqagcaabaa Garbo-Badan, waxaa uu ka kooban yahay 60 beyd oo min afarey ah, waxaana sannadka 2009 curiyey Ibrahim Hassan Gagale (Reer Somaliland). Gabaygu waa dhaliil ku socota Beesha Hawiyaha kuna saabsan talo-seegga ku dhacay Beeshaas ka dib burburkii Taliskii Siyaad Barre ee Mogadiisho 1991 iyo sida arrintaasu u horseeday dagaallo sokeeye oo jiitama lagana dhaxlay geeri badan iyo burbur weyn isla markaan abuurtay xaalad ay ku soo duusho dawladda Itoobiya Somalia (2007-2008) una geysato dhibaatooyin laxaad leh oo leh naf iyo maalba iyada oo ka aargoosanaysa dagaalkii 1977.
Gabaygu wuxuu ku guubaabinayaa Beesha Hawiye, maadaama beeshu tahay ta ugu weyn Koonfurta Somalia waxna ka qabankarta dhibaatada Somalia, inay soo celiso nabadgelyada, dawladnimada, qaranimada iyo sharafta dalka Somalia sidii ay samaysay lixdii bilood (June ilaa July ee 2006) ee ka horreeyay duulaanka Itoobiya. .
Gabayga: Garbo-Badan
Dunidan la wada guud degee, Maars lagu guuray
Goorkastaba quruumaha tartama, guusha wada gaadhay
Dagaal joogto kuma gaadhinoo, garabba meel goostay
Qiimo dawladnimo dhab u gartoo, oo guddoonsada`e
Hawiyaba galladi soo martee, waase talo guuray
Marku guushi Xamar taabaye, Eebbe garabsiiyay
Dawladnimo halku garan lahaa, muran gadaashiiye
Jiitama colaadaa garbaha, goysay nabadiiye
Gidaarada dalooliyo wadada, googo`dee madhatay
Taalada dal kale loo gudshee, ganacsi loo dhoofshay
Tuubada guryaha laga fagtee, geesta laga diirtay
Goobaha jid-gooyada la dhigay, baadda laga guulay
Moryaanta guryihii degtee, aad gelgelin moodo
Ee ganafka ruuxii lahaa, lagu gujaynaayo
Ibna aadamkaa guri madaw, gooni la afduubay
Xoolaha sidoodi la gaday, gini intuu siistay
Gaadiidka jidka loo galee, gooshka laga caagay
Dhiigga goobkastaba geylane, maato lagu gooyay
Gowraca hal-doorkii ku dhacay, ee af-xidhan gaaday
Shacabkaa gu`yaal ooyayee, ee dulmigu gaadhay
Dalka Geeska cadawguu lahaa, gacanta loo haadshay
Xabashida gumaysiga madow, gaasas ku hujuumay
Gumaadki dadweynaha ku dhacay, iyo qaxii goohay
Aargoosi lagu goobayee, loo gilgilay Geeska
Gobanimo facaa dawladnimo, maanka kaba guurshay
Guuldarrada dalkaa ku habsatee, geeridii badatay
Gobolka gobolka loo gooyaye, reerba dhinac goostay
Qaranimadu gacal weydayee, ee god lagu tuuray
Gabbalkaa u dumay dawladnimo, hoogga laga goostay
Go`e nabadda kama talinayaan, gooye samihiiye
Geesbuu ka maray dawladnimo, oo gabbood-fala`e
Halisbu gudayaan gudcura, gabe danti guude
Hubka weli ka guuxaaaya Xamar, ama gariiraaya
Dekaddaa gu`yaal badan xanniban, ama garoonkeeda
Maataday u diidaan gargaar, gaajo lediweyda
Gurmadkay horjoogaan dunidu, garan la` xaalkooda
Wiirsiga kamay gubanayaan, Reer Galbeed xulaye
Xarragada dagaal waw gafeen, waana gudhiyeene
Waa kaa ujeedadi gabee, gudaya hayhaade
Goormu garaad yeelanoo, garan wuxuu dooni
Dawladnimadu hanti weeye guud, gole wadaageede
Waa loo gudboonyahay dhibtiyo, gacante dheefeede
Gacal looma siiyo qabiil, way ku gubataaye
Danta guud mid reer looma dilo, guulna lama sheegto
Geyigaba miyaan dhiidhijirin, geesi miyuu beelay
Miyay guurtay garashada dadki, guurti miyuu suulay
Damiirki maxaa idanka gaday, ee dadnimo guurshay
Ficil li`idda doofaarka gubay, waa gadaad tahaye
Mooryaanta geesaha kamara, gooya dabarkeeda
Dawlad-diidka god madow ku rida, yaanu gacal yeelan
Gadhwadaha Axmaarada ka diga, meelkastaba gooba
Daba-dhilifka goonyaha kamara, ee gunnada qaata
Sooyaalka geyigoo muslima, Diinta garab siiya
Seef-laboodka Wahaabiga gefsane, gaalka kugu sheega
Dalabaanka garabkaa noqdee, ee firqada gaara
Gacantooda xukun yaanu gelin, Geeska ka ilaasha
Guddoon dawladnimo waan jeclaa, gadaal u aydaane
Gurmadoo u kaca dawladnimo, oo gunnimo diida
Geyigaba mideeyoo dadkaba, nabadda gaadhsiiya
Dawladnimo inaad dhab u geydaan, dunida gaadhsiiya
Dhammaan
Curiye: Ibrahim Hassan Gagale
Email: [email protected]