Axad, Maarso, 31, 2019 (HOL)-
Isbitaalka Banaadir ee magaalada Muqdisho ayaa la dhigay ku dhawaad 35 ruux oo
sida la sheegay ku sumoobay boorash ay ka cabeen goob lagu quudiyo dadka da’yarta
ah.
Guddoomiye ku-xigeenka maamulka
gobolka Banaadir Basma Caamir iyo mas’uuliyiin kale oo ka tirsan maamulka oo
dadkan ku booqday isbitaalka lagula tacaalayo xaaladooda caafimaad ayaa
sheegtay in dadkan sumoobay isugu jiraan haween iyo carruur.
Qaarkood dhaqaatiirta Isbitaalka ayaa la
tacaalaya halka qaar kalena ay ku sugan yihiin xaalad halis ah sida ay sheegtay
Guddoomiye Basma.
Basma ayaa intaa ku dartay in maamulku amar ku
siinayo Jikooyinka ka furan degmooyinka gobolka Banaadir in ay joojiyaan
bixinta iyo qeybta boorashka ilaa laga ogaanayo lagana hubinayo tayadiisa iyo
halka ay ka timid suntan.
‘’Hay’addo badan ayaa jira oo taakuleyn siiya
Jikooyinka lagu quudiyo dadka danyarta ah, sidaa daraadeed baaritaan ayaa
bilaabeynaa wixii ka soo baxana dib ayaan ka soo sheegi doonnaa’’ ayeey tiri
guddoomiye ku-xigeenka arrimaha bulshada maamulka gobolka Banaadir.
Qoysas badan oo dan’yar ah una badan dadka
barakacayaasha ayaa ku xiran Jikooyin maamulka gobolka Banaadir uu ka sameeyay
degmooyinka ay magaaladu ka kooban tahay.
C/raxmaan Diini,
Hiiraan Online
[email protected]
