Isniin, Janaayo, 28, 2019 (HOL)- Xukuumadda Somaliland ayaa sheegtay inay dalka
ka saarayso dhakhaatiirta Ajananiga ah ee ka hawlgalla Somaliland.
113 dhakhtar oo ajanabi ah ayuu diwaangaliyey
xafiiska mihnadleyaasha caafimaadka Somaliland inay ka hawlgalaan guud
ahaan Somaliland.
“Waxaanu diiwaangalinay dhakhtaradda
ajanabiga ah ee ka hawlgalla dalka waxaanay yihiin 113 dhakhtar, kuwaas oo aan
sharci ka haysan xafiiska mihnadleyaasha caafimaadka ee Somaliland,
sidaas darteed cabashadii dadweynuhu ka cabanayeena way badatay oo illaa
madaxweynihii bay gaadhay, ninka janabiga ah nin kuu tudhaya maaha.”ayuu yidhi
gudoomiyaha mihnadleyaasha caafimaadka Axmed Xaashi Oday.
Mar uu ka hadlayey khatarta ay dadka ku hayaan
waxa uu sheegay in mararka qaarkood qaliin aan loo baahnayn ku sameeyaan dadka
si ay lacag u helaan.,
“Waxa ka sii daran dhakhaatiirta ajanabiga ahi
heshiish buu la gallay mulkiilaha cisbitaalka, waxaanay ku heshiiyeen in
qofkasta oo uu qallayo uu lacag dheer mushaharkiisa la siiyo, sidaas darteed si
uu lacag u helo ayuu dad aan qaliin u baahnayn qalin ku sameeyeen si uu
mushaharkiisa uu u dhigmo”ayuu raaciyey hadalkiisa.
Sidoo kale, waxa uu Dr: Oday sheegay in aanay
imika ka ogolayn inay sharciga ay ku joogaan dalka ka qaataan ururka
Mihnadleyaasha caafimaadka oo ay hore u gees mareen, haseyeeshee marka uu qofku
noqdo qofka keensanayaa uu soo gudbiyo dhakhtarka uu keeno macluumaadkiisa si
jaamacadda uu ka baxay loo ogaado iyo waxa uu ku takhasusay.
“Marka la saarayo dhakhaatiirtu waxa qaylin
doonna dadkii cisbitaaladda lahaa ee ay ka xidhmayeen, marka kama yeelayno
inaan imika dalka gudihiisa sharci uu ku joogo ku siino laakin marka uu
dalkiisa ku noqdo qofka doonaya inuu keensado waa inuu soo gudbiyo
shahaadadiisa aqoontiisa iyo meelihii uu wax ka bartay si loola xidhiidho
jaamacadihii uu ka soo baxay inuu qofkaasi aqoon u leeyaha iyo in kale, waayo
dhakhtarka wanaagsan gurigiisa ma dhaafo waayo dadkiisa u baahan.”ayuu yidhi
Somaliland waxa aad loogu tartamaa ka ganacsiga
cusbitaalo maadaama oo macaash badan laga helo, waxaanay sababtay in ajaanib
badan la keeno maadaama oo ay dadku jecel yihiin ajanabi, haseyeeshee saarista
dalka laga saarayo waxay abuuri doonta muran iyo qaylo ka dhasha oo ay isku
khilaafi doonaan dadkii keensaday dhakhaatiirtan.
Barkhad-ladiif
M. Cumar, Hiiraan Online
[email protected]
Hargeysa,
Somaliland.
