Axad, December 15, 2019 (HOL )– Xoghayihii hore ee warfaafinta
xisbiga UCID Yuusuf Kayse Cabdilaahi
ayaa ku dhaliilay xukuumadda inay waxqabadkeedii sanadka ku darsatay inay la
kulantay gudoomiyeyaasha warbaahinta madaxa banaan, halka sanadkii hore ku
darsatay inay la kulantay xisbiyada mucaaradka ah.
Sidoo kale, waxa uu dhaliilay wax qabad la’aanta wasaarada
caafimaadka oo uu sheegay inay dalka ku soo bateen cuduro faro badan, taasina
ay sabab u tahay ilaalin la’aanta cuntooyinka iyo dawooyinka tayada leh.
“Xukuumaddu waxay
waxqabadkeygi ku soo dartay inay la kulantay gudoomiyeyaasha telefishanada madax
banaan, sanakdii hore waxay ku dartay waxqabadkeeda inay la kulantay xisbiyada
mucaaradka ah., arrinkaasi wuxu keenay in falcelin badan laga soo celiyey, taasina
waxay sababtay in xafladihii lacagta badan lagu qaban jirey iska daayaan oo
muuqaal la daawado ka dhigaan waxqabadkeedii”ayuu yidhi Yuusuf kayse.
“Waxay sheegeen inay la kulmen beesha caalamka, waxaan
madaxweynaha u sheegaya kulankaasi aad wax qabadka ka dhigateen bal wax ka
aqbal oo waxay ku yidhaahdaana qaado beesha Caalamka ilayn waadigaa kulankoodii
wax qabad ka dhigtaye”ayuu raaciyey hadalkiisii.
“Sanadkan waxa inagu soo kordhay cudur kuduudiye la
yidhaahdo oo gobolka Togdheer ka dhacay, xanuunkaasi dad baa ku dhintay qaar
badana halis bay u galeen, markii aanu Burco tagtay ee aanu ka hadalnay waxa
noo jawaabay agaasimaha caafimaadka oo sheegay in aanu cudurkaasi dadka dilin
isagoo aan tagin Burco”ayuu yidhi Kayse oo dhaliilayey wasaarada caafimaadka.
Xoghayihii hore waxa uu sheegay inay Somaliland noqotay
hoygii qashinka oo aan la baadhin tayada dawooyinka iyo cuntooyinka taasina ay
sabab u tahay cuduro badan oo dadka ku
dhaca.
Xisbiga ucid ayaa ka jawaabayey barnaamijka ay xukuumadda
madaxweyne BIixi ka diyaarisay muuqaal ay kaga waramayso waxqabadkii sanadkan
dhamaanaya.
Barkhad-ladiif M. Cumar, Hiiraan Online
[email protected]
Hargeysa, Somaliland.