Talaado, Janaayo, 29, 2019 (HOL)- Saacadihii ugu danbeeyay waxaa siweyn u qabsaday baraha ay bulshadu ku wada xiriirto hadal uu madaxweynaha dalka Uganda Yoweri Museveni ka jeediyay shirweyne ay lahaayeen hay’addaha Garsoorka dalkiisa, isaga oo sheegay in Soomaaliya ka mid tahay dalal badan oo caalamka ka tirsan oo aan laheyn dowlad maamusha.
Madaxweynaha ayaa u sheegay golaha
Garsoorka dalkiisa in ay jiraan dalal badan oo aan laheyn dowlad maamusho,
isaga oo sheegay in tusaale ugu dhaw loo soo qaadan karo sida uu hadalka u
dhigay Soomaliya, sidoo kalana jiraan dalal kale oo la mid ah Soomaaliya
laakiin arrimo diblomaasiyada la xiriirta uu u qarinayo in uu carabka ku
dhufto.
‘’Dowlad waxaa loola jeedaa hay’ad
maamusha dhulka, sidaa daraadeed waxa jira dalal badan oo aan laheyn hay’addo
maamula, waxaana tusaale idinku soo qaadan karaa Soomaaliya ayuu yiri
madaxweynaha dalka Uganda.
Dadka baraha bulshada isku dhaafanayay
hadalka madaxweynaha Uganda ayaa ku tilmaamay gaf iyo ceeb meel ka dhac ku ah
dowladnimada Soomaaliya, xili dowlad Uganda ay dalka ka joogaan Kumannaan
ciidamo ah oo ilaaliya xarumaha dowladda gaar ahaan madaxtooyada oo xarun u ah
mas’uuliyiinta ugu sareya dalka.
Wali ma jiro wax war ah oo ka soo baxay
dhinaca dowladda Soomaaliya oo la xiriira hadalka uu jeediyay madaxweynaha
dalka Uganda.
C/raxmaan Diini,
Hiiraan Online
[email protected]
