Isniin, June, 24, 2019 (HOL) – Guddoomiyihii xilka laga
qaaday Yuusuf Axmed Hagar Dabageed oo wali ku adkeysanaya xafiiska ayaa shir
jaraa’id ku sheegay in markii saddexaad lagu soo weeraray xarunta maamulka
gobolka Hiiraan.
Yuusuf Dabageed ayaa weerarkaasi
ku tilmaamay sida uu hadalka u dhigay mid la doonayay in xarunta looga saaro,
hasse ahaatee sida uu hadal u dhigay ay iska diideen shacabka ku dhaqan
magaalada Beledweyne.
‘’Weerarkaa waxaa ku lug lahaa
dad Soomaaliyeed iyo ciidamo ajnabi ah, wuxuuna ahaa weerar afgambi, laakiin
waan ka guuleysanay’’ ayuu yiri Yuusuf Dabageed guddoomiyihii hore ee maamulka
gobolka Hiiraan.
Wuxuu sheegay in bulshada reer
Hiiraan looga baahan yahay in ay aayahooda ka wada hadlaan, tallada gacantooda
lagu soo celiyo, isaga oo intaa ku daray in ay raali –galin ka bixinayaan wixii
horay u dhacay.
Hadalka guddoomiyaha ayaa imanaya
xili maanta kulan magaalada Beledweyne ay ku yeesheen madaxweynaha dowlad
gobolleedka Hirshabeelle mudane Maxamed Cabdi Waare iyo saraakiisha howlgalka
midowga Africa AMISOM, waxaana qeyb ka ahaa guddoomiyaha cusub ee maamulka
gobolka Cali Maxamed Caraale iyo guud ahaanba qeybaha kala duwan ee hoggaanka
ciidamada dowladda Soomaaliya.
C/raxmaan Diini, Hiiraan Online
[email protected]
