Jimco, December, 27, 2019 (HOL)-Madaxweynaha Eritrea Isaias Afwerki ayaa khamiistii ballan-qaaday inuu xoojin doono wada-shaqeynta kala dhaxeysa Itoobiya, isaga oo ku guda jiray maalintii ugu dambeysay booqasho laba maalmood ah, oo loo arkay inay timid xilli hanaankii nabadda labada dal uu gaabiyey.
Afwerki ayaa arbacadii Addis-Ababa ku tagay booqashadii ugu horreysay
tan iyo markii ra’iisul wasaaraha Itoobiya Abiy Ahmed uu abaal-marinta
nabadda ee Nobel Peace Prize ku helay billaabidda heshiiska labada dal.
Eritrea iyo Itoobiya ayaa waxaa dhex-maray dagaal xuduudda ka dhacay,
1998-2000, kaasi oo ay ku geeriyoodeen qiyaastii 80,000 oo qof.
Afwerki ayaa ka mahad celiyey soo dhoweynta wanaagsan ee la siiyey isaga iyo wafdigiisa.
Waxa uu ballan-qaaday inuu u shaqeyn doono “si xooggan si dib loogu
helo fursadihii ka lumay saddex jiil oo labada dal ah, loona xoojiyo
bogga cusub ee wada-shaqeynta labada dal” sida uu qoraal uu twitter-ka
soo dhigay ku sheegay wasiirka warfaafinta Eritrea Yemane Meskel.
Isaias iyo Abiy ayaa sidoo kale khamiistii dhagax dhigay dhismaha cusub ee safaaradda Eritrea ee Addis-Ababa.
Kadib markii labada hoggaamiye ay markii ugu horeysay ku kulmeen
Asmara sanadii tagtay, ayaa waxay dib u fureen safaaradahooda,
duulimaadyadii labada dal ayaa dib loo billaabay, waxaana xigay kulamo
kale oo dhowr ah.
Hase yeeshee, niyad wanaagii ka dhashay ficilladaas ayaa kadib
gaabiyey, waxaana muwaadiniinta labada dal ay ka ashtakoodeen inay weli
sugayaan is-beddel macno leh.
Intii ay socotay xafaladdii uu Abiy ku guddoomay billada Nobel Peace,
guddoomiyaha guddigaas Berit Reiss-Andersen ayaa sheegtay in hannaankii
nabadda labada dal “uu u muuqdo mid hakaday” ayada oo weli xuduudda ay
xiran tahay, horumar yarna laga sameeyey dadaallada dib loogu
calaamadeynayo.
Booqashadii ugu dambeysay ee Afwerki ayaa loo arkaa mid dib usoo
nooleyn doonta dadaallada nabadeed ee labada dal. Afwerki ayaa saaka dib
ugu laabtay magaalada Asmara.
C/raxmaan Diini, Hiiraan Online
[email protected]
