Wasiir Beyle oo ka hadlay sababta loo soo daabici la yahay lacagta Shilinka Soomaaliga
Arbaco, Augusto, 21, 2019 (HOL)-Wasiirka Maaliyadda Xukuumadda Soomaaliya Cabdiraxmaan Ducaale Beyle oo maanta shir jaraa’id ku qabtay xarunta wasaaradda maaliyadda ayaa ka hadlay halka ay mareyso daabicidda lacagta cusub ee Soomaaliya iyo cafinta deymaha lagu leeyahay dalka Soomaaliya.
Wasiir Beyle ayaa shirkiisa jaraa'id ku sheegay in dowladda aysan dhaqaale ahaan isku filnayn islamarkaana ku tiirsan tahay kaalmada wadamada kale.
Wuxuu sheegay in lacagta cusub qarshkii lagu soo daabici lahaa uu maqan-yahay marka ay dowladaha u bandhigaanna wixii ay ka soo helaan ku dabaraan Mushaarka Ciidanka,hay’adaha dowladda iyo mushaarka shaqaalaha dowladda.
Wasiir Beyle ayaa codsaday in aan lagu celcelin su’aasha ku saabsan daabacadda Lacagta cusub oo uu sheegay in ay u xayiran tahay lacagtii lagu soo daabici lahaa, waxaana uu intaas raaciyay in ay danta ku kalliftay in uu waqti cayiman sheegi waayo.
Waxaa wasiirku sheegay in lacagtaas oo cadadkeedu dhan yahay 42 Milyan oo doollar ah ay hadda kala bar ka hayaan inta kale ku dadaalayaan.
Sidoo
kale Wasiirka maaliyada ayaa sheegay in ay muddo qaadanayso sidii looga
cafin lahaa deymaha Soomaaliya ay u leeyihiin dalalka caalamka, isaga oo ugu danbeyntii ballanqaaday in dhamaadka sanadka 2019 ay Soomaaliya heli doonto lacag cusub oo ay iyada leedahay.
C/raxmaan Diini,
Hiiraan Online
[email protected]
