Arbaco, Janaayo, 09, 2019 (HOL)- Madaxweynaha cusub ee Puntland, Siciid
Cabdullaahi Deni ayaa ka hadlay mowqifka ugu aaddan Iskaashiga
dowlad-gobolleedyada , xilli u wareysi siiyay BBC-da.
“Dastuurka ayaa
dhigaya in dowlad-gobolleedyada ay iskaashadaan wixii danahooda
kadhaxeeya,In la iskaashadana ma ahan wax dastuurka kasoo horjeeda". ayuu
yiri Madaxweyne Deni.
“Wax walba oo Puntland gaar u
ah waan ilaalinaynaa, wixii federaalka aan wadagnana waan ka shaqeynayna.” ayuu
raaciyay.
Waraysiga ayuu sidoo kale
arrimo dhowr ah uga hadlay.
Madaxweynaha cusub ee
Puntland oo doorashadii Talaadaddii shalay ku guuleystay ayaa xaqiijiyay amniga
inay muhiimad gaar ah maamulkiisa uu siin doono.
Dagaalka al-Shabaab iyo
Daacish ayuu xaqiijiyay inay dardar-gelin doonan, balse ma jirin waqti uu u
qabtay dagaalka inay ku soo afjari karaan.
Waxa uu ka hadlay deegaannada
ka maqan Puntland ee gacanta ugu jira Soomaaliland, isagoo diidday inuu jiro
muran dhinaca xadka ah ee u dhaxeey labada dhinac.
Siciid Deni ayaa sheegay in
Soomaaliland ay ku soo xadgudubtay dhulka Puntland, isagoo ugu baaqay inay dib
ugu laabtaan goobahooda.
Madaxweynaha Puntland oo la
filayo dhawaan inuu si rasmi xilka ula wareego ayaa sheegay in dhisida
nidaamka Federaalka ay Puntland qeyb ka aheyd, isla markaana naf iyo maal kaga
baxay, waxaa uu xusay inay sii xoojin doonaan.
Waxaa uu inta ku daray in
dalka uu ku jiro Marxalad dib u dhis ah, isla markaana Dastuurka uu qabyo
yahay, lagana soo baxay nidaam dowlad dhexe, haatan la galay nidaamka
Federaalka, isagoo xusay inay ka shaqeynayaan shuruucda lagu hagi lahaa, isagoo
xusay in arrinata jira aanay khilaaf aheyn, balse ay tahay aragti duwanaan.
Iman Mohamed Jama,Hiiraan Online
[email protected]
