Jimco, June, 21, 2019 (HOL)–Magaalada Dhuusa-Mareeb ee xarunta ah u maamulka Galmudug waxaa ka soconaya kulamo ay halkaa ku leeyihiin wafdi uu horkacayo Wasiirka Arrimaha Gudaha Soomaaliya Maxamed Cabdi Sabriye iyo mas’uuliyiin sar sare oo ka tirsan maamulka Galmudug.
Dowladda Soomaaliya ayaa u
muuqata in ay ku adkeysaneyso meelmarinta go’aankeeda la xiriira mudo xileedka
madaxda Galmudug oo ay dowladdu sheegtay in ay ku egtahay 4-bisha July ee nagu
soo foolka leh.
Warar hoos oo soo baxaya ayaa
sheegaya in madaxda Galmudug ee ku wada sugan degmada Dhuusa-Mareeb siweyn ugu kala qeybsan yihiin
go’aanka dowladda, waxaana wararku sheegayaan in garabka Ahlu Sunna ee horay
uga biiray maamulka Galmudug soo dhaweynayaan Warka ka soo baxay Wasaarradda
Arrimaha gudaha ee mudo xileedka Galmudug.
Balse madaxweynaha Galmudug Axmed
Ducaale Geelle Xaaf oo khliaaf weyn uu kala dhaxeeyo madaxda ugu sareysa
dowladda Soomaaliya ayaa ka biyo diidan go’aanka ka soo baxay Wasaarradda
Arrimaha Gudaha Soomaaliya isaga oo u arkaya go’aannada dowladda ee ka dhanka
ah Galmudug fara-galin iyo burburinta jirintaanka maamulka uu madaxweynaha ka
yahay.
Mas’uuliyiinta garabka Ahlu Sunna
ee ku biiray Galmudug iyo madaxweynaha Galmudug Axmed Ducaale Geelle Xaaf ayaa
la sheegay in ay ku kala qeybsameen in wada hadalo lala furo wafdiga Wasiirka,
iyadoo kol hore ee maanta Qoraal ka soo baxay madaxtooyada Galmudug looga
mamnuucay deegaannada uu maamulka ka arimiyo in ay soo galaan mas’uuliyiin ka
socta dowladda Soomaaliya.
Laakiin go’aankaa waxba kama
hergalin kaddib markii galinkii danbe ee maanta degmada Dhuusa-Mareeb ay
gaareen Wafdi heer sare ah oo ka socda dowladda, taasoo muujineysa in Galmudug
ku mideysneyn go’aanka mamnuucista mas’uuliyiinta dowladda Soomaaliya.
Wada hadallada ayaa wali ka sii
soconaya Dhuusa-Mareeb, lamana oga ugu danbeyntii halka ay saldhigan doonto
xiisada siyaasadeed ee Galmudug iyo dowladda Dhexe oo in muddo ahba soo
jiitameysay.
C/raxmaan Diini, Hiiraan Online
[email protected]