Hay’adda UNHCR oo laga eryay xerada Alqaraj oo ay ku jiraan Qaxootiga Soomaaliyeed ee ugu badan dalka Yemen
Khamiis, Janaayo, 02, 2020 (HOL)-
Wararka ka imanaya dalka Yemen ayaa sheegaya in xaalad nolaleed oo adag ay soo
food saartay Qaxootiga Soomaalida ee ku jira xerada Alqaraj kaddib markii laga
eryay xerada hay’addii gacanta ku heysay ee UNHCR.
Wararka ayaa waxaa ay sheegayaan
in sababta hay’adda looga eryay xerada tahay kaddib khilaaf soo kala –dhaxgalay
madaxda ugu sarreysay UNHCR iyo dadka deegaanka ee Yemeniyiinta ah.
Hay’adda ayaa lagu waramayaa in ay joojisay
Raashinkii, Biyihii, adeegii Waxbarsho iyo wax-yaabaha daruuriyaadka ah ee
dadka la siin jirey, islamarkaana haatan Soomaalida faraha badan ee xeradaasi
ku nool ay soo wajaheen xaalado daran oo nolol xumo.
Waxaa lagu filayaa in magaalada Cadan ay shir ku
yeeshaan Madaxda Hay’adda UNHCR iyo hay’adaha kale ee hoostaga iyo kuwa
horboodaya dadka Yemeniyiinta ah si xal looga gaaro khilaafka labada dhinac.
Xerada Alqaraj ayaa ka mid ah xeryaha qaxootiga
ugu weyn marka la eego Bariga dhexe, waxaana ku jira xerada Qaxootiga ugu badan
ee Soomaalida ku dhaqan dalka Yemen oo muddo dheerba halkaa ku noolaa.
C/raxmaan Diini, Hiiraan Online
[email protected]