Wararkii ugu danbeeyay Qarax gilgilay inta badan magaalada Muqdisho oo ka dhacay Isgoyska Ex Kootarool Afgooye
Sabti, December, 28, 2019 (HOL)- Faah faahinno dheeraad ah ayaa ka soo baxaya
weerar ismiidaamin ah oo subaxnimadii hore ee saakay lagu qaaday Barkootarool
oo ay ciidamada waaxda canshuuraha ku lahaayeen Isgoyska Ex Kootarool Afgooye.
Goobjoogayaal ayaa warbaahinta u
sheegay in qarxan uu sababay khasaare dhimasho iyo dhaawac oo baaxad leh
inkastoo tiro rasmi ah la ogeyn, haddana goobta uu qaraxu ka dhacay ayaa
waqtigaa aheyd mid aad u mashquul ah oo ay ku sugnaayeen gaadiidka dadweynaha
oo qaarkood goobta la weerarray u tagay in ay ka goostaan warqado sharci ah oo
ay jidadka ku maraan.
Gaadiidka Gurmadka deg deg ah ayaa ku howlan daabulida dhaawacyadda waxaana
Qaraxa uu ahaa mid xooggan oo xataa ay dhibaato soo gaartay dad Shacab ah oo ku
sugnaa guryo ku dhow Isgoyska.
Dhibaatada ugu badan ayaa la sheegay in ay soo
gaartay gaadiidka Mooto Bajaajka oo subax walba halkaa u tagay in ay ka
goostaan warqadaha sharciga ah ee waddo marista, sidoo kale waxaa uu dab weyn
qabsaday Kaalin Shidaal oo goobta ka agdhaw.
Khasaaraha kuma eka goobta uu qaraxu ka dhacay oo
kaliya ee xitaa waxaa uu burbur soo gaaray guryaha dadka rayidka ah ee ka
agdhaw halka goobta la weeraray.
C/raxmaan Diini, Hiiraan Online
[email protected]
