Agaasimayaasha Wasaarradaha Dastuurka heer Federaal iyo Dowlad gobolleed oo kulan ugu soo dhamaaday Baydhabo
Khamiis, December, 12, 2019 (HOL)-Magaalada Baydhabo waxaa ku soo dhamaaday kulan u dhexeeyay agasimayaasha guud ee wasaaradaha dastuurka heer federal iyo heer dowlad goboleed kaa oo muddo saddex maalin ah ka socday magaalada baydhabo ee dowlad goboleedka koonfur galbeed Soomaaliya.
Kulanka ayaa intii uu socday waxaa diiradda lagu saaray sidii loo xoojin lahaa xiriirka wada shaqayn ee u dhexeeeya wasaaradaha Dastuurka ee labada heer, aqoon iswaydaarsi ku saabsan maamulka iyo maaraynta, qorshaynta, wacyigalinta iyo latashiyada arrimaha dib-u-eegistadastuurka
iyo sidii la iskaga
kaashan lahaa dhamaystirka dib-u-eegista dastuurka June 2020 iyo tallaabooyinka muhiimka ee la qaadayo si loo gaaro yoolkaas.
Ka Qeybgalayaasha ayaa sidoo kale soo bandhigay talooyin dhowr ah oo ku aadan geedi socodka dib-u-eegista dastuurka gaar ahaan sidii loo wajihi lahaa arrimaha u baahan wada xaajoodka siyaasadeed si loo helo dastuur dhamaystiran.
Agaasimaha guud ee wasaaradda dastuurka koonfur galbeed Jeylaani
Abdullaahi Xaaji oo ku hadlay magaca agaasimayaasha guud ee wasaaradaha
dastuurka dowlad goboleedyada ayaa soo dhoweeyay kulamada nuucaan oo
kale ah isagoo xusay in cilmi iyo warbixin dhammaystiran ay imminka ka
haayaan heerarka uu marayo geedi socodka dastuurka, waxa uuna carrabka
ku adkeeyay in la sii xoojiyo xiriirka iyo kulamada farsamo ee
wasaardaha dastuurka labada heer.
Agaasimaha guud ee wasaaradda dastuurka XFS mudane Mohamed Abuukar Zubayr oo kulanka so xiray ayaa sheegay in ay muhiim tahay in la iswaydaarsado xogaha quseeya maamulka, qordhaynta, wacyigalinta iyo sidoo kale arrimaha siyaasadda si dhammaan agaasimayaasha ay ula
socdaan heerarka uu marayo geedi socodka dib-u-eegista dastuurka.
“Door wayn ayaa noo furan ka farsamo ahaan in aan ku yeellanno geedi
socodka dib-u-eegista dastuurka, si aan u xaqiijinno in la soo
gabagabeeyo dastuurka june 2020” ayuu yiri agaasimaha Guud ee Wasaaradda
dastuurka XFS Mohamed Abuukar Zubeyr.
Ugu danbeyntii ayaa lagu balamay in la sii dardargeliyo howlaha dib-u-eegista dastuurka islamarkaana Wasaaradaha dastuurka ee heer dowlad goboleed ay ka shaqeeyaan sidii ay aragti uga keeni lahaayeen qaabka loo wajahayo arrimaha u baahan wada xaajoodka siyaasadeed si looga gaaro heshiis kama dambeys ah.
C/raxmaan Diini, Hiiraan Online
[email protected]