fiogf49gjkf0d
Maxamed C. Cibaar
[email protected]
Gabayga Guubaabo wuxuu soo baxay 27-11-2008, wuxuuna ku saabsanyahay marxaladda cusub ee uu galay halgankii joogtada ahaa ee u dhaxeeyay dulmiga duullaanka ah iyo xaqa difaaca ah.
Waxay ila tahay in aysan maanta jirin cid inkiri karta in dullaankii gardarrada ahaa ee lagu soo qaaday dadka Soomaaliyeed, dalkooda iyo diintoodaba uu ku dhamaaday jab iyo guuldarro. Waxaana Alle mahaddii ah in halgan qaraar ka dib, ciidamadii cadowga maanta lagu hareereysanyahay oo ay la’yihiin si ay u baxaan iyo meel ka baxaan.
Walow ciidan ahaan cadowga dhabarka looga jebiyay,haddana waxaa weli laysku dayayaa in la badbaadiyo oo la bakhti-afuufo dulmiga fashilmay. Arrinkaas waxaa lagu bixinayaa hanti iyo howl badan, iyadoo loo adeegsanayo shaqsiyaad iyo kooxo aan xilkas aheyn. Ujeeddada dhalanteedka ahi waa in la qaybiyo oo waliba la iska horgeeyo walaalihii halganka ku wada jiray.
Waxaan ku kalsoonahay Insha-Allaah, in sidii shalay aan u muujinay in aysan cidina dadka Soomaaliyeed ku khasbi karin wax aysan ogoleyn aan maantana u muujin doonno inaan nala khaldi karin oo aan fiirodheer iyo feejignaan u yeelan doonno, farsamooyinka cusub ee cadowgu la soo shirtagay ee ku saleysan qaybi oo xukun iyo lafo aboodi iyagaa la isku jebiyaa. Waxaanan Rabbi weyne ka baryaynaa inuu noogu hiilliyo sidii uu horayba noogu hiilliyay.
Gabayga guubaabo wuxuu ku bilaabanayaa:
Cabdiyow1 guubaabaan tirshiyo murtida geeraarka
Gaabsigaan ka doorbidi lahaa aniga oon gurine
Waxse gama’ ii diiday iyo gogol inaan jiifto
Gobonnimadii iney iib tahoo qaar gorgorinaayo
Waa gaweetadaan talisa iyo garowga ceyriine
Galabgalabta ii muuqatiyo guddiyo beenaadka
Hoteellada gawaarida martida loogu kala gooshi
Gableyshimbirta qaar tumaniyo cadale googaale
Goldaloolladaan muuqda een cidi gufeyneynin
Garabgarabka lagu faanayiyo goofaf kala deyrka
Iyo maatidaan gabawaraney haaddu guraneyso
Waa labaan is geyneyninoon la gadgaddoomaaye
Gocashadu waxay tahay bal aan gabay ku faalleeyo:
Qoom waliba waxa uu galuu gudo karaankiisa
Taariikhda guunkaa xafiddoo laga gorfeeyaaye
Xaqiiqana go’ lama saari karo gebi ahaanteede
Gondhor tuugta laga keenayee gaajada la luudi
Inkastoo libaax gaaddadii gucumo loo yeelo
Ama gool yaxaas lagu matelo good wax baabi’iya
Waa Goroyocowshaan naqiin Gergerkunooshiiye
Kuwa guga shan iyo toban jiriyo geeljiraha dhaarsan
Garaaceedna waxaa kuba filnaa gaban ul haystaaye
Muslimiin inaan giddi nahoo Guulle nala doonay
Gaashaanbuurta ka hinaastay iyo gaalo soo duushay
Dowladahan nagu goobtay baa reebay godobtaane.
Gabboodfalidda daaquudyadiyo waxa na gaaraya
Fasahaadka gaamuray Ilaah guudku ka arkaaye
Gegsi buuse naga doonayaa Gurmadmawaayuhuye
Samadaha diyaarado gugciyo miig galgalanaaya
Tomas-howk makey nagu ganeen gujisyo quusaaya
Foosfarka wax guba iyo markuu gaasku nagu hooray
Markey ciiddu nagu gubatayuu ubad gamaaraayay
Masaajidda markii galeen garacyo shaydaanku
Oy culumo ku dhex gowraceen goxoshka waayeela
Dambigaa gumaadka ah kuwii tacaddigaa geystay
In garaaddo dallacsiina iyo gunno la sii siiyo
Oo loo gurbaantumo dulmiga gardarro mooyaane
Gole shiraya weli maanan maqal oo gef dhibayaaye
Galladdii Raxmaaniyo markaan helnay gargaarkiisa
Kuwan maanta gabgableynayee gogosha sheegaaya
Gelinkaan miyey wada dhasheen galabta waa yaabe?
Gal xareedi ay buuxdo oo lagu harraad gooyo
Waa geed harweyn nabadduyoo lagu gam’aayaaye
Qiimaheeda lama gaari karo waxa ay goysaaye
Hayeeshee gabraarato aan nixin siriq ay kuu gunudday
In aad nacabka dabinkiis gashaa waa garaad xuma’e
Garbaduub ha loo xiro xaqiyo gooddintiyo tookha
Guurtida shirqoolkeeda iyo geesiyada ciillan
Gambocaabbud koolkoolintiyo gabbaldayaa soocan
Gambarrada dabbaalku u muhdiyo guryaha miineysan
Gaadmada mar kale nalala rabo gulufka heenseysan
Guceleyntooda fahamnoo wallaan layna gelineyne
Kuwan maanta gabgableynayee gogosha sheegaaya
Gelinkaan miyey wada dhasheen galabta waa yaabe?
Abasiinya haddey gari gashoy gelelef deyneyso
In la gawiyo maahee haddey gacalley yeeleyso
Gudaha Hararta taariikhiga ah Godey ma joogteene
Gabdho iyo ma layseen haween birimageydo ahe
Saqiirrada gasiin kama jarteen baahidow go'iye
Gafuurraxun haddaan leys hureyn gumuca baaruudda
Oo ay Galbeed waajib tahay iney ka guureyso
Galka seefta inaan kala baxnoon layna guuguulin
Gurey2 taladiis inaan qaadannaa wey gudboontahaye
Kuwa na leh gacmaha raaracshoo keena guradiinna
Waa gurracni waxay doonayaan gacallayaaloowe
Ka gaashaanta godin liqoo gabbanayaa jiraye.
Weel hoostu ay go’antihiyo gorof aboor diirtay
Oo guddaafad boqol sano dhex yiil qurun gufaaceysa
Guntuu subag ka buuxaa kuwii nagu gariifaayay
Mar haddeysan gobo’ iyo ka helin goror yar oo hoora
Gidaarkii haddey soo herdiyeen goonna wada diismay
Hadduu Walad3 gas siyoo shirkii Melles4guddoominayo
Dulligii Gabre Dellaa-na5 shirin gafaneyaashiisii
Garaamaad hadduu qaybin iyo giniyo laaluush ah
Kuwa gudaya weli leylkiyoo sii gurguuranaya
Waa gurracni waxay doonayaan gacallayaaloowe
Ka gaashaanta godin qaar liqoo gabbanayaa jiraye.
Gaadiid in laga yeesho uu gorodda laalaadsho
Geeri bey ka doorteen shacbigu iney gumoobaane
Gantaal culus wixii aan gamuun uga jawaabeynay
Garruun iyo wixii lagu diriray mindiyo gaalleef ah
Gaangiistarradii markey jabeen gooste badankoodna
Gegidii Muqdisho iyo markii goobo lagu owday
Oo ay gabaabsiba yahiin godad ku hoos dhuunta
Guushii mekey soo dhowdoy gacantu haabhaaban
Inuu samuhu naga gaagaxoon seegno godolkeeda
Gabbal baasna uu noo dumoo dhiiggu galacleeyo
Gumeysigey bishaaro u tahoo waa gedduu rabaye
Kuwa gambin dadaalkeenniyoo balada goobaaya
Waa gurracni waxay doonayaan gacallayaaloowe
Ka gaashaanta godin qaar liqoo gabbanayaa jiraye.
Ciidankii midnimo giigsan loo aan la kala geynin
Dadweynuhuna garabsiinayaa laga gariiraaye
Haddii geeshku tafaraaruqoo hamigu soo gaabto
Garwadeen hadduu waayo uu gabo hoggaankiisu
Haddii gaasaskii qeybihiyo guuto kala yaacdo
Ururkuna uu kala gaardiyoo horinba gees aaddo
Haddey kooxdii sii googo’doo leysku geli waayo
Oo unugga gow iyo gish ma leh garashadii siiso
In sidii galley daadsan meel loo gurbiyo aayar
Gumeysigey bishaaro u tahoo waa gedduu rabaye
Kuwa wadajir ka gadoodayee goonni wax u raadin
Waa gurracni waxay doonayaan gacallayaaloowe
Ka gaashaanta godin qaar liqoo gabbanayaa jiraye.
Soomaalaay gawaan aan wax maqal gadane yeelkiise
Haddaan soo gunaanado waxaan hadal ku gooyay
Garmaqaateyaal waashayoon abid garaabeynin
Giiryaale fulayoo baqiyo guduri shaar qaatay
Galti qooqay waan eednay iyo qaar gadaabo ahe
Kuwii gudcurka aan taagannahay ina gayeysiiyay
Gebi dheerna nagu sii wadiyo goob halaag yaallo
Geenyiyo iney naga dhigtaan guunyada u foofta
Gumeysigey bishaaro u tahoo waa gedduu rabaye
Inta aan shisheeyuhu gayiga sheegan gabigiisba
Oo aanan gibir waa baryaba xoolo loo geynin
Waa inaan gilgilannaa intey goori goor tahaye
Guryankaan na daashaday inataan gununucaan deyno
Oon diinta gaashaamannoon gowska ku adkeyno
Badbaadada ha loo wada guntado goolku wuu dhalanne.
- C/Qaadir Maxamed C. Cibaar
- Imaam Ahmed Ibraahim Al-Ghazi ( Axmed Gurey)
- Ahmadu Wald Cabdalla ( Wakiilka gaarka ee QM u qaabiksan Soomaaliya)
- Meles Senawi ( Ra’iisul wasaaraha Itoobiya)
- Col. Gabra Dela ( Taliyaha ciidamada Itoobiya ee ku sugan Soomaaliya)
Halkaan ka akhriso/dhageyso; gabaygii GO’AAN QARAN