Isniin, June, 17 2019 (HOL)- Hal askari ayaa u geeriyooday
dhagax ay la dhaceen dadka shacab ahi ka dib markii dadka deegaanka Fiqi ayuub
ee gobolka Togdheer ka gadoodeen shirkad baadhaysay macdanta.
Askarigan ayaa la sheegay inay
dhagaxi lala dhacay waxyeelo ka soo
gaadhay madaxa, taasina ay sababtay geeridan, waxaanu taliye ku xigeenka
Ciidanka Booliska Somaliland Cabdiraxmaan Fooxle ayaa sheegay in aanay mar
dambe u dul qaadan doonin dhagaxaanta askarta lala dhaco.
“Askari Kayse Maxamed Cawaalle
wuxuu ahaa ciidamada gaarka loo tobabaray, wuxuu sitay qalabkiisii, marka la
shiidayo laabta wuxuu ku sitay afar qasnadood oo rasaas ah iyo qorigiisa oo
buuxa, balse wax talaabo oo uu qaaday ma jirto iyadoo dhagaxaan lala dhacayo,
markuu arkay inay xaaladu adag tahayna
wuxuu qorigii iskaga dhiibay askarigii la socday”ayuu yidhi taliye ku xigeenku
Ciidanka BOoliska Somaliland Fooxle.
“Dadweynow ciidanka habeen iyo
maalin idin ilaalinaya oo hantidiina iyo naftiisa ilaalinaya ayaad maalin walba
dhagax ku dilaysaan, imika waa dhawr iyo toban askari inta dhagax iyo shiid
lagu dilay”ayuu hadalkiisa raaciyey.
Sidoo kale, askari la socday
askarigan geeriyooday ayaa isna dhaawac ka soo gaadhay shiidka dhagaxaanta
dadkii ku tuurayeen askarta.
Taliyuhu wuxuu sheegay in
dulqaadkii ka dhamaaday oo maanta laga bilaabo sharciga u dhexeeya ku kala bixi
doonaan.
Deegaanada macdanta laga baadhayo waxa ciidanka iyo shirkadaha ka hor
joogsada shacabka deegaanka, kuwaas oo ay dhacdo inay iska hor yimaadaan
ciidanka iyo shacabka deegaanka.
Barkhad-ladiif M. Cumar, Hiiraan Online
[email protected]
Hargeysa, Somaliland.
